លោកនាយករដ្ឋមន្ត្រី ហ៊ុន សែន បានសម្រេចហាមឃាត់ការជួបជុំមនុស្សច្រើនចាប់ពី២០នាក់ឡើងទៅនៅរាជធានីភ្នំពេញ និងខេត្តសៀមរាប នៅក្នុងរយៈពេល ១៥ថ្ងៃខាងមុខនេះ ដោយថា ជាវិធានការបន្ថែមដើម្បីការពារ និងទប់ស្កាត់ការឆ្លងរីករាលដាលនៃវីរុសកូរ៉ូណា ក្រោយផ្ទុះឡើងនូវករណីឆ្លងក្នុងសហគមន៍ជាលើកដំបូង។
លោកនាយករដ្ឋមន្ត្រី ហ៊ុន សែន បានចេញបញ្ជា្បែបនេះតាមរយៈសារជាសំឡេងដែលត្រូវបានចែកចាយតាមបណ្ដាញសង្គម ដែលលោកបានណែនាំទៅអាជ្ញាធររាជធានីភ្នំពេញ និងខេត្តសៀមរាប ឱ្យផ្អាកការជួបជុំរយៈពេល ១៥ថ្ងៃ ក្នុងនោះហាមឃាត់ទាំងកម្មវិធីមង្គលការផងដែរ។
លោក ហ៊ុន សែន ថ្លែងថា៖ «ខ្ញុំសូមស្នើឱ្យមានការយោគយល់ និងអធ្យាស្រ័យពីសំណាក់ប្រជាពលរដ្ឋរបស់យើង ក្នុងការជួបជុំណាក៏ដោយ គឺសុំផ្អាកជាបណ្ដោះអាសន្នក្នុងរយៈពេល ១៥ថ្ងៃទាំងអាពាហិ៍ពិពាហិ៍ ទាំងការប្រជុំ ទាំងការជួបជុំជាលក្ខណៈដែលអាចថា មនុស្សលើសពី ២០នាក់ទៅ មិនគួរមានការជួបជុំទេ»។
នាយករដ្ឋមន្ត្រីកម្ពុជារូបនេះ បានថ្លែងបន្តថា សម្រាប់ការជួបជុំមនុស្ស ២០នាក់ចុះក្រោម ត្រូវរក្សាគម្លាត និងអនុវត្តតាមសេចក្ដីណែនាំរបស់ក្រសួងសុខាភិបាល ដើម្បីការពារការឆ្លងរីករាលដាលនៃជំងឺកូវីដ១៩។
រដ្ឋាភិបាលបានសម្រេចហាមឃាត់ការជួបជុំបែបនេះ បន្ទាប់ពីរកឃើញករណីឆ្លងក្នុងសហគមន៍ជាលើកដំបូង ដែលបានកើតឡើងលើស្ត្រីម្នាក់វ័យ ៥៦ឆ្នាំ ដែលជាភរិយារបស់អគ្គនាយកពន្ធនាគារ លោក ឆែម សាវុធ ហើយមនុស្សរហូតដល់ ១៥នាក់ហើយដែលបានប្រាស្រ័យទាក់ទងនឹងស្ត្រីរូបនេះ ត្រូវបានធ្វើតេស្ត និងរកឃើញឆ្លងវីរុសកូរ៉ូណាគិតត្រឹមថ្ងៃនេះ៕
