លោកនាយករដ្ឋមន្ត្រី ហ៊ុន សែន ប្រកាសថា រដ្ឋាភិបាលនឹងបញ្ចេញប្រាក់ដល់ទៅ ១១៧០លានរៀល ឬស្មើនឹងប្រហែល ៣០ម៉ឺនដុល្លារ សម្រាប់ជួយដល់ពលរដ្ឋក្រីក្រដែលត្រូវរក្សាខ្លួននៅដាច់ដោយឡែករយៈពេល១៥ថ្ងៃ។
លោកនាយករដ្ឋមន្ត្រី ហ៊ុន សែន បានប្រកាសឱ្យដឹងពីសេចក្ដីសម្រេចបែបនេះនៅក្នុងពិធីបើកការដ្ឋានសាងសង់ និងកែលម្អផ្លូវក្នុងក្រុងសៀមរាប នៅព្រឹកថ្ងៃនេះ។
លោកនាយករដ្ឋមន្ត្រីថ្លែងថា លោកបានសម្រេចបញ្ចេញថវិកាទៅតាមបណ្ដាខេត្ត និងរាជធានីនៅទូទាំងប្រទេស ដើម្បីចាត់ចែងប្រគល់ទៅពលរដ្ឋក្រីក្រដែលត្រូវធ្វើចត្តាឡីស័ក ឬរក្សាខ្លួននៅតាមផ្ទះ ឬនៅតាមមណ្ឌលដែលត្រូវបានរៀបចំដោយអាជ្ញាធរ។
បើតាមការថ្លែងនោះ រដ្ឋាភិបាលសម្រេចផ្ដល់ថវិកា ២ម៉ឺនរៀល ឬ ៥ដុល្លារក្នុងមួយថ្ងៃសម្រាប់គ្រួសារនីមួយៗក្នុងពេលធ្វើចត្តាឡីស័ក២សប្ដាហ៍ ដែលចាត់ទុកវិធានការនេះថា ដើម្បីទប់ស្កាត់ការឆ្លងរីករាលដាលបន្ថែមទៀត។
លោក ហ៊ុន សែន ថ្លែងថា៖ «យើងហ៊ានចាយលុយបែបនេះ ដើម្បីការពារអ្នកដទៃកុំឱ្យឆ្លងចេញពីគាត់ ហើយដើម្បីកុំឱ្យអ្នកដែលត្រូវធ្វើចត្តាឡីស័កនេះ រងគ្រោះដោយមិនបានចេញរកស៊ី ហើយប្រពន្ធកូនដាច់បាយ។ យើងមិនឱ្យមាននរណាដាច់បាយជាដាច់ខាត!»។
ជាងនេះទៅទៀត លោកនាយករដ្ឋមន្ត្រី ហ៊ុន សែន ក៏បានបញ្ជាក់ឡើងវិញផងដែរថា រាល់ការព្យាបាល និងការរក្សាខ្លួនដាច់ដោយឡែកនេះ ត្រូវផ្ដល់ទៅដល់ពលរដ្ឋដោយឥតកម្រៃសេវាទាំងអស់ និងដោយគ្មានការរើសអើងនោះឡើយ។
លោក ហ៊ុន សែន ថ្លែងបន្តថា៖ «ហើយយើងធ្វើដោយគ្មានការរើសអើងអ្វីទាំងអស់។ អ្នកណាក៏ដោយមានជំងឺ យើងផ្គត់ផ្គង់ឱ្យទាំងអស់ ហើយយើងពិនិត្យព្យាបាលដោយមិនយកប្រាក់ទេ។ សូមបញ្ជាក់លើចំណុចនេះឱ្យបានច្បាស់»។
លោកនាយករដ្ឋមន្ត្រី ហ៊ុន សែន បានប្រកាសឱ្យដឹងពីសេចក្ដីសម្រេចបែបនេះរបស់រដ្ឋាភិបាល បន្ទាប់ពីកម្ពុជារកឃើញករណីឆ្លងមួយកើតឡើងលើស្ត្រីម្នាក់វ័យ ៥៦ឆ្នាំ ដែលត្រូវបានចាត់ទុកជាករណីឆ្លងនៅក្នុងសហគមន៍ជាលើកដំបូងនៅកម្ពុជា៕