ផ្សារទំនើប អ៊ីអន ម៉ល ទី១ បានប្រកាសបើកដំណើរការឡើងវិញហើយនៅថ្ងៃនេះ តែ៤ថ្ងៃប៉ុណ្ណោះក្រោយពីផ្សារវិនិយោគដោយក្រុមហ៊ុនជប៉ុនមួយនេះ ត្រូវបានរដ្ឋាភិបាលបញ្ជាឱ្យបិទជាបណ្ដោះអាសន្ន បន្ទាប់ពីរកឃើញស្ត្រីម្នាក់ឆ្លងជំងឺកូវីដ១៩។
ផ្សារទំនើបមួយនេះបានប្រកាសពីការបើកដំណើរការឡើងវិញនៅព្រឹកថ្ងៃនេះ នៅលើទំព័រហ្វេសប៊ុករបស់ខ្លួន។
ផ្សារទំនើប អ៊ីអន ម៉ល សាខាទី១ ដែលស្ថិតនៅម្ដុំតំបន់កោះពេជ្រនោះ ត្រូវបានរដ្ឋាភិបាលបញ្ជាឱ្យបិទជាបណ្ដោះអាសន្នចាប់ពីថ្ងៃសៅរ៍ចុងសប្ដាហ៍កន្លងមកនេះ បន្ទាប់ពីភរិយារបស់អគ្គនាយកពន្ធនាគារ លោក ឆែម សាវុធ បានធ្វើដំណើរទៅផ្សារមួយនេះ មុនពេលគាត់ត្រូវបានរកឃើញឆ្លងជំងឺកូវីដ១៩។
ផ្សារទំនើបជប៉ុនមួយនេះបានប្រកាសនៅលើទំព័រហ្វេសប៊ុករបស់ខ្លួនថា ផ្សារនឹងបើកដំណើរការជាធម្មតាឡើងវិញចាប់ពីម៉ោង១១ព្រឹកថ្ងៃនេះ។
ផ្សារទំនើប អ៊ីអន ម៉ល សាខាទី១នេះ បានប្រកាសថា ខ្លួននឹងអនុវត្តគោលការណ៍សុវត្ថិភាពទៅលើអតិថិជន ដើម្បីការពារការឆ្លងជំងឺកូវីដ១៩។
គិតមកដល់ថ្ងៃនេះ មនុស្ស១៧នាក់ហើយ ត្រូវបានរកឃើញឆ្លងជំងឺកូវីដ១៩ បន្ទាប់ពីពួកគេបានប្រាស្រ័យទាក់ទងជាមួយស្ត្រីវ័យ៥៦ឆ្នាំដែលបានឆ្លងជំងឺកូវីដ១៩៕