អ្នកនាំពាក្យរដ្ឋសភា លោក ឡេង ប៉េងឡុង បានអះអាងថា ការតេស្តលើសំណាកយកចេញពីតំណាងរាស្ត្រ មន្ត្រីរដ្ឋសភា និងអ្នកពាក់ព័ន្ធផ្សេងទៀត បង្ហាញថា ពុំមាននរណាម្នាក់ឆ្លងជំងឺកូវីដ១៩នោះឡើយ ប៉ុន្តែលោកថា ពួកគាត់បានបន្តរក្សាខ្លួននៅដាច់ដោយឡែកបន្តទៀត ដើម្បីតាមដានសុខភាព។
អ្នកនាំពាក្យរដ្ឋសភារូបនេះ ប្រាប់ថា លោកទទួលបានការជូនដំណឹងពីអ្នកស្រី ឱ វណ្ណឌីន នៅព្រឹកថ្ងៃនេះ អំពីលទ្ធផលនៃការធ្វើតេស្តលើសំណាកថ្នាក់ដឹកនាំរដ្ឋសភា តំណាងរាស្ត្រ មន្ត្រីបម្រើការនៅវិមានរដ្ឋសភា និងអ្នកពាក់ព័ន្ធផ្សេងទៀត។
លោក ឡេង ប៉េងឡុង ប្រាប់ថា៖ «អ៊ីចឹង ធ្វើតេស្តទាំងអស់ហ្នឹង អត់មាន [ឆ្លងកូវីដ១៩] ទេ អវិជ្ជមានទាំងអស់»។
លោក ប៉េងឡុង ពុំអាចប្រាប់ពីចំនួនជាក់លាក់នៃអ្នកធ្វើតេស្តនៅវិមានរដ្ឋសភានោះឡើយ ប៉ុន្តែលោកប្រាប់ថា សមាជិកក្រុមគ្រួសាររបស់ដឹកនាំរដ្ឋសភា តំណាងរាស្ត្រ មន្ត្រីរដ្ឋសភា រហូតដល់កងរក្សាសន្តិសុខរបស់ថ្នាក់ដឹកនាំរដ្ឋសភានិងតំណាងរាស្ត្រ ក៏បានស្ម័គ្រចិត្តទៅផ្ដល់សំណាកសម្រាប់ត្រួតពិនិត្យរកមេរោគកូវីដ១៩ផងដែរ កាលពីថ្ងៃអង្គារកន្លងមកនេះ។
បើតាមមន្ត្រីនាំពាក្យរូបនេះ ប្រធានរដ្ឋសភា លោក ហេង សំរិន និងអនុប្រធានរដ្ឋសភាទាំង២រូបនេះ មានសុខភាពធម្មតា ហើយពួកគាត់ សមាជិកសភា មន្ត្រីរដ្ឋសភា និងអ្នកពាក់ព័ន្ធផ្សេងទៀត កំពុងបន្តរក្សាខ្លួននៅដាច់ដោយឡែកនៅតាមផ្ទះរៀងខ្លួន និងនៅសណ្ឋាគារ សុខា ភ្នំពេញ ស្ថិតនៅក្នុងខណ្ឌជ្រោយចង្វារ។
អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន បានប្រាប់វីអូឌីកាលពីថ្ងៃម្សិលមិញថា សំណាកចំនួន១០៦ ត្រូវបានប្រមូលយកពីថ្នាក់ដឹកនាំរដ្ឋសភា សមាជិកសភា មន្ត្រីរដ្ឋសភា ថ្នាក់ដឹកនាំរដ្ឋាភិបាល និងមនុស្សពាក់ព័ន្ធដទៃទៀតកាលពីថ្ងៃអង្គារកន្លងមកនេះ។
លោក ប៉េងឡុង បានឱ្យដឹងទៀតថា ចំណែកឯកិច្ចប្រជុំធំៗរបស់រដ្ឋសភាដែលមានការចូលរួមពីមនុស្សលើសពី២០នាក់ ក៏ត្រូវបានផ្អាកផងដែរ ហើយការបំពេញការងារត្រូវបានធ្វើឡើងពីចម្ងាយតាមប្រព័ន្ធអនឡាញ។
ការធ្វើតេស្តទៅលើថ្នាក់ដឹកនាំរដ្ឋសភា និងមនុស្សជាច្រើនទៀតនៅវិមានរដ្ឋសភា ត្រូវបានធ្វើឡើងក្រោយពីតំណាងរាស្ត្រមណ្ឌលខេត្តស្ទឹងត្រែង លោក ឡូយ សុផាត បានប៉ះពាល់ដោយផ្ទាល់ជាមួយអគ្គនាយកពន្ធនាគារ លោក ឆែម សាវុធ កាលពីថ្ងៃទី២៣ ខែវិច្ឆិកា នៅកន្លែងហាត់ប្រាណ ស្ថិតនៅក្នុងសណ្ឋាគារភ្នំពេញ នៅមុនពេលដឹងថា មន្ត្រីគ្រប់គ្រងពន្ធនាគាររូបនេះមានផ្ទុកជំងឺកូវីដ១៩។
លោក ឡូយ សុផាត ប្រាប់វីអូឌីកាលពីថ្ងៃអង្គារថា លោកបានចូលរួមប្រជុំសភា និងបំពេញការងារនៅក្នុងវិមានរដ្ឋសភា នៅចន្លោះថ្ងៃទី២៣ ដល់ថ្ងៃទី២៥ ខែវិច្ឆិកា ហើយក៏បានធ្វើដំណើរទៅខេត្តស្ទឹងត្រែងផងដែរ កាលពីចុងសប្ដាហ៍កន្លងមកនេះ៕