រដ្ឋមន្ត្រីក្រសួងមហាផ្ទៃ លោក ស ខេង បានសម្រេចផ្អាកការបំពេញការងាររបស់មន្ត្រីនៅក្រសួងមួយនេះជាបណ្ដោះអាសន្ន បន្ទាប់ពីមន្ត្រីបម្រើការងារនៅក្រសួងមួយនេះ និងសាច់ញាតិរបស់ពួកគេ ត្រូវបានរកឃើញឆ្លងជំងឺកូវីដ១៩ជាបន្តបន្ទាប់។
លោក ស ខេង បានសម្រេចបែបនេះនៅក្នុងបទបញ្ជាមួយចេញនៅថ្ងៃនេះ ដែលលោកថា ធ្វើតាមអនុសាសន៍របស់លោកនាយករដ្ឋមន្ត្រី ហ៊ុន សែន។
លោក ស ខេង និយាយក្នុងបទបញ្ជានោះថា រូបលោកសម្រេចចេញបទបញ្ជា «ផ្អាកការចេញឬចូលបំពេញការងារជាបណ្ដោះអាសន្ននៅក្នុងបរិវេណទីស្ដីការក្រសួងមហាផ្ទៃ ចំពោះមន្ត្រីរាជការស៊ីវិល មន្ត្រីនគរបាលជាតិ និងមន្ត្រីពន្ធនាគារ នៅតាមអគ្គនាយកដ្ឋាននិងអង្គភាពនានាដែលមានទីតាំងស្ថិតក្នុងបរិវេណទីស្ដីការក្រសួងមហាផ្ទៃ ចាប់ពីថ្ងៃទី៧ ខែធ្នូ ឆ្នាំ២០២០នេះ រហូតដល់មានការជូនដំណឹងជាថ្មី»។
លោក ស ខេង បញ្ជាក់ក្នុងបទបញ្ជាថា សេចក្ដីសម្រេចរបស់លោក គឺដើម្បីទប់ស្កាត់ការឆ្លងរីករាលដាលនៃជំងឺកូវីដ១៩ ទៅដល់ថ្នាក់ដឹកនាំ មន្ត្រីរាជការស៊ីវិល មន្ត្រីនគរបាល និងមន្ត្រីពន្ធនាគារ។
រដ្ឋមន្ត្រីមហាផ្ទៃរូបនេះ ក៏បានណែនាំផងដែរទៅមន្ត្រីរាជការស៊ីវិល នគរបាលជាតិ និងមន្ត្រីពន្ធនាគារទាំងអស់ ដែលបម្រើការងារក្នុងបរិវេណក្រសួងមហាផ្ទៃ ឱ្យទៅផ្ដល់សំណាកសម្រាប់ពិនិត្យរកវីរុសកូរ៉ូណានៅថ្ងៃនេះក្នុងបរិវេណក្រសួង និងរក្សាខ្លួននៅដាច់ដោយឡែករយៈពេល១៤ថ្ងៃ។
រដ្ឋមន្ត្រីក្រសួងមហាផ្ទៃ បានសម្រេចបែបនេះ ក្រោយពីមន្ត្រីបម្រើការនៅស្ថាប័នមួយនេះ និងសាច់ញាតិរបស់ពួកគេ ត្រូវបានរកឃើញឆ្លងជំងឺកូវីដ១៩ជាបន្តបន្ទាប់ចាប់តាំងពីការផ្ទុះករណីឆ្លងក្នុងសហគមន៍លើកដំបូងកាលពីចុងខែវិច្ឆិកាកន្លងមកនេះ។
អគ្គនាយកពន្ធនាគារ លោក ឆែម សាវុធ គឺជាមន្ត្រីដំបូងគេនៅក្រសួងមហាផ្ទៃ ដែលត្រូវបានរកឃើញឆ្លងជំងឺកូវីដ១៩កាលពីចុងខែវិច្ឆិកា បន្ទាប់ពីភរិយារបស់លោកត្រូវបានរកឃើញឆ្លងជំងឺផ្លូវដង្ហើមនេះកាលពីថ្ងៃទី២៨ ខែវិច្ឆិកា។
មនុស្សដល់ទៅ៣២នាក់ហើយ ត្រូវបានរកឃើញឆ្លងជំងឺកូវីដ១៩ គិតចាប់តាំងពីផ្ទុះករណីឆ្លងក្នុងសហគមន៍មក៕
