ក្រសួងអប់រំសម្រេចលើកពេលប្រឡងថ្នាក់ជាតិហើយ ខណៈកម្ពុជាស្ថិតក្នុងក្ដីបារម្ភពីការឆ្លងរីករាលដាលនៃជំងឺកូវីដ១៩ ក្រោយផ្ទុះករណីឆ្លងក្នុងសហគមន៍។
ក្នុងសេចក្ដីជូនដំណឹងនៅថ្ងៃនេះ រដ្ឋមន្ត្រីក្រសួងអប់រំ យុវជន និងកីឡា លោក ហង់ជួន ណារ៉ុន បានប្រកាសថា ក្រសួងសម្រេចពន្យារពេលប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុប ដែលគ្រោងធ្វើនៅថ្ងៃទី២១ និងថ្ងៃទី២២ ខែធ្នូនេះ។
រដ្ឋមន្ត្រីក្រសួងអប់រំ លោក ហង់ជួន ណារ៉ុន បានបញ្ជាក់ក្នុងសេចក្ដីជូនដំណឹងនោះថា ក្រសួងសម្រេចបែបនេះទៅតាមអនុសាសន៍របស់លោកនាយករដ្ឋមន្ត្រី ហ៊ុន សែន។
ក្រសួងអប់រំបញ្ជាក់ថា ការប្រឡងថ្នាក់ជាតិមួយនេះនឹងលើកទៅពាក់កណ្ដាលខែមករាឆ្នាំក្រោយវិញ ប៉ុន្តែកាលបរិច្ឆេទជាក់លាក់ ក្រសួងថា នឹងជូនដំណឹងនៅពេលក្រោយ។
ក្រសួងអប់រំបានសម្រេចលើកពេលប្រឡងបាក់ឌុបនេះ ចំពេលដែលកម្ពុជាស្ថិតក្នុងក្ដីបារម្ភពីការឆ្លងរីករាលដាលនៃជំងឺកូវីដ១៩ បន្ទាប់ពីរកឃើញករណីឆ្លងក្នុងសហគមន៍កាលពីចុងខែវិច្ឆិកាកន្លងមកនេះ។
គិតត្រឹមថ្ងៃនេះ មនុស្ស៣២នាក់ហើយត្រូវបានរកឃើញឆ្លងជំងឺកូវីដ១៩ ពាក់ព័ន្ធនឹងករណីឆ្លងក្នុងសហគមន៍ដែលត្រូវបានរកឃើញកាលពីថ្ងៃទី២៨ ខែវិច្ឆិកា៕