ក្រសួងសុខាភិបាលបានប្រកាសពីការរកឃើញមនុស្ស២នាក់ទៀតឆ្លងជំងឺកូវីដ១៩ បន្ទាប់ពីពួកគេបានប្រាស្រ័យទាក់ទងនឹងមនុស្សដែលពាក់ព័ន្ធនឹងករណីឆ្លងក្នុងសហគមន៍។
ក្នុងសេចក្ដីប្រកាសព័ត៌មានរបស់ខ្លួននៅថ្ងៃនេះ ក្រសួងសុខាភិបាលនិយាយថា ករណីឆ្លងជំងឺកូវីដ១៩ថ្មីនេះ ត្រូវបានរកឃើញលើបុរសកម្ពុជា អាយុ២១ឆ្នាំ គឺជាអ្នកស្នាក់ជាមួយបុរសម្នាក់ដែលជាបុគ្គលិកបម្រើការនៅហាងលក់សម្លៀកបំពាក់ Pedro ស្ថិតក្នុងរាជធានីភ្នំពេញ។
ចំណែកស្ត្រីកម្ពុជា អាយុ២៩ឆ្នាំ ក្រសួងសុខាភិបាលបញ្ជាក់ថា គឺជាមន្ត្រីរាជការនៅក្រសួងមហាផ្ទៃ ដែលបានចូលហាងលក់សម្លៀកបំពាក់ Zendro ស្ថិតនៅក្នុងខណ្ឌបឹងកេងកង កាលពីថ្ងៃទី២៧ ខែវិច្ឆិកាកន្លងមក។
បើតាមក្រសួងសុខាភិបាល អ្នកជំងឺទាំងពីរនាក់នេះត្រូវបានដាក់ឱ្យស្ថិតក្រោមការព្យាបាលនៅមណ្ឌលសុខភាពចាក់អង្រែ ស្ថិតក្នុងរាជធានីភ្នំពេញ។
កម្ពុជាកំពុងស្ថិតក្នុងក្ដីបារម្ភពីការឆ្លងរីករាលដាលនៃជំងឺកូវីដ១៩ បន្ទាប់ពីករណីឆ្លងក្នុងសហគមន៍លើកដំបូងត្រូវបានក្រសួងសុខាភិបាលរកឃើញកាលពីថ្ងៃទី២៨ ខែវិច្ឆិកា។
រហូតមកដល់ថ្ងៃនេះ មនុស្ស៣២នាក់ហើយត្រូវបានរកឃើញឆ្លងជំងឺកូវីដ១៩ ដែលពាក់ព័ន្ធនឹងករណីឆ្លងក្នុងសហគមន៍កាលពីចុងខែមុននេះ។
មនុស្ស៣៤៨នាក់ហើយត្រូវបានរកឃើញឆ្លងជំងឺកូវីដ១៩ នៅក្នុងប្រទេសកម្ពុជា គិតចាប់តាំងពីចុងខែមករាមក ជាពេលដែលកម្ពុជារកឃើញករណីឆ្លងជំងឺកូវីដ១៩ លើកដំបូងទៅលើបុរសជនជាតិចិន៕