មេដឹកនាំគណបក្សនគរប្រជាធិបតេយ្យ លោក ចាន់ យ៉េត ត្រូវបានរដ្ឋាភិបាលសម្រេចដកចេញពីសមាជិកក្រុមប្រឹក្សាពិគ្រោះ និងផ្ដល់យោបល់ តែប៉ុន្មានថ្ងៃប៉ុណ្ណោះបន្ទាប់ពីមេដឹកនាំបក្សនេះ បានប្រកាសដកខ្លួនចេញពីដំណើរការដោះស្រាយវិវាទដីធ្លីមួយនៅខេត្តបន្ទាយមានជ័យ។
ក្នុងព្រះរាជក្រឹត្យចេញនៅថ្ងៃនេះ ព្រះមហាក្សត្រ សម្ដេចព្រះនរោត្ដម សីហមុនី បានត្រាស់បង្គាប់បញ្ចប់តំណែងលោក ចាន់ យ៉េត ដែលមានឋានៈស្មើទេសរដ្ឋមន្ត្រីនោះ ពីសមាសភាពឧត្ដមក្រុមប្រឹក្សាពិគ្រោះ និងផ្ដល់យោបល់។
ព្រះមហាក្សត្រត្រាស់បង្គាប់បញ្ចប់តំណែងមេដឹកនាំបក្សនយោបាយរូបនេះ ទៅតាមសំណើរបស់លោកនាយករដ្ឋមន្ត្រី ហ៊ុន សែន។
ការបញ្ចប់តំណែងលោក ចាន់ យ៉េត បានកើតឡើងត្រឹមតែ២ថ្ងៃប៉ុណ្ណោះ បន្ទាប់ពីលោកបានប្រកាសដកខ្លួនចេញពីដំណើរការដោះស្រាយវិវាទដីធ្លីមួយរវាងប្រជាពលរដ្ឋ២៣០គ្រួសារ នៅឃុំទួលពង្រ ស្រុកម៉ាឡៃ និងក្រុមហ៊ុនឯកជនមួយ។
លោក ចាន់ យ៉េត ប្រាប់វីអូឌីកាលពីថ្ងៃចន្ទកន្លងមកនេះថា លោកសម្រេចដកខ្លួនចេញ មន្ត្រីជាន់ខ្ពស់នៅទីស្ដីការគណៈរដ្ឋមន្ត្រី បានណែនាំលោកឱ្យឈប់លូកដៃក្នុងដំណើរការដោះស្រាយវិវាទដីធ្លីមួយនេះ។
លោក ចាន់ យ៉េត គឺជាសមាសភាពទី២ នៃឧត្ដមក្រុមប្រឹក្សាពិគ្រោះ និងផ្ដល់យោបល់ ដែលត្រូវបានរដ្ឋាភិបាលសម្រេចបញ្ចប់តំណែង បន្ទាប់ពីមេដឹកនាំគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង ដែលត្រូវបានរដ្ឋាភិបាលបញ្ចប់តំណែងកាលពីខែឧសភាកន្លងមកនេះ៕
