លោកនាយករដ្ឋមន្ត្រី ហ៊ុន សែន បានបញ្ជាក់នៅលើទំព័រហ្វេសប៊ុករបស់លោកកាលពីថ្ងៃម្សិលមិញថា សប្បុរសជននានាបានបរិច្ចាគថវិកាជាង៣០លានដុល្លារហើយ ត្រឹមតែ២ថ្ងៃប៉ុណ្ណោះក្រោយរដ្ឋាភិបាលប្រកាសឱ្យដឹងពីការស្វែងរកទិញវ៉ាក់សាំងប្រឆាំងនឹងជំងឺកូវីដ១៩។
លោក ហ៊ុន សែន បានរៀបរាប់ថា ការចូលរួមចំណែករបស់ប្រជាជនកម្ពុជាបែបនេះ មានទំហំធំធេង ដែលលោកចាត់ទុកជាខឿនដ៏រឹងមាំការពារសុខភាពរបស់ប្រជាជន។
មេដឹកនាំបក្សកាន់អំណាចរូបនេះ បានប្រកាសកាលពីថ្ងៃចន្ទកន្លងមកនេះថា លោកបានណែនាំទៅរដ្ឋមន្ត្រីក្រសួងសុខាភិបាល និង រដ្ឋមន្ត្រីក្រសួងសេដ្ឋកិច្ចនិងហិរញ្ញវត្ថុ ឱ្យជជែកអំពីការត្រៀមកញ្ចប់ថវិកាសម្រាប់បញ្ជាទិញវ៉ាក់សាំងប្រឆាំងនឹងជំងឺកូវីដ១៩។
លោកនាយករដ្ឋមន្ត្រីបញ្ជាក់ថា លោកបានណែនាំទៅរដ្ឋមន្ត្រីទាំងពីរឱ្យស្វែងរកជំនួយបន្ថែមពីដៃគូអភិវឌ្ឍន៍នានា ខណៈដែលកម្ពុជា«នៅក្រខ្វះថវិកា»សម្រាប់ទិញបន្ថែម។
លោក ហ៊ុន សែន បញ្ជាក់ថា រដ្ឋាភិបាលលោកមានបំណងទិញវ៉ាក់សាំងប្រឆាំងកូវីដ១៩ ចំនួន១លានដូស សម្រាប់ចាក់ជូនក្រុមមនុស្សអាទិភាព ដូចជា ក្រុមគ្រូពេទ្យ គ្រូបង្រៀន កងកម្លាំងប្រដាប់អាវុធ និងមន្ត្រីពន្ធនាគារ។
រដ្ឋាភិបាលកម្ពុជាបានបង្ហាញឱ្យឃើញនូវបំណងបញ្ជាទិញវ៉ាក់សាំងប្រឆាំងកូវីដ១៩ ចំពេលដែលប្រទេសនេះស្ថិតក្នុងក្ដីបារម្ភចំពោះការឆ្លងរីករាលដាលនៃជំងឺកូវីដ១៩នៅក្នុងសហគមន៍។
គិតមកដល់ថ្ងៃនេះ មនុស្ស៣៨នាក់ហើយ ត្រូវបានរកឃើញឆ្លងជំងឺកូវីដ១៩ ដែលពាក់ព័ន្ធនឹងករណីឆ្លងក្នុងសហគមន៍ដែលផ្ទុះឡើងកាលពីថ្ងៃទី២៨ ខែវិច្ឆិកាកន្លងមកនេះ៕