មេដឹកនាំគណបក្សដ៏តូចមួយដែលបាត់បង់តំណែងពីក្រុមប្រឹក្សាពិគ្រោះយោបល់របស់រដ្ឋាភិបាលនោះ ប្រាប់ថា លោកសប្បាយចិត្តចំពោះសេចក្ដីសម្រេចបែបនេះ ហើយលោកថា ករណីនេះកើតឡើងដោយកំហុសរបស់លោក។
ប្រធានគណបក្សនគរប្រជាធិបតេយ្យ លោក ចាន់ យ៉េត ត្រូវបានព្រះមហាក្សត្រសម្ដេចព្រះបរមនាថ នរោត្ដម សីហមុនី ត្រាស់បង្គាប់បញ្ចប់តំណែងពីសមាសភាពនៃក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃម្សិលមិញនេះ ទៅតាមសំណើរបស់លោកនាយករដ្ឋមន្ត្រី ហ៊ុន សែន។
ការដកតំណែងមេបក្សមួយនេះចេញពីក្រុមពិគ្រោះយោបល់របស់រដ្ឋាភិបាល បានកើតឡើងតែបីថ្ងៃប៉ុណ្ណោះបន្ទាប់ពីលោកបានប្រកាសដកខ្លួនពីដំណើរការដោះស្រាយទំនាស់ដីធ្លីមួយរវាងប្រជាពលរដ្ឋ២៣០គ្រួសារ នៅស្រុកម៉ាឡៃ ខេត្តបន្ទាយមានជ័យ និងក្រុមហ៊ុនឯកជនមួយ។
លោក ចាន់ យ៉េត ប្រាប់ថា លោកមិនអាក់អន់ចិត្តទៅនឹងការសម្រេចចិត្តបែបនេះទេ ហើយលោកប្រាប់ថា នេះគឺជាកំហុសរបស់លោក។
លោក ចាន់ យ៉េត ប្រាប់ថា៖ «ដោយសារតែខ្ញុំបានធ្វើបេសកកម្មដោយមិនបានធ្វើលិខិតបេសកកម្មចុះទៅតំបន់បឹងជង្រុក ស្រុកម៉ាឡៃ ខេត្តបន្ទាយមានជ័យ។ ដោយសារតែខ្ញុំឆកល្វែងត្រង់ចំណុចហ្នឹងឯង ក៏ប៉ុន្តែ ខ្ញុំក៏មិនអាក់អន់ចិត្តនឹងការដកតំណែងហ្នឹងដែរ។ ខ្ញុំសប្បាយចិត្តទៅវិញទេ»។
មេបក្សរូបនេះ អះអាងថា អនុប្រធាន និងអគ្គលេខាធិការបក្សរបស់លោក នឹងបន្តស្ថិតនៅជាសមាសភាពនៅក្នុងក្រុមប្រឹក្សាពិគ្រោះយោបល់របស់រដ្ឋាភិបាលនេះដដែល បើទោះជាលោកត្រូវបានដកតំណែងក្ដី។
នៅក្នុងឧត្ដមក្រុមប្រឹក្សាពិគ្រោះយោបល់ជាង១ឆ្នាំ លោក ចាន់ យ៉េត អះអាងថា ប្រតិភូគណបក្សរបស់លោក ដោះស្រាយជម្លោះដីធ្លីរបស់ប្រជាពលរដ្ឋបានប្រហែល៣០ករណី។
នៅក្នុងឧត្ដមក្រុមប្រឹក្សាមួយនេះ លោក ចាន់ យ៉េត មានឋានៈស្មើទេសរដ្ឋមន្ត្រី ដែលមានន័យថា លោកទទួលបានប្រាក់ខែជាង២លានរៀល ឬប្រហែលជាង៥០០ដុល្លារអាមេរិក។
លោក ចាន់ យ៉េត គឺជាអនុប្រធានគណបក្សសាធារណរដ្ឋប្រជាធិបតេយ្យ ដឹកនាំដោយប្រធានបក្ស អ្នកស្រី សុខរ័ត្ន សុវណ្ណបញ្ចៈសីលា។
អ្នកស្រី សុវណ្ណបញ្ចៈសីលា គឺជាអតីតសមាសភាពមួយនៃឧត្ដមក្រុមប្រឹក្សាមួយនេះ មានឋានៈស្មើទេសរដ្ឋមន្ត្រីដូចទៅនឹងមេដឹកនាំបក្សនយោបាយ១៤រូបទៀតផងដែរ។
អ្នកស្រី សុវណ្ណបញ្ចៈសីលា ត្រូវបានរដ្ឋាភិបាលដកហូតតំណែងពីក្រុមប្រឹក្សាពិគ្រោះយោបល់នៅខែមេសាឆ្នាំមុន មួយសប្ដាហ៍ក្រោយពីត្រូវបានសមត្ថកិច្ចចាប់ខ្លួនជុំវិញការចោទថា «បានបំផុសបំផុល» ប្រជាពលរដ្ឋឱ្យកាន់កាប់ដីស្ថិតក្នុងឧទ្យានជាតិគូលែនព្រហ្មទេព ខេត្តព្រះវិហារ។
លោក ចាន់ យ៉េត ប្រាប់ថា លោកបានក្លាយជាមេដឹកនាំបក្សសាធារណរដ្ឋប្រជាធិបតេយ្យ ហើយបន្ទាប់មក បក្សនេះបានប្ដូរឈ្មោះទៅជាគណបក្ស«នគរប្រជាធិបតេយ្យ»កាលពីខែតុលា ឆ្នាំ២០១៩កន្លងមក។
មុនចូលប្រឡូកក្នុងនយោបាយចាប់តាំងពីឆ្នាំ២០១១មក លោក ចាន់ យ៉េត ប្រាប់ថា លោកគឺជាអតីតទាហានខ្មែរក្រហមមួយរូបស្ថិតក្រោមបញ្ជាការរបស់លោក អ៊ី ឈាន អតីតមេទ័ពរបស់ក្រុមខ្មែរក្រហមនៅតំបន់ប៉ៃលិន ដែលក្រោយមក ត្រូវបានរដ្ឋាភិបាលលោក ហ៊ុន សែន តែងតាំងជាអភិបាលខេត្តប៉ៃលិន ចាប់តាំងពីឆ្នាំ២០០៣មក។
លោក ចាន់ យ៉េត ប្រាប់ថា៖ «ខ្ញុំមានស្រុកកំណើតនៅខេត្តបាត់ដំបង ជាកូនកំព្រា។ ខ្ញុំជាទាហានរហូត។ បើនិយាយទៅ ខ្ញុំជាទាហានប៉ារ៉ា [ក្រោមបញ្ជាការលោក សាក់ ស៊ុតសាខន] ខ្មែរក្រហម ទាហានខ្មែរ។ វាយគ្នាចុះឡើងៗ ខ្មែរក្រហមចាប់បាន ធ្វើជាទាហានខ្មែរក្រហម ជាអង្គរក្សវរសេនាធំ១៧ កងពល២២៥ របស់តា ឈាន»។
ក្រោយបញ្ចប់សង្គ្រាមស៊ីវិលនៅឆ្នាំ១៩៩៨ លោក ចាន់ យ៉េត បានក្លាយទៅជាកសិករ ហើយលោកថា គ្មានសមាជិកណាម្នាក់នៃគ្រួសាររបស់មានប្រវត្តិជាអ្នកនយោបាយទេ ប៉ុន្តែលោកប្រាប់ថា៖
«ក្រោយមក ខ្ញុំក៏ត្រូវបានចាត់តាំងឱ្យហ្វឹកហ្វឺននយោបាយ ឱ្យបង្កើតគណបក្សហ្នឹងឯង»។
លោក ចាន់ យ៉េត គឺជាមេបក្សទី៣ ដែលត្រូវបានរដ្ឋាភិបាលដកចេញពីឧត្ដមក្រុមប្រឹក្សាពិគ្រោះ និងផ្ដល់យោបល់ បន្ទាប់ពីអ្នកស្រី សុខរ័ត្ន សុវណ្ណបញ្ចៈសីលា និងប្រធានគណបក្សខ្មែរក្រោក លោក សុខសុវណ្ណ វឌ្ឍនាសាប៊ុង៕
