អ្នកនាំពាក្យក្រសួងសុខាភិបាល អ្នកស្រី ឱ វណ្ណឌីន បានឱ្យដឹងថា បុរសកម្ពុជាម្នាក់ដែលលោតចុះពីទីតាំងចត្តាឡីស័កក្នុងសណ្ឋាគារមួយនៅរាជធានីភ្នំពេញ កាលពីថ្ងៃម្សិលមិញនេះ មិនពាក់ព័ន្ធនឹងបញ្ហាកូវីដ១៩នោះឡើយ ដោយថា ជា«រឿងផ្ទាល់ខ្លួន»របស់បុរសរូបនោះ។
អ្នកស្រី វណ្ណឌីន បានប្រាប់ក្រុមអ្នកសារព័ត៌មានតាមបណ្ដាញសង្គមតេឡេក្រាមថា បុរសកម្ពុជាត្រូវបានបញ្ជូនទៅសង្គ្រោះនៅមន្ទីរពេទ្យមិត្តភាពខ្មែរ-សូវៀត កាលពីថ្ងៃម្សិលមិញនេះ បន្ទាប់ពីបុរសរូបនោះបានលោតពីទីតាំងចត្តាឡីស័កនៅក្នុងសណ្ឋាគារ ឡុង លីវ នៅក្នុងសង្កាត់ទន្លេបាសាក់ ខណ្ឌចំការមន។
អ្នកស្រី ឱ វណ្ណឌីន បានប្រាប់ថា បុរសកម្ពុជាម្នាក់នោះត្រូវបានដាក់ឱ្យធ្វើចត្តាឡីស័កនៅក្នុងសណ្ឋាគារតាំងពីថ្ងៃទី២ ខែធ្នូ ហើយលទ្ធផលតេស្តរបស់គាត់បញ្ជាក់ថា គាត់មិនមានឆ្លងវីរុសកូរ៉ូណានោះឡើយ។
អ្នកនាំពាក្យរូបនេះប្រាប់បន្តថា ក្រោយការសង្គ្រោះនៅមន្ទីរពេទ្យមិត្តភាពខ្មែរ-សូវៀត បុរសរូបនោះបានដឹងខ្លួននិងអាចនិយាយបានខ្លះ ប៉ុន្តែស្ថិតក្នុងសភាពធ្ងន់ធ្ងរនៅឡើយ។
អ្នកស្រី វណ្ណឌីន ឱ្យដឹងថា បុរសរូបនេះញៀនថ្នាំ ដែលបណ្ដាលឱ្យរវើរវាយ ហើយភ្លាត់ជើងធ្លាក់ចុះក្រោម។
អ្នកស្រីអះអាងបែបនេះ បន្ទាប់ពីបានសាកសួរសាម៉ីខ្លួន និងក្រោយការធ្វើតេស្តទឹកនោមរបស់បុរសនោះ ដែលរកឃើញមានសារធាតុញៀនអំហ្វេតាមីន។
មន្ត្រីជាន់ខ្ពស់ក្រសួងសុខាភិបាលរូបនេះ បញ្ជាក់ថា ករណីបុរសរូបនេះលោតពីទីតាំងចត្តាឡីស័ក មិនពាក់ព័ន្ធនឹងបញ្ហាកូវីដ១៩ទេ ប៉ុន្តែអ្នកស្រីថា ជា«រឿងផ្ទាល់ខ្លួន»៕