ផលិតកររឿង«ម្ដាយខ្ញុំលក់ខ្ញុំ» របស់ទូរទស្សន៍រុស្ស៊ី RT គឺលោក រ៉ាត់ រត្នមុនី ត្រូវបានដោះលែងឱ្យមានសេរីភាពវិញហើយនៅរសៀលថ្ងៃសុក្រនេះ ក្រោយលោកបានអនុវត្តទោសចប់រួចរាល់។
មេធាវីការពារក្ដីឱ្យលោក រ៉ាត់ រត្នមុនី គឺលោក សំ ទិត្យសីហា បានប្រាប់ VOD នៅរសៀលនេះថា លោក រ៉ាត់ រត្នមុនី ត្រូវបានតុលាការសម្រេចដោះលែងហើយ ក្រោយពីអនុវត្តទោសរួច។
លោកមានប្រសាសន៍ថា៖ «រហូតមកដល់ពេលនេះ ខ្ញុំអត់ទាន់ទទួលបានការជូនដំណឹងទេ! តែបើសិនជាយើងរាប់ពីថ្ងៃដែលចាប់ខ្លួនរហូតមកដល់ពេលនេះ គឺដល់ពេលដែលគាត់ត្រូវចេញ»។
លោក រ៉ាត់ រត្នមុនី បានប្រាប់ VOD តាមទូរសព្ទថា លោកត្រូវបានគេដោះលែងឱ្យមានសេរីភាពវិញនៅម៉ោង៣និង៣០នាទីរសៀល ថ្ងៃទី១១ ខែវិច្ឆិកានេះ។ លោកបន្ថែមថា លោកមានសេចក្ដីសប្បាយរីករាយជាខ្លាំង។
លោកថា៖ «ម៉ោងប្រហែលជា៣កន្លះ យើងចេញពីពន្ធនាគារមក ដល់ចេញមក យើងមកវត្តស្រោចទឹកស្រោចអីអ៊ីចឹងទៅ ដល់ស្រោចហើយ ឥលូវនេះ ខ្ញុំនៅផ្ទះប្អូនស្រីរបស់ខ្ញុំទៅ។ មុននេះបានជួបប៉ា ជួបម៉ាក់ ប៉ាក្មេក ប៉ាបង្កើតអីអ៊ីចឹងទៅណា! តែអត់បានជួបប្រពន្ធ មិនដឹងថាប្រពន្ធនៅឯណានៅឯណីទេ។ ហើយអារម្មណ៍នៅមិនទាន់ច្បាស់ថា នៅក្រៅឬក្នុង [ឃុំ] នៅឡើយទេ តែថា សប្បាយចិត្តឥលូវនេះ»។
លោក រ៉ាត់ រត្នមុនី ត្រូវសមត្ថកិច្ចថៃចាប់ឃាត់ខ្លួននៅទីក្រុងបាងកក កាលពីថ្ងៃទី០៧ ខែធ្នូ ឆ្នាំ២០១៨ ខណៈលោកព្យាយាមសុំសិទ្ធិជ្រកកោននៅឯការិយាល័យសុំទិដ្ឋាការទៅប្រទេសហូឡង់ នៅប្រទេសថៃ។
សាលាដំបូងរាជធានីភ្នំពេញ បានសម្រេចផ្តន្ទាទោសលោកឱ្យជាប់ពន្ធនាគារចំនួន២ឆ្នាំ ក្រោមបទចោទ «ញុះញង់ឱ្យមានការរើសអើង» កាលពីថ្ងៃទី២៦ ខែមិថុនា តាមការចោទប្រកាន់របស់ដើមបណ្តឹងចំនួន៥នាក់ គឺលោក នាក់ សុទ្ធី នាយកសាលាឥន្ទ្រទេវី, កញ្ញា គៀង ស្រីម៉េច, កញ្ញា លឹម ស្រីទី, អ្នកស្រី ទេព សាលីម និងអ្នកស្រី កែវ ម៉ាឡៃ៕
