កម្ពុជាបានរកឃើញពលរដ្ឋកម្ពុជាម្នាក់ទៀតឆ្លងជំងឺកូវីដ១៩ ដែលជាប់ពាក់ព័ន្ធនឹងករណីឆ្លងក្នុងសហគមន៍កើតឡើងកាលពីចុងខែវិច្ឆិកាកន្លងមកនេះ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលបានឱ្យដឹងថា ករណីឆ្លងថ្មីនេះត្រូវបានរកឃើញលើស្ត្រីកម្ពុជា អាយុ២៦ឆ្នាំ ដែលស្នាក់នៅក្នុងខណ្ឌដូនពេញ ហើយបច្ចុប្បន្ននេះ ស្ត្រីរូបនេះត្រូវបានដាក់ឱ្យស្ថិតក្រោមការព្យាបាលនៅមន្ទីរពេទ្យមិត្តភាពខ្មែរ-សូវៀត។
ក្រសួងបានឱ្យដឹងទៀតថា ស្ត្រីរូបនេះគឺជាមិត្តភក្តិនឹងបុរសកម្ពុជា អាយុ៣៥ឆ្នាំ ដែលត្រូវបានរកឃើញឆ្លងកូវីដ១៩ កាលពីថ្ងៃអង្គារកន្លងមកនេះ បន្ទាប់ពីបានធ្វើដំណើរទៅហាងលក់សម្លៀកបំពាក់ Zando កាលពីថ្ងៃទី២៧ ខែវិច្ឆិកា។
កម្ពុជាបានរកឃើញមនុស្សដល់ទៅ៤០នាក់ហើយត្រូវបានរកឃើញឆ្លងជំងឺកូវីដ១៩ ចាប់តាំងពីផ្ទុះករណីឆ្លងក្នុងសហគមន៍កាលពីថ្ងៃទី២៨ ខែវិច្ឆិកាកន្លងមកនេះ។
គិតមកដល់ថ្ងៃនេះ មនុស្សដល់ទៅ៣៥៧នាក់ហើយត្រូវបានរកឃើញឆ្លងជំងឺកូវីដ១៩នៅក្នុងប្រទេសកម្ពុជា គិតចាប់តាំងពីចុងខែមករាដើមឆ្នាំនេះមក ហើយក្រសួងនិយាយថា អ្នកជំងឺសរុប៣០៧នាក់ ត្រូវបានព្យាបាលជាសះស្បើយ ខណៈអ្នកជំងឺ៥០នាក់ទៀតកំពុងស្ថិតក្រោមការព្យាបាលបន្ត ក្នុងនោះ ៣៧នាក់នៅមន្ទីរពេទ្យមិត្តភាពខ្មែរ-សូវៀត៕