រដ្ឋាភិបាលអាល្លឺម៉ង់ បានផ្ដល់កម្ចីទំហំ៣០លានអឺរ៉ូ ឬប្រហែលជាង៣៦,៤លានដុល្លារ សម្រាប់គម្រោងអភិវឌ្ឍន៍ថាមពលរបស់ប្រទេសកម្ពុជា។
ការសម្រេចបែបនេះ ត្រូវបានប្រកាសឱ្យដឹងនៅក្នុងសេចក្ដីប្រកាសព័ត៌មាននៅថ្ងៃនេះរបស់ស្ថានទូតអាល្លឺម៉ង់ប្រចាំនៅរាជធានីភ្នំពេញ។
ស្ថានទូតអាល្លឺម៉ង់ បាននិយាយថា ឥណទានដែលមានអត្រាការប្រាក់សម្បទានខ្ពស់នេះ នឹងជួយធ្វើឱ្យប្រសើរឡើងនិងពង្រីកបណ្ដាញបញ្ជូនអគ្គិសនីនៅតាមជនបទរបស់កម្ពុជា ដែលមានគោលដៅកាត់បន្ថយការបំភាយឧស្ម័នផ្ទះកញ្ចក់ និងឈានទៅសម្រេចទៅតាមការសន្យារបស់ប្រទេសនេះថា នឹងទទួលបានថាមពលប្រើប្រាស់ជាសកលនៅត្រឹមឆ្នាំ២០៣០ខាងមុខ។
អគ្គរដ្ឋទូតអាល្លឺម៉ង់ប្រចាំកម្ពុជា លោក Christian Berger ត្រូវបានដកស្រង់សម្ដីនៅក្នុងសេចក្ដីប្រកាសព័ត៌មាននោះថា បណ្ដាញថាមពលកាន់តែប្រសើរ គឺល្អប្រសើរសម្រាប់ប្រជាជន ល្អសម្រាប់សេដ្ឋកិច្ច និងសម្រាប់ភពផែនដី។
លោក Christian Berger និយាយថា៖ «គោលដៅនៃការវិនិយោគរបស់អាល្លឺម៉ង់ គឺការទទួលបានអគ្គិសនីប្រើប្រាស់ប្រសើរជាងមុន ថាមពលមានតម្លៃទាបជាងមុន ការផ្គត់ផ្គង់ថាមពលដែលអាចទុកចិត្តបានជាងមុន និងការភាយចេញឧស្ម័នផ្ទះកញ្ចក់តិចជាងមុន»។
ស្ថានទូតអាល្លឺម៉ង់ និយាយថា កម្ចីទំហំ៣០លានអឺរ៉ូនេះ គឺជាផ្នែកមួយនៃកម្ចី៦០លានអឺរ៉ូដែលរដ្ឋាភិបាលអាល្លឺម៉ង់បានសន្យាផ្ដល់មកកម្ពុជាកាលពីឆ្នាំ២០១៨ ប៉ុន្តែថា អត្រាការប្រាក់សម្រាប់កម្ចីទំហំ៣០លានអឺរ៉ូនេះ នឹងត្រូវបានកាត់បន្ថយ។
បើតាមស្ថានទូតអាល្លឺម៉ង់ ការវិនិយោគកាលពីឆ្នាំ២០១៨កន្លងមក បានជួយកាត់បន្ថយការបំភាយឧស្ម័នផ្ទះកញ្ចក់បាន២ម៉ឺនតោនក្នុងមួយឆ្នាំ ការបញ្ជូនថាមពលសុទ្ធកើនឡើង២០ភាគរយ ហើយជួយឱ្យពលរដ្ឋកម្ពុជា ចំនួន១ម៉ឺន៥ពាន់គ្រួសារថែមទៀតទទួលបានថាមពលអគ្គិសនីប្រើប្រាស់។
ស្ថានទូតអាល្លឺម៉ង់បញ្ជាក់ថា រដ្ឋាភិបាលមហាអំណាចសេដ្ឋកិច្ចតំបន់អឺរ៉ុបមួយនេះ ក៏បានផ្ដល់ថវិកា៩,៥លានអឺរ៉ូ ឬជាង១១,៥លានដុល្លារ សម្រាប់កម្ពុជាឆ្លើយតបនឹងកូវីដ១៩ផងដែរនៅឆ្នាំនេះ៕