ប្រជាសហគមន៍នៅក្នុងខេត្តកំពង់ឆ្នាំង បានស្វែងរកកិច្ចអន្តរាគមន៍ពីអាជ្ញាធរឱ្យចាត់វិធានការលើអ្នកដែលកាប់ឈើនៅទីទួលប្រាសាទបុរាណ និងជាតំបន់អភិរក្សទៅតាមច្បាប់ ហើយទប់ស្កាត់កុំឱ្យបទល្មើសរបៀបនេះកើតឡើងទៀត។
ប្រជាសហគមន៍អះអាងថា មានករណីកាប់ដើមឈើនៅតំបន់ទួលប្រាសាទបុរាណ និងជាកន្លែងអភិរក្សនៅភូមិឡពាង ឃុំតាជេស ស្រុកកំពង់ត្រឡាច កាលពីថ្ងៃទី៨ ខែធ្នូ ប៉ុន្តែរហូតដល់ថ្ងៃទី១៥ ខែធ្នូ នៅមិនទាន់មានចំណាត់ការអ្វីនៅឡើយនោះទេ។
សកម្មជនអភិរក្សធនធានធម្មជាតិនៃសហគមន៍ឡពាង និងជាគណៈកម្មការសាលាបុណ្យប្រាសាទទួលក្រសាំង លោក ស្ងួន ញឿន បានឱ្យដឹងថា លោកបានជូនដំណឹងទៅកាន់អាជ្ញាធរពីការកាប់ដើមឈើនៅសហគមន៍អភិរក្សឡពាង ប៉ុន្តែលោកថា មិនទាន់មានចំណាត់ការអ្វីនោះទេ។
លោកថា៖ «មកដល់ពេលនេះមិនទាន់ឃើញអាជ្ញាធរណាឆ្លើយតបទេ ជនល្មើសនៅតែប្រព្រឹត្តដដែល គាត់កាប់អស់៣ដើមហើយមកដល់ពេលហ្នឹង ហើយគាត់[ជនល្មើស]ថា នឹងកាប់ទាល់តែអស់ព្រៃឈើហ្នឹង។ ខ្ញុំអស់សង្ឃឹមមែនទែន ព្រោះប្រជាពលរដ្ឋពឹងលើអាជ្ញាធរ ប៉ុន្តែអាជ្ញាធររាយការណ៍ឱ្យទៅបង្ក្រាបបទល្មើសទាំងអស់ហ្នឹង បែរជាគាត់មិនទៅរាយការណ៍ឬក៏មិនទៅបង្ក្រាប ហើយអត់មានធ្វើលិខិតហាមឃាត់អីទាល់តែសោះ។ ខ្ញុំអស់សង្ឃឹមមែនទែនដែលគេកាប់ព្រៃឈើ ហើយអាជ្ញាធរឱបដៃឈរមើល»។
លោកបញ្ជាក់ថា កាលពីឆ្នាំ២០១៣ លោក ប៉ែន ងំ ប្រគល់ដី៤០ម៉ែត្របួនជ្រុងដាក់បញ្ចូលក្នុងដីអភិរក្សរបស់សហគមន៍ ប៉ុន្តែក្រោយពេលលោក ប៉ែន ងំ ស្លាប់បាត់ កូនរបស់លោកឈ្មោះ ឌុច តារា បន្តចូលកាប់ឈើនៅទីនោះ ដោយអះអាងថា ជាកម្មសិទ្ធិរបស់ខ្លួន។ ប៉ុន្តែខាងប្រជាសហគមន៍អះអាងថា ដើមឈើនិងរបស់ផ្សេងទៀតនៅលើដីនោះក្លាយជារបស់សហគមន៍ហើយ។
ប្រធានសហគមន៍បរិស្ថានធម្មជាតិឡពាង អ្នកស្រី អ៊ុំ សុភី ថ្លែងថា អ្នកស្រីសោកស្តាយចំពោះការកាប់ដើមឈើដែលប្រជាសហគមន៍ខំថែរក្សានេះ។
អ្នកស្រីថា៖ «គាត់អត់គិតនូវប្រយោជន៍រួម គាត់អត់ស្រឡាញ់ធម្មជាតិរបស់ដែលយើងខំប្រឹងថែរក្សាតាំងពីតូចរហូតដល់ធំៗប៉ុណ្ណឹង គាត់កាប់ដោយមិនសុំអ្នកណា ដោយឯកភាពតែខ្លួនឯង»។
អ្នកស្រី សុភី សំណូមពរឱ្យក្រសួងស្ថាប័នពាក់ព័ន្ធដែលរួមមាន ក្រសួងបរិស្ថាន និងក្រសួងវប្បធម៌ ចុះមកត្រួតពិនិត្យនិងដាក់«ព្រៃសហគមន៍ឡពាង»ចូលទៅក្រោមការគ្រប់គ្រងរបស់ក្រសួង ដើម្បីការពារកុំឱ្យជនល្មើសមកប្រព្រឹត្តបទល្មើសផ្សេងៗទៀត ព្រោះទីនោះជាទីតាំងប្រាសាទបុរាណនិងជាកន្លែងអភិរក្សធនធានធម្មជាតិ។
ពាក់ព័ន្ធនឹងបញ្ហានេះ លោក ឌុច ប៊ុនហេង ប្រធានភូមិឡពាង ថ្លែងថា លោកមិនមានសិទ្ធិក្នុងការហាមឃាត់មិនឱ្យកាប់ទេ ព្រោះនៅក្នុងកិច្ចសន្យាសម្បទានរបស់លោក ប៉ែន ងំ ដែលជាឪពុករបស់បុរសកាប់ (ឌុច តារា) ឈើនោះ មិនមានដាក់បញ្ចូលដើមឈើទេ។
លោកបញ្ជាក់ថា៖ «ខ្ញុំបានទាមទារសុំមើលកិច្ចសន្យាកាលមេភូមិមុនគេធ្វើ បើសិនជាមេភូមិមុនគេធ្វើ គេដាក់លក្ខខណ្ឌថា ឯកសារណាមួយសម្បទានដី៤០ម៉ែត្របួនជ្រុង ទាំងដើមឈើមានប៉ុន្មានដើមហ្នឹងទុកឱ្យប្រើប្រាស់ជារួម អាហ្នឹងគាត់ជាម្ចាស់សម្បទានក៏អត់មានសិទ្ធិកាប់ដែរ។ ការសម្បទានរបស់គាត់ មិនមានដាក់ដើមឈើចូលជាមួយដីទេ គាត់សម្បទានតែដីទេ»។
ចំណែកឯលោក នួន ស៊ន មេឃុំតាជេស បានឱ្យដឹងថា មកទល់ពេលនេះ លោកមិនទាន់បានទទួលដំណឹងអ្វីពីការកាប់ដើមឈើនោះនៅឡើយទេ។
លោកថា៖ «ខ្ញុំអត់ដឹងដែរ អត់មានឃើញឱ្យដំណឹងអីមកផង រឿងដើមឈើដើមព្រៃហ្នឹង»។
លោក ស្ងួន ញឿន បញ្ជាក់ថា សហគមន៍អភិរក្សធនធានធម្មជាតិនេះ ត្រូវបានបង្កើតឡើងតាំងពីឆ្នាំ២០១០ ដោយមានគណៈកម្មការចំនួន៣០នាក់ ដើម្បីថែរក្សាសម្បត្តិធម្មជាតិ ដូចជា ត្រី ព្រៃឈើ និងធនធានធម្មជាតិផ្សេងៗទៀត។
លោកបន្តថា នៅឆ្នាំ២០១៣ លោក ប៉ែន ងំ បានសម្បទានដីទីទួលប្រាសាទនោះឱ្យមកសហគមន៍ដើម្បីធ្វើជាសាលាបុណ្យ និងអភិរក្សធនធានធម្មជាតិ ដោយបានធ្វើលិខិតស្នាមជាលាយលក្ខណ៍អក្សរនិងស្នាមមេដៃផងដែរ៕
អត្ថបទដោយ ប៉ា តុងចិន