ក្រសួងកសិកម្ម ឱ្យដឹងថា មានក្រុមហ៊ុនមួយគ្រោងចុះកិច្ចសន្យាធានាទិញបន្លែសុវត្ថិភាពពីកសិករឈ្មោះ តៃ សុង នៅស្រុកស្អាង ខេត្តកណ្តាល ក្រោយពីកសិករមួយចំនួនបានត្អូញត្អែរថាបន្លែរបស់ពួកគាត់ប្រឈមនឹងការឈូសចោល ដោយសារគ្មានទីផ្សារ។
កាលពីថ្ងៃទី១១ ខែធ្នូ ថ្មីៗនេះ កសិករដាំបន្លែសាលាដមួយចំនួនរស់នៅឃុំទឹកវិល ស្រុកស្អាង ខេត្តកណ្តាល ក្នុងនោះក៏មានលោក តៃ សុង បានត្អូញត្អែរថា បន្លែរបស់ពួកគាត់ប្រឈមនឹងការឈូសចោលក្នុងរយៈពេលប៉ុន្មានថ្ងៃខាងមុខនេះ បើសិននៅតែពុំមានទីផ្សារសម្រាប់លក់ ស្របពេលដែលកម្ពុជាកំពុងជួបបញ្ហាជំងឺកូវីដ១៩ និងការនាំចូលបន្លែពីប្រទេសជិតខាងច្រើន។
ជាការឆ្លើយតប អគ្គនាយកដ្ឋានកសិកម្ម នៃក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១៥ ខែធ្នូ ឆ្នាំ២០២០នេះ បានចេញសេចក្តីប្រកាសព័ត៌មានមួយថា ដោយសារតែលោក តៃ សុង មិនបានចូលរួមអនុវត្តតាមគោលការណ៍ស្តង់ដារបន្លែសុវត្ថិភាព និងមិនបានចូលរួមក្នុងបណ្តុំអាជីវកម្មឬសហគមន៍អាជីវកម្ម ទើបធ្វើឱ្យបន្លែរបស់គាត់ពិបាករកទីផ្សារ។
ក្រសួងបន្តថា ស្របពេលគ្នានេះដែរ កសិករជាច្រើនបានងាកទៅដាំដុះសាលាដក្នុងពេលតែមួយ ដែលបណ្ដាលឱ្យបរិមាណសាលាដកើនឡើងលើសតម្រូវការទីផ្សារ ស្របពេលដែលកម្ពុជាកំពុងជួបបញ្ហាជំងឺកូវីដ១៩ ធ្វើឱ្យតម្លៃបន្លែមានការធ្លាក់ចុះ។
ដើម្បីដោះស្រាយបញ្ហានេះ ក្រសួងថា ក្រុមហ៊ុន TROPICAM បានជួបជាមួយលោក តៃ សុង ដើម្បីពិភាក្សាអំពីកិច្ចសន្យាធានាការទិញបន្លែសុវត្ថិភាពដែលផលិតបាននៅឆ្នាំ២០២១។
សេចក្តីប្រកាសព័ត៌មានរបស់ក្រសួង បញ្ជាក់ដែរថា អគ្គនាយកដ្ឋានកសិកម្ម សហការជាមួយមន្ទីរកសិកម្ម រុក្ខាប្រមាញ់ និងនេសាទរាជធានី-ខេត្ត បាននិងកំពុងអភិវឌ្ឍបន្លែសុវត្ថិភាពតាមស្តង់ដារការអនុវត្តកសិកម្មល្អ ជំរុញការចងក្រងបណ្ដុំអាជីវកម្មផលិតបន្លែ និងសហការជាមួយវិស័យឯកជនដើម្បីអនុវត្តកសិកម្មតាមកិច្ចសន្យា។
ក្រសួងក៏បានអំពាវនាវដល់ប្រជាកសិករទាំងអស់ចូលរួមដាំដុះបន្លែតាមស្តង់ដារសុវត្ថិភាព ចូលរួមក្នុងបណ្តុំអាជីវកម្មផលិតបន្លែ និងប្រើប្រាស់ប្រព័ន្ធអនឡាញ «CAMAgriMarket App» ដើម្បីងាយស្រួលក្នុងការរៀបចំផែនការផលិតកម្មតាមប្រភេទបន្លែ តាមរដូវកាលដាំដុះ និងឆ្លើយតបតាមតម្រូវការទីផ្សារ ដោយអនុវត្តកសិកម្មតាមកិច្ចសន្យាជាមួយវិស័យឯកជន ដើម្បីធានាគុណភាព សុវត្ថិភាព និងនិរន្តរភាពទីផ្សារ៕
