ក្រសួងសុខាភិបាលបានអំពាវនាវទៅពលរដ្ឋដែលធ្លាប់បានចូលហាងកាហ្វេ Hidden Coffee នៅក្នុងសង្កាត់ទឹកថ្លា ឱ្យទៅធ្វើតេស្តនិងរក្សាខ្លួននៅដាច់ដោយឡែក បន្ទាប់ពីអ្នកជំងឺកូវីដ១៩ម្នាក់បានចូលទៅហាងកាហ្វេមួយនេះ មុនរកឃើញឆ្លងវីរុសកូរ៉ូណា។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលនិយាយថា អ្នកជំងឺកូវីដ១៩ម្នាក់បានទៅអង្គុយពិសាកាហ្វេនៅហាងកាហ្វេ Hidden Coffee ស្ថិតនៅតាមបណ្ដោយផ្លូវ២០០២ ក្នុងសង្កាត់ទឹកថ្លា ខណ្ឌសែនសុខ នៅវេលាម៉ោង៣កន្លះ ថ្ងៃទី៤ ខែធ្នូកន្លងមកនេះ។
បើតាមក្រសួងសុខាភិបាល អ្នកជំងឺកូវីដ១៩រូបនោះបានធ្វើដំណើរទៅកាន់ហាងនោះ មុនពេលដែលរូបគេត្រូវបានធ្វើតេស្តរកឃើញឆ្លងជំងឺកូវីដ១៩។
ក្រសួងសុខាភិបាលបានជំរុញទៅអ្នកដែលធ្លាប់ចូលហាងកាហ្វេនេះនៅថ្ងៃនោះ ចន្លោះពីម៉ោង៣កន្លះទៅដល់ម៉ោង៤ ឱ្យទៅធ្វើតេស្តសុខភាពនៅវិទ្យាស្ថានជាតិសុខភាពសាធារណៈ និងធ្វើចត្តាឡីស័កឬរក្សាខ្លួនឯងនៅដាច់ដោយឡែកនៅតាមផ្ទះរៀងៗខ្លួនរយៈពេល១៤ថ្ងៃ៕