ក្រសួងសុខាភិបាលបានប្រកាសថា អ្នកជំងឺកូវីដ១៩ ចំនួន៧នាក់ ត្រូវបានព្យាបាលជាសះស្បើយ ក្នុងនោះមានអ្នកជំងឺ៥នាក់ដែលពាក់ព័ន្ធនឹងករណីឆ្លងក្នុងសហគមន៍ផងដែរ ខណៈដែលមិនមានករណីឆ្លងថ្មីត្រូវបានរកឃើញនោះ។
ក្នុងសេចក្ដីប្រកាសព័ត៌មាននៅថ្ងៃនេះ ក្រសួងសុខាភិបាលនិយាយថា ស្ត្រីជនជាតិខ្មែរ-អាមេរិកអាយុ៦២ឆ្នាំ និងបុរសជនជាតិអាមេរិក អាយុ៤២ឆ្នាំ ដែលជាអ្នកដំណើរមកពីបរទេសនោះ ត្រូវបានអនុញ្ញាតឱ្យចាកចេញពីមន្ទីរពេទ្យមិត្តភាពខ្មែរ-សូវៀតហើយ ក្រោយពីត្រូវបានព្យាបាលជាសះស្បើយពីជំងឺកូវីដ១៩។
ក្រសួងក៏បានប្រកាសឱ្យដឹងផងដែរថា អ្នកជំងឺកូវីដ១៩ចំនួន៥នាក់ដែលបានឆ្លងវីរុសនេះ ក្រោយពាក់ព័ន្ធនឹងករណីឆ្លងក្នុងសហគមន៍២៨វិច្ឆិកានោះ ត្រូវបានព្យាបាលជាសះស្បើយ។
បើតាមក្រសួង អ្នកជាសះស្បើយទាំង៥នាក់ មានកុមារាម្នាក់អាយុ១២ឆ្នាំ ដែលជាចៅរបស់លោក ឆែម សាវុធ អគ្គនាយកពន្ធនាគារនៃក្រសួងមហាផ្ទៃ, បុរសជនជាតិខ្មែរ អាយុ៣៦ឆ្នាំ ដែលជាអ្នកបើកបររថយន្តឱ្យលោក ឆែម សាវុធ, បុរសជនជាតិខ្មែរអាយុ៣០ឆ្នាំ ជាជំនួយការរបស់លោក ឆែម សាវុធ, ស្ត្រីជនជាតិខ្មែរ អាយុ៣៦ឆ្នាំ ដែលជាភរិយារបស់អនុប្រធាននាយកដ្ឋានពន្ធនាគារ និងបុរសជនជាតិខ្មែរ អាយុ២២ឆ្នាំ ជាបុគ្គលិកហាងលក់សម្លៀកបំពាក់ Pedro។
ទន្ទឹមគ្នានេះ ក្រសួងប្រកាសថា មិនមានអ្នកឆ្លងថ្មីទេនៅថ្ងៃនេះ បន្ទាប់ពីសំណាក់មកពីមនុស្ស៩១៨នាក់ នៅក្នុងចំណោមសំណាកយកពីមនុស្សសរុប១ ១៣៦នាក់នៅក្នុងរយៈពេល២ថ្ងៃកន្លងមកនេះ ត្រូវបានធ្វើតេស្តហើយ ដោយលទ្ធផលអវិជ្ជមានទាំងអស់។
គិតមកដល់ថ្ងៃនេះ មនុស្សដល់ទៅ៣៦២នាក់ហើយត្រូវបានរកឃើញឆ្លងជំងឺកូវីដ១៩ ក្នុងនោះមនុស្ស៤១នាក់បានឆ្លងជំងឺនេះពាក់ព័ន្ធនឹងករណីឆ្លងក្នុងសហគមន៍២៨វិច្ឆិកា។
ប៉ុន្តែក្រសួងសុខាភិបាលបញ្ជាក់ថា អ្នកជំងឺកូវីដ១៩ ចំនួន៣១៩នាក់ហើយត្រូវបានព្យាបាលជាសះស្បើយ ក្នុងនោះអ្នកជំងឺកូវីដ១៩ ចំនួន៨នាក់ ដែលពាក់ព័ន្ធនឹងករណីឆ្លងក្នុងសហគមន៍៕