ធនាគារពិភពលោកបានព្យាករថា សេដ្ឋកិច្ចកម្ពុជានឹងងើបឡើងវិញនៅឆ្នាំក្រោយនេះ បន្ទាប់ពីបានរងគ្រោះយ៉ាងធ្ងន់ធ្ងរដែលបណ្ដាលមកពីការរាតត្បាតជំងឺកូវីដ១៩ជាសកលនៅឆ្នាំនេះ។
ក្នុងសេចក្ដីប្រកាសព័ត៌មានរបស់ខ្លួន ធនាគារពិភពលោកបាននិយាយថា សេដ្ឋកិច្ចកម្ពុជានៅឆ្នាំនេះត្រូវបានព្យាករថា នឹងថមថយដក២ភាគរយ ប៉ុន្តែថា មានសញ្ញាជាច្រើនបង្ហាញពីការងើបឡើងវិញនៃសេដ្ឋកិច្ចនៅឆ្នាំក្រោយនេះ។
បើតាមរបាយការណ៍របស់ធនាគារពិភពលោក សេដ្ឋកិច្ចកម្ពុជាត្រូវបានព្យាករថា នឹងមានកំណើនឡើងវិញជិត៤ភាគរយនៅឆ្នាំ២០២១ខាងមុខ។
ស្ថានភាពសេដ្ឋកិច្ចកម្ពុជានៅឆ្នាំក្រោយ ត្រូវបានធនាគារពិភពលោកព្យាករបែបនេះ បន្ទាប់ពីកម្ពុជាបានបន្ធូរបន្ថយខ្លះៗនូវការអនុវត្តវិធានការសុវត្ថិភាពសង្គម ដែលជំរុញឱ្យសកម្មភាពសេដ្ឋកិច្ចក្នុងស្រុកវិលទៅរកប្រក្រតីភាពឡើងវិញ។
ធនាគារមួយនេះនិយាយទៀតថា ការព្យាករស្ថានភាពបែបនេះ ក្រោយពីបានឃើញអន្តរាគមន៍របស់រដ្ឋាភិបាលកម្ពុជា ជួយទ្រទ្រង់ឱ្យទំនិញសម្រាប់បរិភោគនិងប្រើប្រាស់មានស្ថិរភាព ហើយអាចគ្រប់គ្រងកម្រិតអតិផរណាបាន។
ទស្សនវិស័យវិជ្ជមានសម្រាប់សេដ្ឋកិច្ចកម្ពុជានៅឆ្នាំក្រោយនេះ ធនាគារពិភពលោកថា ក៏ដោយសារតែមើលឃើញលំហូរទុនវិនិយោគផ្ទាល់ពីបរទេស (FDI) ចូលក្នុងឧស្សាហកម្មមិនមែនកាត់ដេរ និងវិស័យកសិកម្ម បន្តមានកំណើន ព្រោះតែកិច្ចព្រមព្រៀងសេរីដែលកម្ពុជាបានឯកភាពជាមួយប្រទេសមួយចំនួន។
បើតាមធនាគារពិភពលោក វិស័យនាំចេញរបស់កម្ពុជាជារួម បានរងគ្រោះធ្ងន់ដោយសារតែវិបត្តិសុខភាពសកល ប៉ុន្តែការនាំចេញកង់ គ្រឿងបង្គុំអេឡិចត្រូនិចនិងយានយន្ត និងសម្ភាររួមផ្សំ បន្តកើនឡើង។
ខណៈដែលវិស័យទេសចរណ៍ក្នុងស្រុកបានជួយគាំទ្រខ្លះៗដល់ដំណើរងើបឡើងវិញនៃសេដ្ឋកិច្ចកម្ពុជានោះ ធនាគារមួយនេះនិយាយថា ការនាំចេញអង្ករនិងផលិតផលកសិកម្មបន្តមានកំណើនដដែល៕