អាជ្ញាធរខេត្តឧត្ដរមានជ័យ បានប្រាប់ឱ្យដឹងថា ពលករកម្ពុជា៣១នាក់ក្នុងចំណោមពលករកម្ពុជាជិត២០០នាក់ ត្រូវបានបញ្ជូនទៅមណ្ឌលចត្តាឡីស័កចំនួន២នៅក្នុងខេត្តនេះនៅថ្ងៃនេះ បន្ទាប់ពីពួកគេបង្ហាញអាការមួយចំនួនដែលត្រូវបានសង្ស័យថា អាចឆ្លងវីរុសកូរ៉ូណា ក្រោយពីពួកគេវិលត្រឡប់ពីប្រទេសថៃចូលមកដល់កម្ពុជា។
អភិបាលរងខេត្តឧត្ដរមានជ័យ លោក លឹម សុខតូ បានប្រាប់វីអូឌីថា ពលករនិងពលរដ្ឋកម្ពុជា១៧៦នាក់បានវិលត្រឡប់មកកម្ពុជាតាមច្រកព្រំដែនអន្តរជាតិអូរស្មាច់នៅថ្ងៃនេះ ដែលចំនួននេះច្រើនជាងចំនួនពលករកម្ពុជា១៤៨នាក់ដែលបានវិលត្រឡប់មកវិញតាមច្រកអូរស្មាច់ និងច្រកព្រំដែនអន្តរជាតិជាំ កាលពីថ្ងៃម្សិលមិញនេះ។
លោក សុខតូ បានឱ្យដឹងថា ពលករចំណាកស្រុកកម្ពុជា៣១នាក់ក្នុងចំណោមនោះ ត្រូវបានត្រួតពិនិត្យដោយមន្ត្រីសុខាភិបាល ហើយបញ្ជូនទៅដាក់ដាច់ដោយឡែកឬធ្វើចត្តាឡីស័កនៅមន្ទីរពេទ្យបង្អែកខេត្តនិងផ្ទះសំណាក់មួយកន្លែងនៅខេត្តនេះ បន្ទាប់ពីពួកគេមានអាការមួយចំនួន ដែលស្ថិតក្នុងការសង្ស័យថា អាចឆ្លងវីរុសកូរ៉ូណា។
អភិបាលរងខេត្ត លោក លឹម សុខតូ បានប្រាប់ថា ពលករដទៃទៀតត្រូវបានបញ្ជូនទៅរក្សាខ្លួននៅដាច់ដោយឡែកនៅតាមមណ្ឌលចត្តាឡីស័កស្ថិតនៅក្នុងបរិវេណវិទ្យាល័យ តេជោសំរោង។
បើតាមលោក សុខតូ ព័ត៌មានលម្អិតនៃពលករកម្ពុជាទាំងនោះ និងមូលហេតុនៃការវិលត្រឡប់មកស្រុកកំណើតវិញរបស់ពួកគេ ត្រូវបានមន្ត្រីសុខាភិបាលប្រចាំច្រកអូរស្មាច់ សួរនាំនិងកត់ត្រាទុក ក្នុងនោះមានទាំងព័ត៌មានពីខេត្តក្នុងប្រទេសថៃដែលពលករទាំងនោះវិលត្រឡប់មក។
ពលករកម្ពុជាក្នុងចំនួនច្រើនបានវិលត្រឡប់មកកម្ពុជាតាមច្រកអូរស្មាច់នេះ តែពីរថ្ងៃប៉ុណ្ណោះបន្ទាប់ពីប្រទេសថៃបានរាយការណ៍ពីការរកឃើញមនុស្សដល់ទៅ៥០០នាក់បានឆ្លងជំងឺកូវីដ១៩កាលពីថ្ងៃសៅរ៍ចុងសប្ដាហ៍កន្លងមកនេះ ដែលជាការរកឃើញករណីឆ្លងច្រើនបំផុតក្នុងមួយថ្ងៃនៅប្រទេសជិតខាងកម្ពុជាមួយនេះ។
ប៉ុន្តែអាជ្ញាធរខេត្តឧត្ដរមានជ័យ ប្រាប់ថា ការសាកសួរពលករកម្ពុជាទាំងនោះ រកឃើញថា ពួកគេបានវិលត្រឡប់មកប្រទេសកំណើតវិញ មិនមែនដោយសារភ័យខ្លាចឆ្លងជំងឺកូវីដ១៩ទេ។
លោក លឹម សុខតូ ប្រាប់ថា៖ «ភាគច្រើនគាត់ឆ្លើយថា អត់ការងារធ្វើ ហើយគេបិទការងារ ក៏ដូចជាបិទរោងចក្រអញ្ចឹងទៅ ក៏ធ្វើឱ្យពួកគាត់ធ្វើដំណើរវិលត្រឡប់មកប្រទេសវិញ។ អញ្ចឹង បានករណីនេះ យើងឃើញគាត់ធ្វើដំណើរតាំងពីខែមេសាមកជាបន្តបន្ទាប់ មិនមែនថា ទាល់តែផ្ទុះកូវីដ១៩នេះ បានគាត់មកទេ»។
លោក សុខតូ បន្តថា៖ «ហើយតាមការសួរពលករមួយចំនួនទៀត គឺគាត់មកហ្នឹងដើម្បីមកដកដំឡូងនៅស្រុក មកច្រូតស្រូវ ហើយអ្នកខ្លះក៏មានបញ្ហាគ្រួសារ ដើម្បីមកជួបគ្រួសារ»។
បើតាមលោក សុខតូ អាជ្ញាធរខេត្តឧត្ដរមានជ័យ ត្រៀមខ្លួនសម្រាប់ទទួលពលករទាំងនោះ ដោយបានរៀបចំទីតាំងសាលារៀនចំនួន៣នៅក្នុងខេត្តនេះ ធ្វើជាមណ្ឌលចត្តាឡីស័ក បញ្ជូនមន្ត្រីសុខាភិបាលទៅត្រួតពិនិត្យអាការពលករចំណាកស្រុកនៅច្រកព្រំដែន និងដាក់ពង្រាយកម្លាំងកងទ័ពជាមួយរថយន្ត១៥គ្រឿងសម្រាប់ដឹកជញ្ជូនពលករទៅកាន់ខេត្តកំណើតរបស់ពួកគេ។
ចំណែកប្រធានច្រកព្រំដែនអន្តរជាតិប៉ោយប៉ែត លោក អ៊ី ចម្រើន បានឱ្យដឹងថា មិនមានពលករកម្ពុជាវិលត្រឡប់មកស្រុកកំណើតវិញដោយឆ្លងកាត់តាមច្រករបស់លោកនោះឡើយនៅថ្ងៃនេះ ប៉ុន្តែមានតែពលរដ្ឋកម្ពុជា៤នាក់ដែលត្រូវបានអាជ្ញាធរថៃចាប់បញ្ជូនត្រឡប់មកវិញតាមច្រកមួយនេះ ដោយសារការឆ្លងដែនខុសច្បាប់។
អ្នកនាំពាក្យអគ្គនាយកដ្ឋានអន្តោប្រវេសន៍ លោក កែ វណ្ណថន បានឱ្យដឹងថា ពលករកម្ពុជាវិលត្រឡប់មកកម្ពុជាវិញរយៈពេល២ថ្ងៃចុងក្រោយនេះ មានចំនួនធម្មតាដូចរាល់ដង ប៉ុន្តែលោកប្រាប់ឱ្យរង់ចាំលទ្ធផលនៃការបូកសរុបសិន។
ទោះជាយ៉ាងណា អ្នកនាំពាក្យរូបនេះអះអាងថា អគ្គនាយកដ្ឋានអន្តោប្រវេសន៍កម្ពុជា បានដាក់ចេញនូវវិធានការចំនួន៣ចំណុច ក្នុងនោះរួមមាន កិច្ចសហការជាមួយក្រសួងសុខាភិបាល ដើម្បីត្រួតពិនិត្យអ្នកដំណើរចូលមកកម្ពុជា រួមទាំងពលរដ្ឋកម្ពុជាផងដែរ ការត្រួតពិនិត្យនៅតាមច្រករបៀងនានា ដើម្បីទប់ស្កាត់ពលករកម្ពុជាឆ្លងចូលមកដោយមិនបានឆ្លងកាត់ការត្រួតពិនិត្យ និងអនុវត្តវិធានការអនាម័យក្នុងចំណោមមន្ត្រីនគរបាលអន្តោប្រវេសន៍ផ្ទាល់៕