ស្ថានទូតកម្ពុជាប្រចាំប្រទេសថៃ បានអំពាវនាវទៅដល់ពលករខ្មែរនៅក្នុងប្រទេសថៃ ឱ្យអនុវត្តតាមវិធានការអនាម័យនិងសេចក្ដីណែនាំរបស់រដ្ឋាភិបាលថៃ ដើម្បីបញ្ចៀសការឆ្លងរីករាលដាលនៃជំងឺកូវីដ១៩ បន្ទាប់ពីប្រទេសនេះរកឃើញករណីឆ្លងច្រើនបំផុតកាលពីសប្ដាហ៍មុន។
ក្នុងសេចក្ដីប្រកាសព័ត៌មាននៅថ្ងៃនេះ ស្ថានទូតកម្ពុជាបានណែនាំទៅពលករនិងពលរដ្ឋខ្លួននៅក្នុងប្រទេសថៃ ឱ្យចូលសហការនិងអនុវត្តតាមសេចក្ដីណែនាំរបស់រដ្ឋាភិបាលថៃ និងវិធានការអនាម័យដែលណែនាំដោយក្រសួងសុខាភិបាលថៃផងដែរ។
បើតាមសេចក្ដីប្រកាសព័ត៌មានដដែល រដ្ឋាភិបាលថៃបានហាមឃាត់ថៅកែរោងចក្រ សហគ្រាស និងម្ចាស់ក្រុមហ៊ុននានា មិនឱ្យចល័តពលករបរទេសចេញឬចូលទីតាំងដែលជំងឺកូវីដ១៩កំពុងផ្ទុះរីករាលដាល។
ស្ថានទូតកម្ពុជាបញ្ជាក់ថា រដ្ឋាភិបាលថៃក៏បានដាក់ចេញវិធានការវេជ្ជសាស្ត្រមួយចំនួនសម្រាប់ត្រួតពិនិត្យទៅលើពលករបរទេសផងដែរ ដូចជា វាស់កម្ដៅរាងកាយ ត្រួតពិនិត្យអាការផ្លូវដង្ហើម ការសម្អាតដៃជាមួយទឹកអាល់កុល ការរក្សាគម្លាតអំឡុងពេលបំពេញការងារ ជាដើម។
ស្ថានទូតកម្ពុជាបានជំរុញទៅពលករនិងពលរដ្ឋកម្ពុជាឱ្យចូលរួមសហការបែបនេះ បន្ទាប់ពីថៃបានប្រកាសពីការរកឃើញមនុស្សដល់ទៅជិត៦០០នាក់ឆ្លងជំងឺកូវីដ១៩នៅក្នុងខេត្តសាមុតសាខនកាលពីថ្ងៃសៅរ៍សប្ដាហ៍មុន ដែលនេះគឺជាការរកឃើញករណីឆ្លងច្រើនបំផុតនៅក្នុងរយៈពេលមួយថ្ងៃនៅក្នុងប្រទេសមួយនេះ៕
