កូនប្រុសច្បងលោកនាយករដ្ឋមន្ត្រី ហ៊ុន សែន ត្រូវបានដំឡើងតំណែងជាអនុប្រធានគណៈចលនាមហាជនរបស់គណបក្សកាន់អំណាច នៅក្នុងរយៈពេលត្រឹមតែកន្លះឆ្នាំប៉ុណ្ណោះបន្ទាប់ពីលោកត្រូវបានដំឡើងឱ្យកាន់តំណែងប្រធានចលនាយុវជនរបស់បក្ស។
ក្នុងសេចក្ដីសម្រេចរបស់គណបក្សប្រជាជនកម្ពុជានៅថ្ងៃនេះ អនុប្រធានគណបក្ស លោក សាយ ឈុំ បានសម្រេចដំឡើងឋានៈលោក ហ៊ុន ម៉ាណែត ពីសមាជិករបស់គណៈកម្មាធិការកណ្ដាលបក្ស ទៅជាអនុប្រធានគណៈចលនាមហាជន។
នៅក្នុងគណបក្សកាន់អំណាច លោក ហ៊ុន ម៉ាណែត អាយុ៤៣ឆ្នាំ ត្រូវបានតែងតាំងជាប្រធានចលនាយុវជនថ្នាក់កណ្ដាលរបស់គណបក្ស កាលពីដើមខែមិថុនាកន្លងមកនេះ។
ជាកូនប្រុសច្បងរបស់លោក ហ៊ុន សែន ដែលជាប្រធានគណបក្សកាន់អំណាច លោក ហ៊ុន ម៉ាណែត គឺជាសមាជិកមួយរូបក្នុងចំណោមសមាជិក៣៤រូបនៅក្នុងគណៈអចិន្ត្រៃយ៍នៃគណៈកម្មាធិការកណ្ដាលគណបក្ស មុននឹងត្រូវបានដំឡើងឋានៈថ្មីនេះ។
ជាអ្នកបញ្ចប់ការសិក្សាពីបណ្ឌិតសភាយោធាអាមេរិក West Point លោក ហ៊ុន ម៉ាណែត ត្រូវបានដំឡើងឋានន្តរសក្តិទៅជាឧត្ដមសេនីយ៍ទោនៅឆ្នាំ២០១១ ក្នុងអាយុ៣៤ឆ្នាំ ហើយត្រូវបានដំឡើងទៅជាឧត្ដមសេនីយ៍ឯកផ្កាយ៣ នៅក្នុងរយៈពេល២ឆ្នាំក្រោយមក។
ក្នុងរយៈពេលមិនដល់១ខែផង មុនការបោះឆ្នោតជាតិនៅខែកក្កដា ឆ្នាំ២០១៨ លោក ម៉ាណែត ត្រូវបានដំឡើងទៅជាអគ្គមេបញ្ជាការរងកងទ័ព និងជាមេបញ្ជាការកងទ័ពជើងគោក។
បើតាមសេចក្ដីរាយការណ៍របស់កាសែត ភ្នំពេញ ប៉ុស្តិ៍ លោក ម៉ាណែត ក៏កាន់តំណែងជាមេបញ្ជាការរងនៃកងអង្គរក្សផ្ទាល់ខ្លួនរបស់លោកនាយករដ្ឋមន្ត្រី ហ៊ុន សែន និងអង្គភាពប្រឆាំងភេរវកម្មរបស់ក្រសួងការពារជាតិផងដែរ។
ក្រៅពីលោក ម៉ាណែត កូនប្រុសមួយរូបទៀតរបស់លោក ហ៊ុន សែន គឺលោក ហ៊ុន ម៉ានិត ក៏ជាមន្ត្រីយោធាជាន់ខ្ពស់មានឋានន្តរសក្តិជាឧត្ដមសេនីយ៍ឯក និងកាន់តំណែងជាប្រធាននាយកដ្ឋានចារកម្មនៃក្រសួងការពារជាតិផងដែរ។
ចំណែកឯលោក ហ៊ុន ម៉ានី ជាកូនប្រុសពៅរបស់លោក ហ៊ុន សែន ក៏កំពុងដឹកនាំសហភាពសហព័ន្ធយុវជនកម្ពុជា ជាបណ្ដាញមួយទៀតដែលប្រមូលផ្ដុំទៅដោយក្រុមយុវជនកម្ពុជា ដែលត្រូវបានបង្កើតឡើងចាប់តាំងពីក្រោយថ្ងៃទី២ ខែធ្នូ ឆ្នាំ១៩៧៨ ជាពេលដែលចលនាតស៊ូមួយត្រូវបានប្រកាសឡើងដើម្បីផ្ដួលរំលំរបបខ្មែរក្រហម។
របាយការណ៍ក្នុងពិធីប្រកាសដាក់បញ្ចូលសមាជិកថ្មីនៅក្រសួងរ៉ែ និងថាមពល កាលពីខែសីហាឆ្នាំ២០១៩ បានបង្ហាញថា សហភាពសហព័ន្ធយុវជនកម្ពុជា មានសមាជិកសរុបជាង១៤ម៉ឺននាក់នៅទូទាំងប្រទេស តាំងពីថ្នាក់ជាតិរហូតដល់មូលដ្ឋាន និងគ្រប់វិស័យ៕