ក្រសួងសុខាភិបាលបានព្រមានចាត់វិធានការចំពោះម្ចាស់អាជីវកម្មផ្ដល់សេវាសុខាភិបាលទាំងអស់ ដែលនៅតែបន្តចេញវេជ្ជបញ្ជាសរសេរដោយដៃ។
ក្រសួងសុខាភិបាលបានព្រមានបែបនេះនៅក្នុងលិខិតមួយចេញកាលពីដើមសប្ដាហ៍នេះ ដែលបានក្រើនរំឭកទៅម្ចាស់អាជីវកម្មដែលផ្ដល់សេវាកម្មសុខាភិបាលទាំងអស់។
ក្នុងលិខិតនោះ ក្រសួងនិយាយថា ក្រសួងនៅតែសង្កេតឃើញកន្លែងព្យាបាលជំងឺឯកជនមួយចំនួននៅតែមិនអនុវត្តតាមសេចក្ដីណែនាំរបស់ខ្លួនដែលបានណែនាំឱ្យចេញវេជ្ជបញ្ជាតាមកុំព្យូទ័រ ហើយបន្តសរសេរដោយដៃដោយខ្ជីខ្ជា អានមិនដាច់ និងមិនត្រឹមត្រូវតាមក្បួនខ្នាតវេជ្ជសាស្ត្រ។
ក្រសួងបាននិយាយថា ក្នុងករណីកន្លែងព្យាបាលជំងឺឯកជនណាមួយនៅតែមិនគោរពតាមសេចក្ដីណែនាំរបស់ខ្លួន ក្រសួងនឹងមានវិធានការទៅលើទីតាំងនោះ ដោយផាកពិន័យជាប្រាក់៥លានរៀល ឬក៏ដកហូតអាជ្ញាបណ្ណ និងបិទកន្លែងព្យាបាលនោះ៕