អភិបាលស្រុកបន្ទាយស្រី នៅក្នុងខេត្តសៀមរាប បានចេញគោលការណ៍តម្រូវឱ្យគ្រប់មេភូមិទាំងអស់នៅក្នុងស្រុកនេះ ត្រូវចំណាយពេល១ថ្ងៃក្នុង១ខែដឹកនាំពលរដ្ឋរើសសំរាម និងធ្វើសកម្មភាពបរិស្ថានផ្សេងៗទៀត។
លោកឃឹម ហ្វីណង់ បានប្រាប់ វីអូឌីថា លោកដាក់ផែនការនេះ ដោយជំរុញឱ្យមានការតាមដានត្រួតពិនិត្រ លើកទឹកចិត្ត និង ការវាយតម្លៃផងគឺធ្វើយ៉ាងណាដើម្បីអោយការងារនេះមានជាប្រចាំ រឹងមាំ និងប្រកបដោយនិរន្តភាព។
លោក ឃឹម ហ្វីណង់៖« ជាការងារប្រចាំខែតែម្តង ហើយគ្រប់ភូមិទាំងអស់ត្រូវតែធ្វើរបាយការណ៍ការបស់ខ្លួន។ហើយរៀងរាល់បីខែម្តងយើង និង ធ្វើការបូកសរុប វាយតម្លៃថា តើភូមិណា លេចធ្លោរ?»
លោក ឡឹក វន់ គឺជាមេភូមិគំរូនៃភូមិព្រះដាក់ ស្រុកបន្ទាយស្រីថ្លែងថា លោកតែងតែដឹកនាំពលរដ្ឋរើសសំរាមជាប្រចាំ នាំឱ្យភូមិរបស់លោកស្អាតក្លាយជាភូមិគំរូ។ លោកថា ក្នុង១ខែប្រមូលសំរាមបានជាថង់ប្លាស្ទិចប្រមាណ៥ការ៉ុង។
លោកទុន ពិសាក់ គឺជាប្រជាជនដែលរស់នៅ ភូមិព្រះដាក់ ថ្លែងថា រូបលោក និងប្រជាពលរដ្ឋផ្សេងទៀត មានការយល់ដឹងច្រើនពីការទុកដាក់សំរាមឱ្យបានត្រឹមត្រូវ និង យល់ដឹងពីផលប្រយោជន៍នៃបរិស្ថានស្អាតល្អ។ លោកថា លោកសប្បាយចិត្តក្នុងការចូលរួមជាមួយអាជ្ញាធរក្នុងការធ្វើសកម្មភាពសម្អាតភូមិឃុំ។
នៅក្នុងស្រុកបន្ទាយស្រីមានភូមិចំនួន៣៦ ក្នុងនោះភូមិមួយចំនួនត្រូវបានកំណត់ថា ជាភូមិគំរូ ដែលថែរក្សាបរិស្ថានស្អាតល្អ។ ផែនការ១ថ្ងៃដើម្បីបរិស្ថានដែលអភិបាលស្រុកដាក់ចេញនេះ ក្រៅរើស និងបោសសម្អាតសំរាម ក៏មានការដាំដើមឈើឬ សកម្មភាពផ្សេងៗទៀតដើម្បីបរិស្ថានដែរ៕
អត្ថបទដោយ ម៉ិច ជូឡាយ