គិតមកដល់ថ្ងៃនេះ កម្ពុជាមានអ្នកជំងឺកូវីដ១៩ ចំនួន៤នាក់ទៀតប៉ុណ្ណោះកំពុងស្ថិតក្រោមការព្យាបាល បន្ទាប់ពីអ្នកជំងឺ៤នាក់ទៀតបានជាសះស្បើយកាលពីថ្ងៃម្សិលមិញនេះ។
ក្នុងសេចក្ដីប្រកាសព័ត៌មានថ្ងៃនេះ ក្រសួងសុខាភិបាលបានប្រកាសថា អ្នកជំងឺកូវីដ១៩ ចំនួន៤នាក់ ក្នុងនោះម្នាក់ជាអ្នកជាប់ពាក់ព័ន្ធនឹងព្រឹត្តិការណ៍សហគមន៍២៨វិច្ឆិកាផងដែរ ត្រូវបានព្យាបាលជាសះស្បើយ បន្ទាប់ពីធ្វើតេស្តអវិជ្ជមានចំនួន២លើករួចមក។
គិតមកដល់ថ្ងៃនេះ អ្នកជំងឺកូវីដ១៩ សរុប៣៦០នាក់ហើយត្រូវបានព្យាបាលជាសះស្បើយនៅក្នុងចំណោមអ្នកឆ្លងជំងឺនេះសរុប៣៦៤នាក់។
កម្ពុជាពុំបានរកឃើញករណីឆ្លងថ្មីអស់រយៈពេល៧ថ្ងៃជាប់ៗគ្នាហើយចាប់តាំងពីថ្ងៃទី២០ ខែធ្នូ ជាពេលដែលកម្ពុជារកឃើញករណីឆ្លងជំងឺកូវីដ១៩ លើស្ត្រីជនជាតិអាមេរិកម្នាក់វ័យ៥៥ឆ្នាំ បន្ទាប់ពីស្ត្រីរូបនោះបានធ្វើដំណើរមកដល់កម្ពុជាដោយឆ្លងកាត់តៃវ៉ាន់៕
