លោកនាយករដ្ឋមន្ត្រី ហ៊ុន សែន បានព្រមានចាប់ខ្លួនលោក ចាន់ យ៉េត មេដឹកនាំបក្សនយោបាយតូចមួយដែលទើបតែត្រូវបានដកចេញពីក្រុមប្រឹក្សាពិគ្រោះយោបល់របស់រដ្ឋាភិបាលនោះ ដោយថា មេបក្សរូបនេះបានធ្វើសកម្មភាព «បំផ្លិចបំផ្លាញ» និង «ទុច្ចរិត»។
លោកនាយករដ្ឋមន្ត្រីបានព្រមានបែបនេះនៅអំឡុងថ្លែងសារពីគេហដ្ឋានរបស់លោកនៅក្រុងតាខ្មៅ ហើយដែលត្រូវបានផ្សាយបន្តផ្ទាល់តាមទូរទស្សន៍ជាតិនៅព្រឹកថ្ងៃនេះ។
លោក ហ៊ុន សែន ថ្លែងថា៖ «ខ្ញុំផ្ដាំទៅពីនេះ សូមឱ្យលោក ចាន់ យ៉េត ដកខ្លួនឱ្យឆាប់។ […] ខ្ញុំមានឯកសារគ្រប់គ្រាន់ដើម្បីចាប់ខ្លួន ចាន់ យ៉េត ហើយ ប៉ុន្តែម្សិលមិញ ខ្ញុំមិនឱ្យចាប់ទេ។ […] អ៊ីចឹង សូមផ្ដាំទៅលោក ចាន់ យ៉េត បើមិនចង់ជាប់គុក ដកខ្លួនឱ្យឆ្ងាយ»។
មេដឹកនាំបក្សកាន់អំណាចរូបនេះបានព្រមានទៀតថា អង្គភាពប្រឆាំងអំពើពុករលួយមានឯកសារគ្រប់គ្រាន់ ដែលបង្ហាញថា មេបក្សរូបនេះបានដើរបោកប្រាស់អ្នកដទៃ។
លោក ចាន់ យ៉េត ដែលជាប្រធានគណបក្សនគរប្រជាធិបតេយ្យ ត្រូវបានលោកនាយករដ្ឋមន្ត្រី ហ៊ុន សែន សម្រេចដកចេញពីតំណែងនៅឧត្ដមក្រុមប្រឹក្សាពិគ្រោះ និងផ្ដល់យោបល់ កាលពីថ្ងៃទី៩ ខែធ្នូនេះ។ មេបក្សរូបនេះបានបាត់បង់តំណែងជាទេសរដ្ឋមន្ត្រីនៅក្នុងឧត្ដមក្រុមប្រឹក្សានោះ តែ៣ថ្ងៃប៉ុណ្ណោះបន្ទាប់ពីលោកប្រកាសដកខ្លួនចេញពីជម្លោះដីធ្លីមួយនៅភូមិជង្រុក ស្ថិតនៅឃុំទួលពង្រ ស្រុកម៉ាឡៃ ខេត្តបន្ទាយមានជ័យ។
លោក ចាន់ យ៉េត ប្រាប់វីអូឌីនាពេលកន្លងមកនេះថា លោកសម្រេចដកខ្លួនចេញ ក្រោយពីមន្ត្រីជាន់ខ្ពស់នៅទីស្ដីការគណៈរដ្ឋមន្ត្រីបានណែនាំលោកឱ្យឈប់លូកដៃក្នុងដំណើរការដោះស្រាយវិវាទដីធ្លីមួយនេះ។
លោក ចាន់ យ៉េត គឺជាសមាសភាពទី៤ នៅក្នុងឧត្ដមក្រុមប្រឹក្សាពិគ្រោះ និងផ្ដល់យោបល់ ដែលត្រូវបានលោក ហ៊ុន សែន ដកចេញពីតំណែងជាបន្តបន្ទាប់នៅក្នុងរយៈពេលជាង២ឆ្នាំក្រោយពីរដ្ឋាភិបាលបង្កើតឧត្ដមក្រុមប្រឹក្សានេះឡើង។
ឧត្ដមក្រុមប្រឹក្សាពិគ្រោះ និងផ្ដល់យោបល់ ត្រូវបានបង្កើតឡើងនៅក្រោយការបោះឆ្នោតជាតិឆ្នាំ២០១៨ ដោយប្រមូលផ្ដុំទៅដោយថ្នាក់ដឹកនាំនៃគណបក្សនយោបាយនានាដែលចូលរួមបោះឆ្នោតនាឆ្នាំនោះ ចំពេលដែលគណបក្សសង្គ្រោះជាតិ ដែលជាបក្សប្រឆាំងដ៏ធំជាងគេ ត្រូវបានហាមឃាត់ចូលរួមក្នុងការប្រកួតប្រជែង៕
