ក្រសួងព័ត៌មានបានជំរុញជាថ្មីឱ្យម្ចាស់ប្រព័ន្ធផ្សព្វផ្សាយទាំងអស់អនុវត្តតាមបទប្បញ្ញត្តិនានារបស់ស្ថាប័នពាក់ព័ន្ធ ដោយថា ដើម្បីទទួលបានការទទួលស្គាល់នូវភាពស្របច្បាប់និងការពារស្លាកសញ្ញារបស់ខ្លួន។
ក្រសួងព័ត៌មានបានជំរុញបែបនេះនៅក្នុងសេចក្ដីជូនដំណឹងមួយដែលចេញដោយអគ្គនាយកដ្ឋានព័ត៌មាន និងសោតទស្សន៍ កាលពីថ្ងៃម្សិលមិញនេះ។
ក្នុងសេចក្ដីជូនដំណឹងនោះ ក្រសួងព័ត៌មានបានជំរុញឱ្យអនុវត្តតាមច្បាប់សមាគមនិងអង្គការមិនមែនរដ្ឋាភិបាល ច្បាប់ស្ដីពីវិធានពាណិជ្ជកម្មនិងបញ្ជីពាណិជ្ជកម្ម និងបទប្បញ្ញត្តិផ្សេងទៀត ដែលពាក់ព័ន្ធនឹងការគ្រប់គ្រងស្លាកសញ្ញាអាជីវកម្មនៅក្នុងវិស័យព័ត៌មាន។
ក្រសួងបានជំរុញទៅអង្គការឬសមាគមដែលធ្វើការផ្នែកព័ត៌មានឱ្យទៅចុះបញ្ជីនៅក្រសួងមហាផ្ទៃ ដើម្បីទទួលបានភាពស្របច្បាប់។
ក្រសួងបញ្ជាក់ជាថ្មីថា ស្ថាប័នសារព័ត៌មានដែលប្រកបអាជីវកម្ម ឬសេវាកម្មវិស័យសារព័ត៌មាននិងសោតទស្សន៍ ត្រូវចុះបញ្ជីអាជីវកម្មរបស់ខ្លួនទៅតាមប្រកាសអន្តរក្រសួង ដែលតម្រូវឱ្យស្ថាប័នសារព័ត៌មានត្រូវចុះបញ្ជីអាជីវកម្មនិងសេវារបស់ខ្លួននៅក្រសួងពាណិជ្ជកម្ម។
ក្នុងសន្និសីទសារព័ត៌មានកាលពីចុងខែវិច្ឆិកាកន្លងមកនេះ អ្នកនាំពាក្យក្រសួងព័ត៌មាន លោក មាស សុភ័ណ្ឌ បានថ្លែងថា ក្រសួងជំរុញបែបនេះ ដើម្បីការពារផលប្រយោជន៍នៃការប្រកួតប្រជែងរបស់ស្ថាប័នសារព័ត៌មានស្របច្បាប់៕
