របាយការណ៍រដ្ឋាភិបាលវៀតណាមបង្ហាញថា នៅក្នុងឆ្នាំ២០២០ ការនាំទំនិញចេញទៅលក់នៅលើទីផ្សារអន្តរជាតិច្រើនជាងការនាំចូល គិតជាទឹកប្រាក់ចំនួន១៩,១ប៊ីលានដុល្លារ ដែលនេះជាចំនួនធំបំផុតបើគិតចាប់តាំងពីឆ្នាំ២០១៦មក។
ស្ថាប័នមូលនិធិរូបិយវត្ថុអន្តរជាតិ (IMF) បង្ហាញលទ្ធផលនៃការសិក្សាបឋមថា នៅក្នុងឆ្នាំ២០២០ អត្រាកំណើនសេដ្ឋកិច្ចរបស់វៀតណាម កើនចន្លោះពី ០,៨ ទៅ ២,៤ ភាគរយ។ ចំនួននេះគឺជាអត្រាកំណើនខ្ពស់បំផុតក្នុងចំណោមអត្រាកំណើនសេដ្ឋកិច្ចរបស់ប្រទេសផ្សេងៗទៀតនៅលើពិភពលោកដែលរងផលប៉ះពាល់ខ្លាំងពីមេរោគកូវីដ១៩។
វៀតណាមបានក្លាយជាប្រទេសដែលមានអត្រាកំណើនសេដ្ឋកិច្ចខ្ពស់ជាងនៅតំបន់អាស៊ាននៅឆ្នាំ២០២០ ហើយក្លាយជាប្រទេសមានអត្រាកំណើនខ្ពស់ជាងគេនៅតំបន់អាស៊ីនៅឆ្នាំ២០២១។
ធនាគារសាជីវកម្មហុងកុង-សៀងហៃ (HSBC) បានចេញរបាយការណ៍បង្ហាញថា បើទោះជាស្ថិតនៅក្នុងស្ថានភាពដែលប្រឈមដោយសារមេរោគកូវីដ១៩ តែនៅពាក់កណ្តាលឆ្នាំ២០២០ សេដ្ឋកិច្ចវៀតណាមនៅតែរក្សាអត្រាកំណើនបានចំនួន១,៨ភាគរយ។
របាយការណ៍ដដែលបញ្ជាក់ថា នៅឆ្នាំ២០២១ វៀតណាមនឹងទទួលបានអត្រាកំណើនសេដ្ឋកិច្ច ចំនួន៨,១ភាគរយ ដែលចំនួននេះខ្ពស់ជាងគេបើប្រៀបធៀបជាមួយអត្រាកំណើនសេដ្ឋកិច្ចរបស់ប្រទេសផ្សេងៗទៀតនៅតំបន់អាស៊ី។
តើកត្តាអ្វីខ្លះបានជាសេដ្ឋកិច្ចវៀតណាមនៅតែមានភាពល្អប្រសើរ ខណៈប្រទេសផ្សេងៗរងផលប៉ះពាល់ខ្លាំងនោះ?
បើយើងពិនិត្យមើលលើរបាយការណ៍សិក្សាស្រាវជ្រាវរបស់ធនាគារពិភពលោក ដែលទើបធ្វើបច្ចុប្បន្នភាពចុងក្រោយកាលពីថ្ងៃទី៦ ខែតុលា ឆ្នាំ២០២០ បង្ហាញថា សេដ្ឋកិច្ចរបស់វៀតណាម មានសញ្ញាល្អជាង៣០ឆ្នាំមកហើយ ចាប់តាំងពីការធ្វើកំណែទម្រង់មួយដែលមានឈ្មោះថា Doi Moi មានន័យថា «ស្តារឡើងវិញ»។
របាយការណ៍ធនាគារពិភពលោកបង្ហាញថា បើទោះជាវៀតណាមរងផលប៉ះពាល់ដូចប្រទេសផ្សេងទៀតនៅលើពិភពលោកដោយសារកូវីដ១៩ក៏ដោយ ប៉ុន្តែអត្រាកំណើនសេដ្ឋកិច្ចរបស់ប្រទេសនេះនៅតែបន្តលូតលាស់ទៅមុខ។
ធនាគារពិភពលោកបញ្ជាក់ថា រយៈពេល៦ខែនៃឆ្នាំ២០២០ វៀតណាមមានអត្រាកំណើនសេដ្ឋកិច្ច១,៨ភាគរយ ហើយរយៈពេល១ឆ្នាំពេញនៃឆ្នាំ២០២០ អត្រាកំណើនសេដ្ឋកិច្ចរបស់វៀតណាមកើនដល់២,៨ភាគរយ។
នយោបាយការបរទេស
វៀតណាមជាប្រទេសកុម្មុយនីស្តអនុវត្តសេដ្ឋកិច្ចទីផ្សារសេរី ហើយមានទំនាក់ទំនងសេដ្ឋកិច្ចល្អទាំងប្រទេសកុម្មុយនីស្តដូចគ្នា និងប្រទេសកាន់របបសេរី។ សូម្បីតែចិនកុម្មុយនីស្តជាសត្រូវធំក្នុងករណីជម្លោះព្រំដែន និងអាមេរិកជាសត្រូវបង្ហូរឈាមក្នុងទសវត្សរ៍ ៥០, ៦០ និង ៧០ ក៏បច្ចុប្បន្នជាដៃគូពាណិជ្ជកម្មល្អរបស់វៀតណាមដែរ។ នៅក្នុងឆ្នាំ២០២០ ដៃគូពាណិជ្ជកម្មធំទី១របស់វៀតណាមគឺអាមេរិក និងធំទី២គឺចិន។
ជាបន្តបន្ទាប់ មេដឹកនាំវៀតណាមតែងតែប្រកាសពីការបង្កើតច្បាប់និងលក្ខន្តិកៈនានា ដើម្បីទាក់ទាញអ្នកវិនិយោគទាំងក្រៅនិងក្នុងប្រទេស។ វៀតណាមប្រឹងប្រែងឱ្យអ្នកវិនិយោគបរទេសមើលឃើញថា ប្រទេសវៀតណាមអនុវត្តច្បាប់បានត្រឹមត្រូវ ធានាដល់មុខរបរអាជីវកម្មនៅលើទឹកដីនេះមិនមានហានិភ័យទេ។
គិតត្រឹមចុងឆ្នាំ២០២០ វៀតណាមបានចុះកិច្ចព្រមព្រៀងពាណិជ្ជកម្មសេរីជាង១០ ដែលបង្កលក្ខណៈងាយស្រួលឱ្យអ្នកវិនិយោគនៅវៀតណាមអាចនាំទំនិញរបស់ពួកគេទៅដៃគូទាំងនោះដោយមិនបាច់បង់ពន្ធឬបង់ពន្ធក្នុងកម្រិតតិចតួចបំផុត។ ប្រទេសនិងតំបន់ដែលបានចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយវៀតណាមទាំងនោះ រួមមាន សហភាពអឺរ៉ុបមាន២៨ប្រទេស ចក្រភពអង់គ្លេស ជប៉ុន កាណាដា និងកូរ៉េខាងត្បូង ជាដើម។
កិច្ចព្រមព្រៀងពាណិជ្ជកម្មសេរីទាំងនេះបានលើកមុខមាត់វៀតណាមមួយកម្រិតទៀតដែលបង្ហាញពីបរិយាកាសវិនិយោគល្អ រួមមានទាំងប្រព័ន្ធច្បាប់ ស្ថិរភាពនយោបាយ កម្លាំងពលកម្ម។ក្រោយពេលដែលវៀតណាមចុះហត្ថលេខាលើកិច្ចព្រមព្រៀងពាណិជ្ជកម្មសេរីជាមួយវៀតណាមកាលពីឆ្នាំ២០១៩ ហើយចាប់ផ្តើមអនុវត្តជាផ្លូវការកាលពីខែសីហារ ឆ្នាំ២០២០ ចិនក៏បង្ហាញការចាប់អារម្មណ៍ខ្លាំងលើការវិនិយោគនៅវៀតណាមផងដែរ។
ចិនបានចរចាជាមួយវៀតណាមដោយបង្កើតមជ្ឈមណ្ឌលពាណិជ្ជកម្មមួយនៅលើទឹកដីវៀតណាមភាគខាងជើងជាប់ព្រំដែនជាមួយចិន ហើយចិនក៏បានបង្ហាញពីគម្រោងបង្កើតផ្លូវរថភ្លើងភ្ជាប់វៀតណាមទៅសហភាពអឺរ៉ុប ដើម្បីបង្កភាពងាយស្រួលក្នុងការដឹកជញ្ជូនទំនិញផងដែរ។
ចំពោះនយោបាយ វៀតណាមប្រឆាំងចិនដោយបើកចំហក្នុងជម្លោះដែនទឹកនោះ ក៏ជាកត្តាភូមិសាស្ត្រនយោបាយដែលធ្វើឱ្យប្រទេសលោកសេរីដឹកនាំដោយសហរដ្ឋអាមេរិក ជ្រោមជ្រែងវៀតណាមដើម្បីទប់ទល់ឥទ្ធិពលរបស់ចិនដែរ។
ប្រព័ន្ធថែទាំសុខភាព
ក្រៅពីគោលនយោបាយការបរទេស និងការបង្កើតច្បាប់លក្ខន្តិកៈផ្សេងៗដើម្បីទាក់ទាញការវិនិយោគនោះ ហើយធ្វើឱ្យសេដ្ឋកិច្ចវៀតណាមនៅតែមានភាពល្អប្រសើរក្នុងស្ថានភាពកូវីដ១៩នេះ ប្រព័ន្ធថែទាំសុខភាពក៏ជាផ្នែកមួយសំខាន់ដែលមិនអាចខ្វះបាន។
នៅក្នុងអំឡុងពេល១ឆ្នាំពេញនៃឆ្នាំ២០២០ បើវៀតណាមមិនមានលទ្ធភាពក្នុងគ្រប់គ្រងមេរោគកូវីដ១៩ទេ ប្រាកដជាធ្វើឱ្យវិស័យនានាទ្រទ្រង់សេដ្ឋកិច្ចដែលមានស្រាប់ រងផលប៉ះពាល់ ហើយធ្វើឱ្យអ្នកវិនិយោគថ្មីមិនហ៊ានទៅបោះទុនជាមួយនោះទេ។
ចំណុចមួយចំនួនដែលវៀតណាមបង្ហាញពីគុណភាពប្រព័ន្ធសុខាភិបាលរបស់ខ្លួនដែលប្រឹងប្រែងធ្វើកំណែទម្រង់តាំងពីទសវត្សរ៍៨០មកនេះ គឺការបង្កើតឧបករណ៍តេស្តរកមេរោគកូវីដ១៩ដោយខ្លួនឯង។ នៅក្នុងអំឡុងពេលកូវីដ១៩នេះ វៀតណាមក៏បានប្រកាសពីដំណើរការនៃការផលិតវ៉ាក់សាំងចាក់ការពារមេរោគកូវីដ១៩ដែលផលិតដោយវៀតណាមដែរ។
កត្តាដែលបញ្ជាក់ពីគុណភាពប្រព័ន្ធសុខាភិបាលរបស់វៀតណាមដែរនោះ គឺថ្នាក់ដឹកនាំវៀតណាមស្ទើរតែអ្នកទាំងអស់ពេលមានជំងឺតែងទទួលការព្យាបាលនៅក្នុងប្រទេសរបស់ខ្លួន។ដូច្នេះ ផ្អែកលើគោលនយោបាយក្រៅប្រទេសក្នុងការទាក់ទាញការវិនិយោគ ការបង្កបរិយាកាសល្អនៅក្នុងប្រទេស និងប្រព័ន្ធសុខាភិបាលរឹងមាំ អាចធ្វើឱ្យស្ថានភាពសេដ្ឋកិច្ចរបស់វៀតណាមនៅតែរឹងមាំក្នុងស្ថានភាពកូវីដ១៩៕
