ប្រជាពលរដ្ឋរស់នៅម្តុំស្ពានព្រែកសំរោង ក្រុងតាខ្មៅ ខេត្តកណ្តាល បានត្អូញត្អែរពីបញ្ហាដីហុយប៉ះពាល់ដល់សុខភាពនិងបង្កការលំបាកក្នុងការរស់នៅ ហើយពួកគេបានជំរុញឱ្យអាជ្ញាធររកដំណោះស្រាយចំពោះបញ្ហានេះ។
អ្នកស្រី អ៊ិន សាវ៉ាន់ ពលរដ្ឋម្នាក់ដែលរស់នៅក្នុងភូមិព្រែកសំរោង សង្កាត់តាខ្មៅ បានឱ្យដឹងថាបញ្ហាដីហុយខ្លាំងនេះមានជាយូរឆ្នាំមកហើយ បណ្តាលមកពីមានឡានដឹកដីនិងខ្សាច់ជាច្រើន ដែលតែងតែជិះតាមបណ្តោយផ្លូវនេះជាប្រចាំ ធ្វើឱ្យមានដីធ្លាក់មកលើថ្នល់។ អ្នកស្រីថា សារធាតុដីទាំងនោះបានបង្កផលប៉ះពាល់ដល់សុខភាព។
អ្នកស្រី អ៊ិន សាវ៉ាន៖ «ប៉ះពាល់ វាហួសពីប៉ះពាល់ ម៉្ងៃៗយើងដកដង្ហើមចូល ភ្នែកពេលខ្លះបើកអត់រួចផង។ ដីវាទំរោមភ្នែក ក្រហាយភ្នែកទៅ ច្រមុះបាញ់ថ្នាំសម្លាប់មេរោគរហូត វាឆួលដី ហើយពាក់ម៉ាស់វារោលមុខយើងទៀត ពិបាកមួយចប់។»
ពលរដ្ឋរូបនេះបានស្នើទៅកាន់អាជ្ញាធរឱ្យមានដំណោះស្រាយករណីដីហុយនេះ។
អ្នកស្រី អ៊ិន សាវ៉ាន់៖ «បើសិនថាគាត់ជួយដោះស្រាយធ្វើម៉េចកុំឱ្យមានឡានដឹកខ្សាច់ជិះកាត់ហុយអញ្ចឹង មានតែប៉ុណ្ណឹង។ បើបាត់ហុយ បាត់ខ្សាច់អីហ្នឹងទៅ អាហ្នឹងវាអស់ហើយ យើងអត់មានកង្វល់អីទៀតទេ កង្វង់យើងតែរឿងដីហុយ ខ្សាច់ហុយហ្នឹង»។
ចំណែកពលរដ្ឋម្នាក់ទៀតគឺលោក ម៉ៃ ចន្ធូ រស់នៅក្នុងសង្កាត់សេរីភាព បានរៀបរាប់ថា លោកបានឃើញអាជ្ញាធរមកបោសសម្អាតដី ប៉ុន្តែមិនអាចទប់ស្កាត់ឱ្យឈប់ហុយបាននោះទេ លោកថាដោយសារមានឡានដឹកដីនិងខ្សាច់បើកបរមកជាបន្តបន្ទាប់។
លោក ម៉ៃ ចន្ធូ ៖ «គាត់ [អាជ្ញាធរ] ដោះស្រាយដែរ បានមួយគ្រាៗ គាត់នាំកូនចៅបោសសម្អាតមួយសារៗអញ្ចឹងទៅ។ ខ្ញុំបោសសម្អាតរាល់ថ្ងៃដែរហ្នឹង តែបោសមិនឈ្នះទេ បើដឹកខ្សាច់ឡើងចុះ ហើយត្រើយខាងនោះចុះមកអញ្ចឹងទៅ ហើយពីខាងស្វាយរលំមកនៅហ្នឹងទាំងអស់ [..] បងជាប្រជាពលរដ្ឋ បងសុំស្នើទៅចៅហ្វាយខេត្ត ហើយចៅសង្កាត់ក៏បានស្នើទៅហើយ ប៉ុន្តែគាត់ថាចាំដោះស្រាយឱ្យ»។
ស្រដៀងគ្នានេះដែរ ពលរដ្ឋម្នាក់ទៀតបានប្រាប់ដោយសុំមិនបញ្ចេញឈ្មោះថា អ្នកស្រីបារម្ភចំពោះសុខភាពដោយសារដីហុយ។
អ្នកស្រីបន្ថែមថា បញ្ហាដីហុយយនេះគឺមកពីឡានដឹកដីនិងខ្សាច់បើកបរដោយមិនមានបច្ចេកទេសត្រឹមត្រូវ ដែលបណ្តាលឱ្យដីធ្លាក់នៅលើថ្នល់។
អ្នកស្រីនិយាយថា៖ «និយាយទៅ ឡានដឹកដីជ្រុះនៅហ្នឹង វាហុយ ហើយបើកលឿនៗ វាបើកឡើង[ស្ពាន]អញ្ចឹងទៅ វាហុយទៀត ព្រោះដីជ្រុះលើថ្នល់។ យើងនៅផ្លូវហ្នឹងទៀត វាហុយដោយសារមានកន្លែងខ្សាច់ [អាជីវកម្មលក់ខ្សាច់] នៅហ្នឹងទៀត វាប៉ះពាល់សុខភាព»។
ប្រធានមន្ទីរសាធារណការ និងដឹកជញ្ជូនខេត្តកណ្តាល លោក ម៉ឹង យូអេង បានទទួលស្គាល់ថាពិតជាមានបញ្ហាដីហុយនៅក្នុងតំបន់នេះពិតប្រាកដមែន ដោយថា បណ្តាលមកពីឡានដឹកដីនិងខ្សាច់។
លោកបានថ្លែងថា កាលអំឡុងពាក់កណ្តាលខែមករា មន្ទីរសាធារណការនិងដឹកជញ្ជូន បានសហការជាមួយមន្ទីររ៉ែនិងថាមពលខេត្តកណ្តាល ដោយមានអភិបាលក្រុងតាខ្មៅជាប្រធាន បានសម្រេចបង្កើតគណៈកម្មការមួយដើម្បីដោះស្រាយបញ្ហានេះ។
លោកបន្តថា គណៈកម្មការនេះកំពុងត្រួតពិនិត្យចំពោះដេប៉ូខ្សាច់ទាំងឡាយណាដែលបានប្រើប្រាស់ឡានដឹកដីឬខ្សាច់ដោយមិនមានបច្ចេកទេសត្រឹមត្រូវ ដែលធ្វើឱ្យដីឬខ្សាច់ជ្រុះតាមថ្នល់ប៉ះពាល់ដល់សោភ័ណភាពផ្លូវនិងនាំឱ្យមានដីហុយ។
ប្រធានមន្ទីរសាធារណការ និងដឹកជញ្ជូនខេត្តកណ្តាលរូបនេះ បន្ថែមថា ប្រសិនបើម្ចាស់អាជីវកម្មដឹកដីឬដេប៉ូខ្សាច់ទាំងនោះមិនបានអនុវត្តតាមគោលការណ៍របស់មន្រ្តីជំនាញនោះទេ ពួកគេប្រឈមនឹងការបិទអាជីវកម្មតែម្តង។
លោក ម៉ឹង យូអេង៖ «កិច្ចការងារនេះ យើងកំពុងតែខិតខំប្រឹងប្រែងរួមគ្នាធ្វើ ដោយយើងទើបតែបង្កើតគណៈកម្មការមួយដឹកនាំដោយអភិបាលក្រុង ដើម្បីចាត់វិធានការចំពោះរថយន្តដែលដឹកខ្សាច់ជ្រុះលើផ្លូវ នៅក្នុងហ្នឹងក៏មានការចូលរួមពីមន្ទីរសាធារណការដែរ។ អញ្ចឹងមិនមែនថា [ខាងមន្ត្រី]ជំនាញនិងក្រុងមិនបានយកចិត្តទុកដាក់ទេ យើងខិតខំប្រឹងប្រែងធ្វើប៉ុន្តែមាននីតិវិធីក្នុងការធ្វើ»។
បើតាមប្រជាពលរដ្ឋដែលត្រូវបានសម្ភាស បានឱ្យដឹងថា បញ្ហាដីហុយដែលបានកើតឡើងប្រមាណ៣ទៅ៤ឆ្នាំហើយ អាជ្ញាធរបានត្រឹមតែប្រើប្រាស់ឡានដើម្បីបាញ់ទឹកបន្ថយភាពហុយម្តងម្កាលប៉ុណ្ណោះ ប៉ុន្តែពួកគេថា ចំណាត់ការនេះហាក់មិនមានប្រសិទ្ធភាពនោះទេ៕
អត្ថបទ៖ ទួក ពិសិដ្ឋ
