យុវជនស្ម័គ្រចិត្តកម្ពុជាមួយក្រុមបង្កើតគម្រោងរក្សាបរិស្ថានស្អាតក្នុងគោលដៅបណ្តុះស្មារតីប្រជាពលរដ្ឋឱ្យចូលរួមថែរក្សាបរិស្ថាន និងជំរុញឱ្យមានការចេះទុកដាក់សំរាមបានត្រឹមត្រូវ បានត្រៀមកម្លាំង៥០០០នាក់ធ្វើសកម្មភាពរាល់ខែនៅរាជធានីខេត្តចំនួន៥។
លោកហួរ ឆៃងន់ ស្ថាបនិកក្រុមក្រៀលកម្ពុជា និងជាប្រធានគម្រោងរក្សាបរិស្ថានស្អាតបានឱ្យដឹងថាគម្រោងនេះ គឺជាគម្រោងសាកល្បងមួយដែលនឹងត្រូវអនុវត្តន៍ដោយចាប់ផ្តើមក្នុងខែកុម្ភៈ រហូតដល់ចុងឆ្នាំ២០២១ ក្នុងរាជធានីខេត្តចំនួន៥រួមមាន រាជធានីភ្នំពេញ ខេត្តសៀមរាម ខេត្តបាត់ដំបង ខេត្តកែប និងខេត្តកំពត ។
លោកបញ្ជាក់ថា គោលបំណងបង្កើតគម្រោងនេះគឺដើម្បីសម្អាតបរិស្ថានដែលមាននៅតាមដងផ្លូវ ការបណ្តុះស្មារតីប្រជាពលរដ្ឋកម្ពុជាឱ្យចេះទុកដាក់សំរាមឱ្យបានត្រឹមត្រូវ និងការលើកតម្លៃជាតិសាសន៍តាមរយៈបរិស្ថានស្អាត។
លោក ហួរ ឆៃងន់៖«ទី១យើងចង់សម្អាតសំរាមដែលបោះចោលពាសវាលពាសកាលទាំងអស់ហ្នឹង។ទី២ជារឿងសំខាន់មែនទែនក្នុងចំណោមរឿងសំខាន់ទាំងអស់ យើងចង់Build ស្មារតីស្រលាញ់បរិស្ថាន ស្មារតីនៃការចូលរួមរបស់ប្រជាពលរដ្ឋថែរក្សាបរិស្ថានរួមគ្នា ជាក់ស្តែងយើងដឹងហើយថា មិនអាចទៅរើសសំរាមហ្នឹងរហូតបានទេត្រួវតែអប់រំពួកគាត់សម្អាតសំរាមនៅក្នុងខួរក្បាលដែលគេឩស្សាហ៍និយាយ។រឿងសំខាន់ទី៣លើកតម្លៃជាតិសាសន៍ ទៅណាមកណាស្អាត មានអនាម័យតាមពិធីបុណ្យទានម្តងៗ អត់មានសំរាមតាមផ្លូវទាំងអស់ វាជាគម្រោងមួយល្អ។»
លោកបន្តថាគម្រោងថ្មីមួយនេះត្រូវបានបង្កើតជាចលនាឱ្យពលរដ្ឋចូលរួមកិច្ចការថែរក្សារិស្ថានគ្រប់រូបភាព ដើម្បីជំរុញឱ្យមានការថែរក្សាបរិស្ថាននៅទូទាំងប្រទេសកម្ពុជា ហើយថាបន្ទាប់ពីអនុវត្តក្នុងរាជធានីខេត្តចំនួន៥នេះ លោកគ្រោងអនុវត្តន៍នៅតាមបណ្តាខេត្តដទៃទៀត ប្រសិនបើគម្រោងនេះទទួលបានជោគជ័យ។
លោក ហួរ ឆៃងន់៖«ក្នុងការដែលយើងចំណាយពេលវេលាទាំងកម្លាំងកាយចិត្តពេលមួយឆ្នាំនឹង វាជាគម្រោងសាកល្បងផងដែរ ជាការជំរុញឱ្យមានការថែរក្សាបរិស្ថាន ទី១ យើងបង្កើតចលនាសំអាតក្នុងខេត្តគោលដៅ ដែលជំរុញឱ្យមានការថែរក្សាបរិស្ថាននៅទូទាំងប្រទេសរាល់ឆ្នាំបន្តទៀត យើងនឹងបង្កើតការអប់រំគ្រប់រូបភាពដូចជាការប្រគួតប្រជែង ផលិតវិឌីអូ ការសរសេរពាក្យស្លោក ការលើកទឹកចិត្តឱ្យចូលរួមដោយផ្ទាល់»។
ស្ថាបនិកក្រុមក្រៀលកម្ពុជារូបនេះបានឱ្យដឹងថា គម្រោងដែលមានឈ្មោះថា រក្សាបរិស្ថានស្អាតនឹងធ្វើឡើងជារៀងរាល់ថ្ងៃអាទិត្យនៃដើមខែនីមួយៗ ដោយលោកបានគៀងគរអ្នកស្ម័គ្រចិត្តចំនួន៥០០០នាក់នៅទូទាំងប្រទេសកម្ពុជា ។
ប្រធានមន្ទីរ បរិស្ថានរាជធានីភ្នំពេញ លោក គាត រង្សី បានថ្លែងគាំទ្រចំពោះរាល់សកម្មភាពរបស់ក្រុមយុវជនដែលតែងតែបានបង្កើតគម្រោងដើម្បីថែរក្សាបរិស្ថាន ដោយថាវាគឺជាផ្នែកមួយដើម្បីជំរុញឱ្យប្រជាពលរដ្ឋមានស្មារតីនៃការចូលរួមក្នុងកិច្ចការងារថែរក្សាបរិស្ថាន។
លោកគាត រង្សី ៖«សម្រាប់យុវជនទាំងអស់មិនថា យុវជនក្រៀលទេ មានយុវជនស្អាត និងយុវជនផ្សេងៗទៀតចូលរួមស្ម័គ្រចិត្តសំអាតបរិស្ថាននេះយើងតែងតែលើកទឹកចិត្តជានិច្ច ហើយយើងក៏ជាអ្នកបំផុស ស្នើសុំឱ្យពលរដ្ឋកម្ពុជា យុវជនជាច្រើនឱ្យមានការចូលរួមបែបហ្នឹង យើងចង់បានណាស់។ ព្រោះជាស្មារតីនៃការចូលរួមទាំងអស់គ្នាក្នុងការទទួលខុសត្រូវទៅលើបញ្ហាសំរាមសំណល់រឹងដែលយើងជាអ្នកបង្កើត។មិនមែនថា ផ្នែកណាមួយទទួលខុសត្រូវនោះទេ គឺជាការចូលរួមទាំងអស់គ្នាទើបប្រទេសរបស់យើង រាជធានីយើង ផ្ទះភូមិដ្នានយើងស្អាតទាំងអស់គ្នាដែរ»។
របាយការណ៍របស់ក្រសួងបរិស្ថានបានបង្ហាញថា ប្រទេសកម្ពុជាបានផលិតសំរាមជាង១ម៉ឺនតោនក្នុងមួយថ្ងៃ ហើយក្នុងរាជធានីភ្នំពេញមានសំរាមជិត៣ពាន់តោន ដោយការប្រើប្រាស់ថង់ប្លាស្ទិកប្រមាណជាង១០លានថង់ក្នុងមួយថ្ងៃ។
របាយការណ៍ដដែលបញ្ជាក់ថា បរិមាណសំរាមនៅទូទាំងប្រទេសកម្ពុជាមានប្រមាណជិត៤លានតោនក្នុងមួយឆ្នាំ។
បើតាមស្ថាបនិកក្រុមក្រៀលកម្ពុជាលោក ហួរ ឆៃងន់ បានបញ្ជាក់ថា ក្រុមក្រៀលកម្ពុជាគឺជាក្រុមយុវជនស្ម័គ្រចិត្ត បានបង្កើតឡើងនៅឆ្នាំ ២០១៨ ដោយធ្វើកិច្ចការងារផ្តោតទៅលើការថែរក្សាបរិស្ថាន ហើយពួកគេបានបង្កើតជាកម្មវិធីសំអាតបរិស្ថានក្នុងប្រទេសកម្ពុជាជាបន្តបន្ទាប់នាពេលកន្លងមក៕
អត្ថបទដោយ ទួក ពិសិដ្ឋ
