រដ្ឋមន្ត្រីក្រសួងមហាផ្ទៃ លោក ស ខេង បញ្ជាទៅគណៈបញ្ជាការកងឯកភាពរាជធានី-ខេត្ត ពង្រឹងការផ្តល់សេវាសាធារណៈជូនប្រជាពលរដ្ឋឱ្យមានប្រសិទ្ធភាព ជាពិសេសត្រូវពិនិត្យនិងលុបបំបាត់ករណីមន្ត្រីពន្លត់អគ្គិភ័យទារប្រាក់ពីជនរងគ្រោះជាថ្នូរនឹងការបាញ់ទឹកពន្លត់អគ្គិភ័យ។
ក្នុងពេលប្រារព្ធទិវាអន្តរជាតិរំឭកដល់ជនរងគ្រោះដោយគ្រោះថ្នាក់ចរាចរណ៍ផ្លូវគោក នៅខេត្តកណ្តាល នាព្រឹកថ្ងៃអង្គារនេះ លោក ស ខេង បានលើកឡើងថា កន្លងមក លោកកត់សម្គាល់ឃើញមានករណីមន្ត្រីមួយចំនួនបានទៅដល់កន្លែងកើតហេតុហើយ តែមិនធ្វើសកម្មភាពបាញ់ពន្លត់អគ្គិភ័យភ្លាមៗនោះទេ តែបែរជានៅតថ្លៃជាមួយជនរងគ្រោះទៅវិញ។
ករណីនេះ លោកបានណែនាំដល់គណៈបញ្ជាការកងឯកភាពរាជធានី-ខេត្តទាំងអស់ឱ្យពិនិត្យនិងត្រូវលុបបំបាត់ឱ្យខានតែបាន។
លោក ស ខេង ថ្លែងថា៖ «ឡានទៅដល់ហើយ បញ្ឈរច្រូងនៅកន្លែងកើតហេតុហ្នឹង តែអត់ទាន់បាញ់ទេ។ មានភ្លើងភ្លឹបភ្លែតនៅហ្នឹង ឡានព្រោងព្រាត អត់ទាន់បាញ់ នៅតថ្លៃគ្នាសិន។ ឃើញទេ អានេះដែលចង់និយាយថា សមត្ថកិច្ចយើងខុសហើយ ប្រតិបត្តិករយើងខុសហើយ មិនត្រូវទេ អ៊ីចឹងហើយបានថា គ្រប់កន្លែង ជាពិសេសទីប្រជុំជន ទីក្រុង គឺត្រូវមើលអាហ្នឹង»។
លោកបន្តថា៖ «មានឡាន ឡានរបស់រដ្ឋ ប្រេងរបស់រដ្ឋ លោកស៊ីប្រាក់ខែរដ្ឋ ការពិត ហើយជួនគ្នាប្រាក់ខែតិចតួច យើងយល់បញ្ហាហ្នឹង យើងត្រូវមានគោលនយោបាយលើកទឹកចិត្ត។ ប៉ុន្តែបងប្អូនមិនត្រូវបំពេញបេសកកម្មដោយយកអាហ្នឹងធ្វើអាជីវកម្មផ្ទាល់ខ្លួនទេ អាហ្នឹងវាអត់ត្រូវទេ ខុស »។
ប្រធាននាយកដ្ឋានបង្ការ និងពន្លត់អគ្គិភ័យនៃក្រសួងមហាផ្ទៃ លោក នេត វន្ថា បានស្វាគមន៍ចំពោះការណែនាំរបស់ថ្នាក់ដឹកនាំក្រសួងមហាផ្ទៃ។ តែយ៉ាងណា លោកអះអាងថា ក្នុងរយៈពេល១០ឆ្នាំចុងក្រោយនេះ មិនមានករណីមន្ត្រីពន្លត់អគ្គិភ័យទារប្រាក់ពីប្រជាពលរដ្ឋទៀតឡើយ។
លោកមានប្រសាសន៍ថា៖ «ប្រសិនបើពីអតីតកាល យើងធ្លាប់មានពាក្យចចាមអារ៉ាម ប៉ុន្តែសម្រាប់ដប់ឆ្នាំមកនេះ បន្ទាប់ពីមានការណែនាំនិងចង្អុលដោយផ្ទាល់ពីនាយឧត្តមសេនីយ៍សន្តិបណ្ឌិតមក យើងឃើញថា គ្រប់អង្គភាពទាំងអស់ យើងមានសកម្មភាពល្អប្រសើរ ហើយមានការចូលរួមពីអ្នកដឹកនាំក្នុងស្មារតីខ្ពស់ អ៊ីចឹងពុំមានករណីបែបហ្នឹងកើតឡើងទៀតទេ»។
ទោះជាយ៉ាងណា លោកក៏មិនទាន់បដិសេធទាំងស្រុងដែរ ដោយថា ប្រសិនបើមានករណីបែបហ្នឹងកើតឡើងមែន លោកស្នើឱ្យប្រជាពលរដ្ឋរាយការណ៍ទៅកាន់ប្រធានអង្គភាពពន្លត់អគ្គិភ័យ ឬអគ្គស្នងការ ឬស្នងការដ្ឋាននគរបាលរាជធានី-ខេត្ត ដើម្បីមានវិធានការទៅលើមន្ត្រីពន្លត់អគ្គិភ័យដែលប្រព្រឹត្តកំហុសឆ្គងនេះ។
បើតាមលោក នេត វន្ថា នៅទូទាំងប្រទេស មានរថយន្តពន្លត់អគ្គិភ័យចំនួនជិត៤០០គ្រឿង និងកងកម្លាំងជាង១ ០០០នាក់។
លោក ឡាំង សេត ប្រជាពលរដ្ឋរងគ្រោះពីអគ្គិភ័យដែលឆេះឃ្លាំងស្តុកទំនិញមួយកន្លែង នៅសង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញ កាលពីថ្ងៃទី២៩ ខែមករា បានប្រាប់ថា លោកមិនបានដឹងពីការទារប្រាក់របស់ក្រុមពន្លត់អគ្គិភ័យ ជាថ្នូរនឹងការបាញ់ពន្លត់អគ្គិភ័យនោះទេ។
ប៉ុន្តែលោកបានរិះគន់ការអន្តរាគមន៍របស់មន្ត្រីទាំងនោះ ថាមានភាពយឺតយ៉ាវ ដែលធ្វើឱ្យទំហំនៃការខូចខាតមានកាន់តែធំ។ លោកបន្តថា អគ្គិភ័យនោះបានបណ្តាលឱ្យកម្មករពីរនាក់ស្លាប់ និងឆេះឃ្លាំងស្តុកទំនិញទំហំ២១ម៉ែត្រគុណ២៥ម៉ែត្រ រួមទាំងសម្ភារ និងបានបណ្តាលឱ្យឆេះរាលដាលដល់លំនៅដ្ឋានរបស់ប្រជាពលរដ្ឋជិតខាងចំនួន៣ល្វែង។
លោក ឡាំង សេត មានប្រសាសន៍ថា៖ «រៀបចំទាញទុយោបាញ់ ជួនកាល ឡានបាញ់មិនចេញទឹក នឹកឃើញឡើងចង់ស្ទះងាប់ហើយ ព្រោះផ្ទះវាឆេះមួយចំហៀងមកហើយ ដល់អ៊ីចឹងវាភ័យខ្លាំង បានបាញ់មួយសន្ទុះខ្លាំងទៅ បានវារាងអន់»។
ប្រធានសម្ព័ន្ធភាពគណនេយ្យភាពសង្គម លោក សន ជ័យ មើលឃើញថា កង្វះខាតសម្ភារ និងឧបករណ៍ក្នុងការពន្លត់អគ្គិភ័យ អាចជាលេសដែលធ្វើឱ្យមន្ត្រីខិលខូចមួយចំនួនទាមទារប្រាក់បន្ថែមពីជនរងគ្រោះ។
លោកថា៖ «បានន័យថា ទុយោនៅតូច ទុយយោនៅខ្លី មធ្យោបាយនៃការបាញ់ទឹកនោះ យើងមើលទៅវាមិនសមគ្នាទៅនឹងទំហំនៃអគ្គិភ័យ។ ការខ្វះខាតបែបនេះហើយ ខ្ញុំយល់ថា ជាលេសដែលធ្វើឱ្យមន្ត្រីខិលខូចខ្លះយកលេសថា ខ្វះនេះខ្វះនោះ អ៊ីចឹងទៅស្ថាប័នត្រូវជួយបំពេញនេះ បំពេញនោះអ៊ីចឹងទៅ ដើម្បីអាចបាញ់ពន្លត់អគ្គិភ័យបាន»។
យោងតាមរបាយការណ៍របស់នាយកដ្ឋានបង្ការពន្លត់អគ្គិភ័យ និងសង្គ្រោះនៃក្រសួងមហាផ្ទៃ បានឱ្យដឹងថា គ្រោះអគ្គិភ័យនៅក្នុងឆ្នាំ២០២០ បានកើតឡើងចំនួន៩៣៧ករណី បណ្ដាលឱ្យមនុស្ស២៤នាក់ស្លាប់ និង៣៦នាក់ទៀតរងរបួស ខណៈផ្ទះចំនួន៧០៧ខ្នង និងតូបលក់ដូរចំនួន៥៩៤ខ្នង ព្រមទាំងទ្រព្យសម្បត្តិជាច្រើនទៀត បានរងនូវការខូចខាត។ របាយការណ៍បានឱ្យដឹងថា គ្រោះអគ្គិភ័យឆ្នាំ២០២០ កើនឡើងចំនួន២២០ករណី បើធៀបនឹងឆ្នាំ២០១៩៕