អាជ្ញាធរខេត្តព្រះសីហនុ ប្រាប់ឱ្យពលរដ្ឋដែលរស់នៅនិងកំពុងប្រកបអាជីវកម្មនៅលើដីចំណីឆ្នេរពយយាយម៉ី និងឆ្នេរតាបារាំង ស្ថិតក្នុងឃុំកែវផុស ស្រុកស្ទឹងហាវ រុះរើសំណង់ផ្សេងៗចេញពីទីនោះឱ្យបានមុនចុងខែកុម្ភៈនេះ ខណៈអាជ្ញាធរគ្រោងអភិវឌ្ឍទីនោះទៅជាលំហឆ្នេរសាធារណៈ ឱ្យភ្ញៀវទេសចរទៅលេងកម្សាន្ត។
យោងតាមសេចក្តីជូនដំណឹងរបស់រដ្ឋបាលខេត្តព្រះសីហនុ កាលពីថ្ងៃទី០២ ខែកុម្ភៈ ឆ្នាំ២០២១ បានបង្គាប់ឱ្យប្រជាពលរដ្ឋដែលកំពុងរស់នៅនិងប្រកបអាជីវកម្មលើដីចំណីឆ្នេរពយយាយម៉ី និងឆ្នេរតាបារាំង រុះរើសំណង់រឹងនិងសំណង់ផ្សេងៗនៅត្រឹមថ្ងៃទី២៨ ខែកុម្ភៈខាងមុខនេះ។
រដ្ឋបាលខេត្តព្រមានថា ក្នុងករណីមិនរុះរើតាមការជូនដំណឹងនេះទេ អាជ្ញាធរខេត្តនឹងចុះអនុវត្តវិធានការរដ្ឋបាលនិងវិធានការច្បាប់ ដោយមិនទទួលខុសត្រូវរាល់ការខូចខាតសម្ភារនោះឡើយ។
អ្នកនាំពាក្យរដ្ឋបាលខេត្តព្រះសីហនុ លោក ឃាង ភារម្យ មានប្រសាសន៍នៅថ្ងៃពុធនេះថាអាជ្ញាធរខេត្តគ្រោងនឹងរៀបចំអភិវឌ្ឍតំបន់ឆ្នេរទាំងពីរនេះជាលំហឆ្នេរសាធារណៈ ដើម្បីឱ្យភ្ញៀវទេសចរទៅលេងកម្សាន្ត ដែលករណីនេះ តម្រូវឱ្យពលរដ្ឋដែលសាងសង់សំណង់មិនរៀបរយរំលោភលើដីចំណីឆ្នេរ ត្រូវរុះរើចេញ។
លោកថា៖ «គោលបំណងជារួមរបស់យើង គឺអនុវត្តតាមសារាចរលេខ០១ របស់គណៈកម្មាធិការគ្រប់គ្រងនិងអភិវឌ្ឍន៍តំបន់ឆ្នេរសមុទ្រកម្ពុជា ហើយយើងរៀបចំតំបន់ឆ្នេរនោះ ជាលំហសាធារណៈ»។
រដ្ឋបាលខេត្តព្រះសីហនុ បញ្ជាក់ដែរថា សំណង់របស់ប្រជាពលរដ្ឋដែលតម្រូវឱ្យរុះរើនោះ ជាសំណង់ដែលសង់នៅលើដីចំណីឆ្នេរសាធារណៈរបស់រដ្ឋ ដែលធ្វើឱ្យប៉ះពាល់ដល់បរិស្ថាន អនាម័យ សណ្តាប់ធ្នាប់ និងសោភ័ណភាពឆ្នេរ។
លោក ឆាយ សុគន្ធដា អភិបាលស្រុកស្ទឹងហាវ បានឱ្យវីអូឌីដឹងថា នៅចំពោះមុខ អាជ្ញាធរបានរកឃើញសំណង់រឹងមាំចំនួនពីរដែលសង់រំលោភលើដីចំណីឆ្នេរ ហើយត្រូវប្រឈមឱ្យរុះរើចេញដោយមិនមានសំណងនោះឡើយ។
លោកថា៖ «គោលដៅយើងឱ្យគាត់រុះរើហ្នឹង គឺអ្នកដែលសង់រំលោភលើដីចំណីឆ្នេរ លើឆ្នេរ ហើយប៉ះពាល់ដល់បរិស្ថាន ខ្លះមានដល់បន្ទប់ទឹក បង្គន់ ឬក៏ស្នាក់នៅអ៊ីចឹង។ ប៉ុន្តែមិនច្រើនទេ។ អានេះគ្រាន់តែយើងមានវិធានការការពារឆ្នេរឱ្យហើយ»។
យុវជនម្នាក់ដែលប្រកបរបរអាជីវកម្មនៅលើតំបន់ឆ្នេរនេះ បានអះអាងដោយសុំមិនបញ្ចេញឈ្មោះថា ប្រជាពលរដ្ឋមួយចំនួនទំនងជាមិនយល់ព្រមឱ្យរុះរើនោះទេ។
លោកថា៖ «ប្រហែលជាប្រជាជនមិនព្រមទេ។ បើរដ្ឋាភិបាលអត់បានចូលរួមអភិវឌ្ឍន៍ [តំបន់ឆ្នេរហ្នឹង] អីផង។ បើខ្ញុំប្រកបមុខរបរតែមួយរស់ៗហ្នឹង។ តែបើយើងមិនឱ្យដាក់ [កញ្ចុះ] នៅលើឆ្នេរហ្នឹង តើភ្ញៀវទេសចរមកលេងអ្វី?»
បើតាមអាជីវកររូបនេះ ឆ្នេរពយយាយម៉ី និងឆ្នេរតាបារាំង ដែលមានឆ្នេរខ្សាច់សក្បុស និងជាកន្លែងទាក់ទាញទេសចរណ៍ថ្មីនោះ មានប្រវែងប្រមាណជាង៣គីឡូម៉ែត្រ និងប្រជាពលរដ្ឋរស់នៅតំបន់នោះប្រមាណជាង១០០គ្រួសារ ប៉ុន្តែមានតែពលរដ្ឋមួយចំនួនតូចប៉ុណ្ណោះដែលបានសាង់តូបលក់ដូរនៅលើដីចំណីឆ្នេរនោះ។
លោកស្រី ជាប សុធារី អ្នកសម្របសម្រួលសមាគមការពារសិទ្ធិមនុស្សអាដហុកប្រចាំខេត្តព្រះសីហនុ បានកត់សម្គាល់ថា រដ្ឋបាលខេត្តហាក់ទើបចាប់អារម្មណ៍អភិវឌ្ឍន៍តំបន់ឆ្នេរទាំងពីរនេះ ក្រោយពេលឃើញភ្ញៀវទេសចរទៅលេងកម្សាន្តច្រើននារយៈពេលចុងក្រោយនេះ។
លោកស្រីបារម្ភថា វិធានការរបស់រដ្ឋបាលខេត្តអាចនឹងធ្វើឱ្យប៉ះពាល់ដល់ការប្រកបមុខរបររបស់ប្រជាពលរដ្ឋតូចតាច។
លោកស្រីថា៖ «ការជូនដំណឹងរបស់អាជ្ញាធរក្នុងការហាមឃាត់ប្រជាពលរដ្ឋដែលមានមុខរបរអាជីវកម្ម ក្នុងការលក់ដូរនៅលើតំបន់ឆ្នេរនេះ វាមិនមែនជាលើកទីមួយនោះទេ។ អាជ្ញាធរ ធ្លាប់ជូនដំណឹងដល់ប្រជាពលរដ្ឋនៅតំបន់ឆ្នេរអូរត្រេះ ឆ្នេរអូរឈើទាល កន្លងមកហ្នឹង វាមានញឹកញាប់ដែរ រហូតដល់វិធានការក្តៅគគុកថែមទៀត»។
គួរបញ្ជាក់ថា ក្រោមសារាចរណែនាំរបស់រដ្ឋាភិបាលកម្ពុជា ស្តីពីការអភិវឌ្ឍតំបន់ឆ្នេរសមុទ្រកម្ពុជា កាលពីខែកុម្ភៈ ឆ្នាំ២០១២ តំបន់ឆ្នេរសមុទ្រខេត្តព្រះសីហនុ ដូចជា ឆ្នេរអូរត្រេះ ឆ្នេរអូរឈើទាល និងឆ្នេរជំទាវម៉ៅ ជាដើម ត្រូវបានរៀបចំអភិវឌ្ឍជាបន្តបន្ទាប់ក្នុងស្តង់ដារតែមួយ។ ការរៀបចំអភិវឌ្ឍនេះ ត្រូវបានគេកត់សម្គាល់ដែរថា គឺបន្ទាប់ពីការមកដល់យ៉ាងគំហុកនៃជនជាតិចិន នៅក្នុងខេត្តព្រះសីហនុ៕