រដ្ឋមន្រ្តីក្រសួងសាធារណការ និងដឹកជញ្ជូន ឱ្យដឹងថា អ្នកបើកបររថយន្តធុនធំៗប្រមាណ ៣៣% មិនមានបណ្ណបើកបរ ឬបណ្ណបើកបរដែលមាននោះមិនត្រឹមត្រូវតាមប្រភេទយានយន្តឡើយ ដែលករណីនេះអាចបង្កគ្រោះថ្នាក់ចរាចរណ៍ជាយថាហេតុ។
ក្នុងពិធីសម្ពោធមជ្ឈមណ្ឌលបណ្ដុះបណ្ដាលបើកបរយានយន្តធុនធ្ងន់ នៅសង្កាត់សំរោង ខណ្ឌព្រែកព្នៅ រាជធានីភ្នំពេញ នៅថ្ងៃទី០៤ ខែកុម្ភៈនេះ រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល មានប្រសាសន៍ថា ចាប់តាំងពីឆ្នាំ១៩៩០ ដល់ឆ្នាំ២០២០ ក្រសួងបានចុះបញ្ជីយានយន្តធុនធ្ងន់បានចំនួន ៣១៥ ០០០ គ្រឿង ប៉ុន្តែក្នុងនេះ ក្រសួងបានផ្តល់បណ្ណបើកបរបានតែ ២១៨ ០០០ គ្រឿង ប៉ុណ្ណោះ។
លោកបន្តថា បើប្រៀបធៀបតួលេខរថយន្តចុះបញ្ជី និងការផ្តល់បណ្ណ បង្ហាញថា អ្នកបើកបរយានយន្តធុនធ្ងន់មានបណ្ណបើកបរតែ៦៧ភាគរយប៉ុណ្ណោះ ខណៈ៣៣ភាគរយទៀតដែលកំពុងបើកបរលើដងផ្លូវ មិនមានបណ្ណបើកបរ ឬបើមានក៏បណ្ណបើកបរនោះមិនត្រឹមត្រូវតាមប្រភេទយានយន្តឡើយ។
លោករដ្ឋមន្ត្រីបានចោទជាសំណួរថា៖ «តើរថយន្តធុនធំទាំងនោះអត់បើកបរ ឬក៏បើកបរដោយអ្នកគ្មានបណ្ណបើកបរត្រឹមត្រូវ?»
ជាមួយគ្នានេះ លោកទេសរដ្ឋមន្ត្រី ស៊ុន ចាន់ថុល បានអំពាវនាវដល់អ្នកបើកបររថយន្តធុនធ្ងន់ ដែលមិនទាន់មានបណ្ណបើកបរទាំងនោះ ត្រូវទៅរៀនយកបណ្ណបើកបរឱ្យបានត្រឹមត្រូវទៅតាមប្រភេទយានយន្ត។
លោកថ្លែងថា៖ «សូមអំពាវនាវទៅកាន់អ្នកបើកបរដែលគ្មានបណ្ណបើកបរទៅតាមប្រភេទយានយន្ត សុំឈប់បើកបរយានយន្តនោះ។ បើគ្មានបណ្ណបើកបរត្រឹមត្រូវ សុំឈប់! ហើយសុំមករៀនបើកបរឱ្យបានត្រឹមត្រូវនៅមជ្ឈមណ្ឌលបណ្តុះបណ្តាលបើកបរយានយន្តធុនធ្ងន់នៅទីនេះ»។
លោករដ្ឋមន្ត្រីក៏បានណែនាំឱ្យមន្ត្រីជំនាញបច្ចេកទេសក្រោមឱវាទ ពិចារណាលើការដកអាជ្ញាបណ្ណបណ្តុះបណ្តាលបើកបរយានយន្តដែលបានចេញទៅឱ្យក្រុមហ៊ុនទាំងឡាយដែលមិនបានធ្វើប្រតិបត្តិការរបស់ខ្លួនអស់រយៈពេលជាច្រើនឆ្នាំកន្លងមកផងដែរ។
អ្នកជំនាញផ្នែកចរាចរណ៍ផ្លូវគោកនៃវិទ្យាស្ថានសុវត្ថិភាពចរាចរណ៍ លោក គង់ រតនៈ បានចាត់ទុកថា តួលេខ៣៣ភាគរយនេះគឺជាចំនួនដ៏ច្រើន ខណៈលោកបានកត់សម្គាល់ឃើញថា អ្នកបើកបររថយន្តធុនធ្ងន់មួយចំនួនមានវ័យក្មេងៗ ដែលតែងតែបង្កគ្រោះថ្នាក់ចរាចរណ៍ហើយរត់យករួចខ្លួនតែម្តង។
លោកមានប្រសាសន៍ថា៖ «ខ្ញុំគិតថា ពួកគាត់គួរតែត្រូវបានត្រួតពិនិត្យបណ្ណបើកបរហ្នឹងតាំងពីដើមទី មិនមែនត្រឹមតែត្រួតពិនិត្យពេលដែលគាត់បើកបរលើដងផ្លូវហើយទេ។ ហើយសម្រាប់ក្រុមហ៊ុនមានឡានបើកបរឡានធំហ្នឹង យើងឱ្យគាត់ផ្ញើឈ្មោះអ្នកបើកបរទៅក្រសួងទៅ ហើយយើងត្រួតពិនិត្យឱ្យហើយទៅ មុននឹងគាត់បើកបរ។ អ៊ីចឹងនរណាខ្លះមានបណ្ណត្រឹមត្រូវ មានសុពលភាពត្រឹមត្រូវអត់ ហ្នឹងទើបជារឿងប្រសើរ»។
បើតាមក្រសួងសាធារណការ មជ្ឈមណ្ឌលបណ្ដុះបណ្ដាលបើកបរយានយន្តធុនធ្ងន់ ដែលទើបបង្កើតឡើងជាលើកដំបូងនៅកម្ពុជា និងត្រូវបានសម្ពោធនៅថ្ងៃនេះ នឹងមានលទ្ធភាពទទួលការបណ្តុះបណ្តាលនិងប្រលងយកបណ្ណបើកបរយានយន្តប្រភេទ «គ» ដល់ប្រភេទ «ង» ប្រមាណ ២៦០០នាក់។
លោកទេសរដ្ឋមន្ត្រី ស៊ុន ចាន់ថុល បានចាត់ទុកការបង្កើតឱ្យមានមជ្ឈមណ្ឌលថ្មីនេះ ថាជាការខិតខំមួយទៀតរបស់រដ្ឋាភិបាលក្នុងការកាត់បន្ថយគ្រោះថ្នាក់ចរាចរណ៍នៅលើដងផ្លូវ។
បើតាមលោករដ្ឋមន្ត្រី ចំនួនអ្នកស្លាប់ដោយសារគ្រោះថ្នាក់ចរាចរណ៍កាលពីឆ្នាំ២០១៩ មានចំនួន២ ១៥២នាក់ ក្នុងនោះ អ្នកស្លាប់ដែលបង្កឡើងដោយរថយន្តធុនធ្ងន់មានចំនួន១៨១នាក់។
លោកបន្តថា ក្នុងចំណោមអ្នកស្លាប់ទាំងនោះ មានមនុស្ស៩១នាក់ស្លាប់ដោយគ្រោះថ្នាក់ចរាចរណ៍ដែលបង្កឡើងដោយរថយន្តធុនធំប្រភេទដឹកអ្នកដំណើរ និង៩០នាក់ស្លាប់ដោយសាររថយន្តធុនធ្ងន់ប្រភេទដឹកទំនិញ៕
កែតម្រូវ៖ វីអូឌីសូមធ្វើការកែតម្រូវកថាខណ្ឌទី៨៖ «អ្នកជំនាញផ្នែកចរាចរណ៍ផ្លូវគោកនៃវិទ្យាស្ថានសុវត្ថិភាពចរាចរណ៍ លោក គង់ រតនៈ…»។ ខ្លឹមសារដែលត្រឹមត្រូវគឺ «អ្នកជំនាញផ្នែកចរាចរណ៍ផ្លូវគោក លោក គង់ រតនៈ…»។