លោកនាយករដ្ឋមន្ត្រី ហ៊ុន សែន នៅថ្ងៃនេះបានចេញបទបញ្ជាជាបន្ទាន់ ទៅអាជ្ញាធរខេត្តជាប់ ព្រំដែនកម្ពុជា-វៀតណាម ឱ្យរឹតបន្តឹងការឆ្លងព្រំដែនរវាងប្រជាជននៃប្រទេសទាំងពីរ ខណៈ ជំងឺកូវីដ១៩នៅក្នុងប្រទេសវៀតណាម បានឆ្លងចូលទៅក្នុងសហគមន៍ ហើយកំពុងរីក សាយភាយ នៅក្នុងតំបន់ភាគខាងជើង ភាគកណ្តាល និងភាគខាងត្បូងនៃប្រទេសនេះ។
តាមរយៈសារជាសំឡេងដែលត្រូវបានផ្សព្វផ្សាយនៅថ្ងៃនេះ លោកនាយករដ្ឋមន្ត្រី ហ៊ុន បានបញ្ជាឱ្យអាជ្ញាធរខេត្តជាប់ព្រំដែនកម្ពុជា-វៀតណាម ដាក់ពង្រាយកងកម្លាំងចាប់ពី ព្រំដែនខេត្តកំពត រហូតដល់ព្រំដែនខេត្តរតនគីរី សំដៅរឹតបន្តឹងការឆ្លងដែនទៅមក រវាង ប្រជាជននៃប្រទេសទាំងពីរ។
លោកបន្តថា ក្នុងករណីដែលប្រជាពលរដ្ឋវៀតណាម ឆ្លងដែនចូលមកប្រទេសកម្ពុជា គឺតម្រូវឱ្យធ្វើចត្តាឡីស័ករយៈពេល១៤ថ្ងៃជាកំហិត។
លោកបានមានប្រសាសន៍ថា៖ «ប្រសិនបើកម្ពុជាមានការធ្វេសប្រហែស នោះកម្ពុជានឹងខ្ទេចខ្ទាំ ដោយជំងឺកូវីដ១៩។ នេះជាវិធានការបន្ទាន់ ដើម្បីឆ្លើយតប ជាមួយនឹងសភាពការណ៍ដែលកំពុងហ៊ុំព័ទ្ធយើង ពីទិសខាងលិច គឺព្រំដែនកម្ពុជា-ថៃ និងព្រំដែនខាងកើត គឺព្រំដែនកម្ពុជា-វៀតណាម។ ប្រសិនបើយើងមានការធ្វេសប្រហែស ប្រទេសយើងនឹងខ្ទេចខ្ទាំទៅដោយកូវីដ១៩ ដែលរុញច្រានមកពីប្រទេសថៃមកផង និងរុញច្រានមកពីប្រទេសវៀតណាមមកផង»។
បើតាមលោកនាយករដ្ឋមន្ត្រី ហ៊ុន សែន អ្វីដែលលោកកំពុងព្រួយបារម្ភខ្លាំងនៅពេលនេះ គឺការឆ្លងព្រំដែនរវាងប្រជាជននៃប្រទេសទាំងពីរ នៅក្នុងឱកាសនៃពិធីបុណ្យចូលឆ្នាំចិន វៀតណាម នៅពេលខាងមុខនេះ។
លោកមានប្រសាសន៍ថា៖ «កន្លងមក នៅតាមព្រំដែនកម្ពុជា-វៀតណាម យើងមិនមានកង្វល់ច្រើនទេ ដោយសារយើងមិនមានពលករនៅក្នុងប្រទេសវៀតណាមទេ។ តែអ្វីដែលជាកង្វល់របស់យើង គឺនៅជិតពេលចូលឆ្នាំវៀតណាមនេះ អាចនឹងមានពលរដ្ឋកម្ពុជាឆ្លងទៅវៀតណាម ឬអនិកជនវៀតណាមរស់នៅកម្ពុជាឆ្លងទៅវៀតណាម ហើយក៏ឆ្លងចូលមកកម្ពុជាវិញ។ នេះគឺជារឿង ដែលយើងត្រូវប្រុងប្រយ័ត្ន ហើយត្រូវតែដោះស្រាយបញ្ហានេះជាបន្ទាន់។ សូមអាជ្ញាធរខេត្តចាត់វិធានការ ពង្រាយកងកម្លាំងជាបន្ទាន់នៅតាមព្រំដែនកម្ពុជា វៀតណាម»។
ទទួលបានបទបញ្ជានេះភ្លាម អភិបាលខេត្តកណ្តាល លោក គង់ សុភ័ណ្ឌ បានចុះទៅអនុវត្តភ្លាមដែរ។
លោកគង់ សុភ័ណ្ឌ បានថ្លែងថាខេត្តកណ្តាលមានច្រកព្រំដែនផ្លូវការចំនួន៤ គឺច្រកអន្តរជាតិពីរ និងច្រកតំបន់ចំនួនពីរ។
លោកមានប្រសាសន៍ថា៖ «ពេលប្រសាសន៍សម្តេចផ្សព្វផ្សាយហ្នឹង យើងទទួលភ្លាម ហើយយកបញ្ជាដឹកនាំអនុវត្តភ្លាម នៅជុំវិញស្រុកពីរ គឺស្រុកលើកដែក និងស្រុកកោះធំ ដែលយើងត្រូវរៀបចំបញ្ជាការឯកភាពរបស់យើង ហើយជាពិសេស គឺច្រកទ្វារអន្តរជាតិ ច្រកទ្វារតំបន់ គឺយើងពង្រឹងដាច់ខាត មិនឱ្យមានការឆ្លងដែនចេញចូលទេ។ ហើយបើមាន គឺត្រូវធ្វើចត្តាឡីស័ក១៤ថ្ងៃ។ យើងមានមណ្ឌលចត្តាឡីស័ករួចរាល់ហើយ»។
ក្រៅពីបទបញ្ជាបន្ទាន់របស់ប្រមុខរដ្ឋាភិបាលកម្ពុជា នៅថ្ងៃនេះ ក្រសួងសុខាភិបាល ក៏បានចេញលិខិតជូនដំណឹងមួយ ដោយណែនាំឱ្យអភិបាលរាជធានី-ខេត្តទាំងអស់ បង្កើនការប្រុងប្រយ័ត្ន និងចាត់វិធានការប្រកបដោយប្រសិទ្ធភាពខ្ពស់ ទប់ស្កាត់ និងបង្ការការនាំចូលវីរុសកូវីដ១៩ នៅតាមច្រកព្រំដែនកម្ពុជា-វៀតណាម។
ក្រសួងបានស្រង់ការផ្សព្វផ្សាយរបស់សារព័ត៌មានវៀតណាម Vietname Briefing ចុះផ្សាយកាលពីថ្ងៃទី០៣ ខែកុម្ភៈថា ប្រទេសវៀតណាមថ្មីៗនេះ បាននឹងកំពុងមានការផ្ទុះឡើងវិញនូវការចម្លងនៃវីរុសកូវីដ១៩ នៅក្នុងសហគមន៍ ដែលក្នុងនោះ មានការចម្លងនៃវីរុសកូវីដ១៩បម្លែងថ្មីពីចក្រភពអង់គ្លេសផងដែរ។
គិតមកត្រឹមថ្ងៃទី ០១ កុម្ភៈ ឆ្នាំ២០២១ វៀតណាមបានរកឃើញករណីវិជ្ជមាននៅតាមបណ្តាខេត្តក្រុងចំនួន១០ ដែលក្នុងនោះក៏មានទីក្រុងហាណូយ និងទីក្រុងហូជីមិញផងដែរ ហើយខេត្តក្រុងខ្លះ ក៏មានព្រំប្រទល់នៅជិតប្រទេសកម្ពុជាដែរ៕