មន្ត្រីនាំពាក្យក្រសួងយុត្តិធម៌ បានបោះពាក្យសម្ដីថា បើចង់ឱ្យពន្លឿននីតិវិធីបើកសវនាការលើសំណុំរឿងមេដឹកនាំអតីតបក្សប្រឆាំង លោក កឹម សុខា ឱ្យបានឆាប់ដូចករណីអ្នកដែលកំពុងជាប់ឃុំ លុះត្រាតែលោក កឹម សុខា វិលទៅជាប់ពន្ធនាគារនៅឯត្រពាំងផ្លុងវិញ។
ការលើកឡើងបែបនេះ ជាការឆ្លើយតបទៅនឹងសហមេធាវីការពារក្តីឱ្យលោក កឹម សុខា ដែលបានចាត់ទុកមូលហេតុនៃការបន្តពន្យារពេលសវនាការលើសំណុំរឿងលោក កឹម សុខា ក្រោមហេតុផលនៃជំងឺកូវីដ១៩ និងការជាប់ដៃដោះស្រាយសំណុំរឿងកកស្ទះនៅក្នុងតុលាការនោះ ថាជាមូលហេតុមិនសមហេតុផល។
អ្នកនាំពាក្យក្រសួងយុត្តិធម៌ លោក ជិន ម៉ាលីន មានប្រសាសន៍ឆ្លើយតបទៅនឹងសំណួររបស់អ្នកសារព័ត៌មាន ក្រោយចូលរួមបើកសិក្ខាសាលាស្តីពី«ការរៀបចំយន្តការដោះស្រាយវិវាទក្រៅប្រព័ន្ធតុលាការ» នៅសណ្ឋាគារមួយក្នុងរាជធានីភ្នំពេញ នៅថ្ងៃទី៥ ខែកុម្ភៈនេះថា តុលាការនៅពេលនេះកំពុងជាប់ដៃដោះស្រាយលើសំណុំរឿងកកស្ទះនៅក្នុងតុលាការ ដែលមានជនជាប់ចោទនៅក្នុងពន្ធនាគារ។
លោកបន្តថា បើចង់ពន្លឿននីតិវិធីក្នុងការកាត់ក្តីលើសំណុំរឿងលោក កឹម សុខា លុះត្រាតែលោក កឹម សុខា វិលទៅជាប់ពន្ធនាគារនៅឯត្រពាំងផ្លុងវិញ។
លោក ជិន ម៉ាលីន ថ្លែងថា៖ «ហេតុផលមិនសមរម្យ ជាហេតុផលសម្រាប់គាត់ ជាមេធាវីលោក កឹម សុខា ក៏ប៉ុន្តែជាកត្តាសន្យានុម័ត គឺស្ថាប័នតុលាការមានហេតុផលរបស់គេ ហើយមិនមានស្ថាប័នណាទៅបង្ខំឱ្យតុលាការត្រូវតែបើកសវនាការឬមិនបើក ឬបើកពេលនេះពេលនោះបានទេ ក្រសួងយុត្តិធម៌ក៏មិនអាចបង្ខំបានដែរ នេះជាអំណាចឆន្ទានុសិទ្ធិរបស់ចៅក្រម»។
លោកបន្តថា៖ «គោលដៅនៃយុទ្ធនាការរបស់យើង គឺអាទិភាពទៅលើសំណុំរឿងព្រហ្មទណ្ឌដែលមានមនុស្សនៅក្នុងឃុំ អ៊ីចឹងបានជាសំណុំរឿងផ្សេងទៀតដំណើរការទៅបាន ហេតុអីសំណុំរឿង កឹម សុខា មិនអាចដំណើរការទៅបាន។ បើសិនជាលោក កឹម សុខា ចង់ដំណើរការដូចគេដែរ [គេថា]ទៅក្នុងឃុំវិញទៅ ទៅត្រពាំងផ្លុងវិញទៅ គេយកមកដោះមុនហើយ»។
ឆ្លើយតបនឹងការលើកឡើងនេះ លោក ផែង ហេង សហមេធាវីការពារក្តីឱ្យលោក កឹម សុខា បានចាត់ទុកការលើកឡើងនេះថា គ្រាន់តែជាការបកស្រាយក្នុងនាមជាអ្នកនាំពាក្យតែប៉ុណ្ណោះ។ តែសហមេធាវីនឹងនៅតែជំរុញធ្វើយ៉ាងណាឱ្យតុលាការឆាប់បើកសវនាការជំនុំជម្រះក្តីឱ្យលោក កឹម សុខា បានឆាប់។
លោកមានប្រសាសន៍ថា៖ «នៅក្នុងច្បាប់ អត់មានច្បាប់ណាជ្រើសរើសថា រឿងនេះអាទិភាពមុន រឿងនោះមិនអាទិភាពទេ ហើយបើនិយាយពីរដ្ឋបាលតុលាការវិញ រឿងក្តីគេដាក់តាមលេខរៀង ហើយគេបែងចែកទៅតាមលេខរៀង។ ដោយឡែករឿងឯកឧត្តម កឹម សុខា ជារឿងចាស់ ហើយបានចាត់តាំងចៅក្រម បានចាត់តាំងមេធាវីអីមានអស់ហើយ។ ការដេញដោលក៏បានធ្វើមួយរយៈយ៉ាងយូរ ហើយវាវែងជាងរឿងក្តីធម្មតា ដូច្នេះមិនចង់និយាយថាមិនធម្មតា យើងមើលការអនុវត្តកន្លងមក វាមិនធម្មតារួចទៅហើយ»។
កាលពីថ្ងៃទី០២ ខែកុម្ភៈ ប្រធានក្រុមប្រឹក្សាជំនុំជម្រះនៃសាលាដំបូងរាជធានីភ្នំពេញ លោក កូយ សៅ បានឆ្លើយតបទៅនឹងលិខិតរបស់ក្រុមមេធាវីការពារក្តីលោក កឹម សុខា ថាសំណើសុំបន្តសវនាការសំណុំរឿងលោក កឹម សុខា នៅមិនទាន់អាចដាក់កម្មវិធីនាពេលនេះបាននៅឡើយទេ ដោយសម្អាងមូលហេតុថា ដោយសារជំងឺកូវីដ១៩ និងមិនទាន់មានភាពច្បាស់លាស់នៅឡើយ។
លោក កូយ សៅ រៀបរាប់បន្តថា៖ «ដោយហេតុថាសាលាដំបូងរាជធានីភ្នំពេញ ក៏កំពុងមមាញឹកក្នុងចំណាត់ការសំណុំរឿងព្រហ្មទណ្ឌដែលមានជនត្រូវចោទកំពុងជាប់ឃុំយ៉ាងចង្អៀតក្នុងពន្ធនាគារ ដែលករណីនេះ ជាបញ្ហាប្រឈមដែលត្រូវចូលរួមឱ្យបានសកម្មនៅក្នុងយុទ្ធនាការនៃការដោះស្រាយសំណុំរឿងកកស្ទះ ដែលត្រូវបានដាក់ចេញដោយក្រសួងយុត្តិធម៌នាពេលកន្លងមកថ្មីៗនេះ»។
នេះគឺជាលើកទី៣ហើយដែលតុលាការសាលាដំបូងរាជធានីភ្នំពេញ បានច្រានចោលសំណើសុំរបស់ក្រុមសហមេធាវីការពារក្តីឱ្យលោក កឹម សុខា ដែលសុំឱ្យបើកសវនាការជំនុំជម្រះក្តីឡើងវិញ បន្ទាប់ពីបានផ្អាកចាប់តាំងពីចុងខែមីនាឆ្នាំមុន ក្រោយពីកម្ពុជាផ្ទុះឡើងនូវជំងឺកូវីដ១៩។
កាលពីខែឧសភាឆ្នាំមុន លោកនាយករដ្ឋមន្ត្រី ហ៊ុន សែន បានថ្លែងក្នុងកិច្ចប្រជុំមួយនៅទីស្តីការគណៈរដ្ឋមន្ត្រីថា សំណុំរឿងលោក កឹម សុខា អាចនឹងត្រូវពន្យារពេលរហូតដល់ឆ្នាំ២០២៤ ក្រោយពីតុលាការផ្អាកសវនាការលើសំណុំរឿងនេះ។
សូមរំឭកជូនថា លោក កឹម សុខា ត្រូវបានតុលាការដកហូតសិទ្ធិធ្វើនយោបាយជាង៣ឆ្នាំមកហើយ គិតចាប់ពីថ្ងៃដែលសមត្ថកិច្ចចាប់ខ្លួនលោកកាលពីអំឡុងខែកញ្ញា ឆ្នាំ២០១៧ ក្រោមការចោទប្រកាន់ពីបទ «គប់គិតជាមួយបរទេសចង់ផ្តួលរំលំរដ្ឋាភិបាល»។
អ្នកជំនាញសិទ្ធិមនុស្សអង្គការសហប្រជាជាតិ អ្នកស្រី រ៉ូណា ស្មីត កាលពីចុងខែកញ្ញាឆ្នាំមុន បានចាត់ទុកសំណុំរឿងចោទប្រកាន់លើលោក កឹម សុខា ថាជារឿងនយោបាយ ដែលក្លាយទៅជាគំរូអាក្រក់មួយឆ្លុះបញ្ចាំងពីការអនុវត្តច្បាប់មិនត្រឹមត្រូវទៅលើគូប្រជែងនយោបាយ៕
