អធិការស្រុកកំរៀង ត្រូវបានផ្អាកការងារជាបណ្តោះអាសន្ន ក្រោយនាយករដ្ឋមន្ត្រីព្រមានដកឋានន្តរសក្តិ ឬបណ្តេញមន្ត្រីនគរបាលណាដែលពាក់ព័ន្ធនឹងការដោះលែងអ្នកដែលនាំពលករឆ្លងដែនពីថៃចូលកម្ពុជាដោយខុសច្បាស់។
លោកវរសេនីយ៍ឯក គឹម ពន្លក អធិការនគរបាលស្រុកកំរៀង ខេត្តបាត់ដំបង ត្រូវបានសម្រេចឱ្យផ្អាកពីការងារជាបណ្តោះអាសន្ន ចាប់ពីថ្ងៃទី១៥ ខែកុម្ភៈនេះ ក្រោយសង្ស័យថា បានជាប់ពាក់ព័ន្ធនឹងករណីដោះលែងមេខ្យល់ដែលនាំពលករខ្មែរឆ្លងដែនដោយខុសច្បាប់។
យោងតាមលិខិតបង្គាប់ការរបស់ស្នងការនគរបាលខេត្តបាត់ដំបង លោកឧត្តមសេនីយ៍ទោ សាត គឹមសាន ចុះថ្ងៃទី១៥ ខែកុម្ភៈ ឆ្នាំ២០២១នេះ បានសម្រេចផ្អាកការងារជាបណ្តោះអាសន្នចំពោះលោកវរសេនីយ៍ឯក គឹម ពន្លក អធិការនគរបាលស្រុកកំរៀង ដោយមូលហេតុអនុវត្តការងារខុសនីតិវិធី។ លិខិតដដែលបានតម្រូវឱ្យលោក គឹម ពន្លក ទៅបង្ហាញមុខនៅការិយាល័យបុគ្គលិករៀងរាល់ម៉ោងធ្វើការ ដើម្បីកែប្រែកំហុសឆ្គង និងរង់ចាំការសម្រេចជាថ្មី។
លោក សាត គឹមសាន បានបដិសេធផ្តល់ព័ត៌មានបន្ថែមជុំវិញករណីនេះ ដោយគ្រាន់តែបញ្ជាក់យ៉ាងខ្លីថា កំពុងដំណើរការនីតិវិធី។
លោកថ្លែងថា៖ «មិនទាន់ដឹងទេបង! កំពុងដំណើរការនីតិវិធី! មិនទាន់ដឹងច្បាស់ទេ»។
យ៉ាងណាក្តី តាមការផ្សាយរបស់សារព័ត៌មានក្នុងស្រុកមួយចំនួន ឱ្យដឹងថា ការសម្រេចផ្អាកការងារបណ្តោះអាសន្ននេះ បានធ្វើឡើងក្រោយពីមានការបែកធ្លាយព័ត៌មាននិងរូបភាព បង្ហាញថា លោកអធិការស្រុករូបនេះបានលួចដោះលែងមេខ្យល់ដែលនាំពលករខ្មែរទៅធ្វើការនៅប្រទេសថៃ គ្រាដែលមានការរីករាលដាលជំងឺកូវីដ១៩។
លោកវរសេនីយ៍ឯក គឹម ពន្លក គឺជាមនុស្សទីមួយហើយដែលត្រូវបានសម្រេចឱ្យផ្អាកពីការងារជាបណ្តោះអាសន្ន នៅប៉ុន្មានម៉ោងក្រោយពីការព្រមានរបស់លោកនាយករដ្ឋមន្ត្រី ហ៊ុន សែន។
លោកនាយករដ្ឋមន្ត្រី ហ៊ុន សែន នៅថ្ងៃទី១៥ ខែកុម្ភៈនេះ បានដាក់បទបញ្ជាឱ្យមន្ត្រីអនុវត្តច្បាប់នៅតាមច្រកព្រំដែនកម្ពុជា-ថៃ រឹតបន្តឹងការអនុវត្តច្បាប់ ចំពោះមេខ្លោងដែលនាំផ្លូវអ្នកឆ្លងដែនខុសច្បាប់ពីប្រទេសថៃចូលមកកម្ពុជា ដោយមិនបានធ្វើចត្តាឡីស័ក។
លោកថែមទាំងបានព្រមានថា នឹងបណ្តេញមន្ត្រីកងកម្លាំងនគរបាលណាដែលជាប់ពាក់ព័ន្ធនឹងការរត់ពន្ធមនុស្សឆ្លងដែនដោយខុសច្បាប់នេះ ចេញពីជួរកងកម្លាំងតែម្តង ខណៈលោកថា មានមន្ត្រីនគរបាលម្នាក់នៅច្រកឡែម (ស្រុកកំរៀង) មានការគប់គិតគ្នាដោះលែងក្រុមនាំពលករឆ្លងដែនគេចពីការធ្វើចត្តាឡីស័ក។
លោកនាយករដ្ឋមន្ត្រី ហ៊ុន សែន ថ្លែងថា៖ «ដូចជាយប់មិញនេះ ខ្ញុំបានបញ្ជាទៅខាងខេត្តបាត់ដំបង និងអគ្គស្នងការនគរបាលជាតិ អំពីព័ត៌មានទាក់ទិនជាមួយការចាប់បានពួកអ្នកនាំផ្លូវហើយបែរជាដោះលែងទៅវិញ ដែលអាចនាំទៅដល់ការដកឋានន្តរសក្តិឬបណ្តេញចេញពីជួរតែម្តង នូវមន្ត្រីនគរបាលណាដែលអនុវត្តខុសឆ្គងទៅនឹងវិធានការទាំងឡាយ ដើម្បីប្រយុទ្ធប្រឆាំងនឹងការរត់ពន្ធមនុស្ស។ ហើយការរត់ពន្ធមនុស្សនេះ គឺស្ថិតនៅក្នុងស្ថានភាពធ្ងន់ធ្ងរ ដែលវាអាចនាំទៅដល់មហន្តរាយនៃសុខភាពសាធារណៈដោយសារជំងឺឆ្លង»។
បើតាមលោកនាយករដ្ឋមន្ត្រី ហ៊ុន សែន វិធានការទាំងនេះ ដើម្បីធានាថា ផ្ទៃក្នុងប្រទេសកម្ពុជា មិនមានអ្នកផ្ទុកជំងឺកូវីដ១៩ នៅក្នុងសហគមន៍នោះទេ។
ក្រៅពីបទបញ្ជាឱ្យអាជ្ញាធរខេត្តជាប់ព្រំដែនកម្ពុជា-ថៃ កម្ពុជា-ឡាវ និងកម្ពុជា-វៀតណាម រឹតបន្តឹងការអនុវត្តច្បាប់នេះ ប្រមុខរដ្ឋាភិបាលកម្ពុជា លោក ហ៊ុន សែន ក៏បានស្នើឱ្យរដ្ឋមន្ត្រីក្រសួងសុខាភិបាល និងរដ្ឋមន្ត្រីក្រសួងយុត្តិធម៌ ពិនិត្យកែសម្រួលឬធ្វើវិសោធនកម្មលើអនុក្រឹត្យរបស់រដ្ឋាភិបាល កាលពីខែកញ្ញា ឆ្នាំ២០១៥ សំដៅបង្កើនចំនួនទឹកប្រាក់ផាកពិន័យចំពោះអ្នករត់គេចចេញពីការធ្វើចត្តាឡីស័កថែមទៀត។
ក្រោយទទួលបានបទបញ្ជាពីលោកនាយករដ្ឋមន្ត្រី ហ៊ុន សែន ក្រសួងសុខាភិបាល នៅថ្ងៃនេះ ក៏បានចេញលិខិតមួយក្រើនរំឭកទៅអភិបាលរាជធានី-ខេត្ត អនុវត្តឱ្យបានម៉ឺងម៉ាត់នូវវិធានការច្បាប់ចំពោះអ្នកគេចវេះមិនធ្វើចត្តាឡីស័ក តាម «អនុក្រឹត្យស្តីពីវិធានការសុខាភិបាល ដើម្បីទប់ស្កាត់និងឆ្លើយតបការឆ្លងរាលដាលជាអន្តរជាតិនៃជំងឺនៅតាមច្រកចេញចូល»។
អនុក្រឹត្យរបស់រដ្ឋាភិបាល មាត្រាទី៨ ដែលពិន័យលើអ្នកដែលគេចចេញពីការធ្វើចត្តាឡីស័ក ពី ២០០ ០០០ រៀល ទៅ ១ ០០០ ០០០ រៀលប៉ុណ្ណោះ។ ជាអ្វីដែលលោកនាយករដ្ឋមន្ត្រីបានចាត់ទុកថា តិចតួចពេកសម្រាប់អ្នកមានចំណូលខ្ពស់។ ដូច្នេះ លោកបានបង្គាប់ឱ្យមានការកែសម្រួលអនុក្រឹត្យថ្មី ដែលអាចនឹងដាក់ចេញនូវវិធានការថ្មីៗបន្ថែមទៀត។
ចំណែកក្រសួងការងារ ក៏បានអំពាវនាវដល់ពលករខ្មែរ មិនត្រូវលួចឆ្លងដែនខុសច្បាប់ចូលមកប្រទេសកម្ពុជា និងគេចវេះពីការធ្វើចត្តាឡីស័កឡើយ បើពុំនោះទេ នឹងប្រឈមការផាកពិន័យជាប្រាក់ចំនួន ១ ០០០ ០០០ រៀល ឬច្រើនជាងនេះ ឬអាចប្រឈមនឹងទោសព្រហ្មទណ្ឌថែមទៀតផង។ នេះបើតាមសេចក្តីជូនដំណឹងរបស់ក្រសួងនៅថ្ងៃនេះ។
លើសពីនេះ ក្រសួងការងារបានជំរុញឱ្យពលករខ្មែរត្រូវសហការផ្តល់ព័ត៌មានដល់ស្ថានទូតឬអាជ្ញាធរដែលនៅជិត ក្នុងករណីដែលដឹងថា មានមេខ្យល់បម្រុងនាំពលករខ្មែរឆ្លងដែនចេញឬចូលប្រទេសកម្ពុជាដោយខុសច្បាប់។
សូមបញ្ជាក់ថា បទបញ្ជារបស់លោកនាយករដ្ឋមន្ត្រី ហ៊ុន សែន នេះ បានធ្វើឡើងបន្ទាប់ពីមានករណីពលករខ្មែរប្រមាណជាង១០នាក់បានធ្វើដំណើរមកពីប្រទេសថៃ ដោយបានលួចឆ្លងដែនមកខេត្តតាកែវ ដោយមិនបានធ្វើចត្តាឡីស័កនោះទេ។
បទបញ្ជានេះក៏បានកើតឡើង ក្រោយពីមានករណីពលករខ្មែរម្នាក់នៅក្នុងខេត្តបន្ទាយមានជ័យ បានជាន់មីនរបួសដែលអាចពិការជើង ក្រោយពីបានលួចឆ្លងពីប្រទេសថៃមកកម្ពុជា តាមតំបន់ព្រៃភ្នំ ជាយក្រុងប៉ោយប៉ែត ខេត្តបន្ទាយមានជ័យ កាលពីវេលាម៉ោង៧និង១០នាទីយប់ ថ្ងៃទី១៤ ខែកុម្ភៈ ដើម្បីគេចចេញពីការធ្វើចត្តាឡីស័ក។
បើតាមលោកនាយករដ្ឋមន្ត្រី ហ៊ុន សែន គិតត្រឹមយប់ថ្ងៃទី១៤ ខែកុម្ភៈ មានពលករឆ្លងដែនមកពីប្រទេសថៃ ហើយចូលធ្វើចត្តាឡីស័កមានចំនួន ៣៥ ៦៦៥នាក់ ក្នុងនោះអ្នកកំពុងធ្វើចត្តាឡីស័កនៅតាមខេត្តជាប់ព្រំដែនទាំង៧ មានចំនួន ១១ ៨៥៧នាក់។
ក្នុងចំណោមអ្នកឆ្លងដែនពីប្រទេសថៃនេះ លោកថា កម្ពុជាបានរកឃើញអ្នកឆ្លងជំងឺកូវីដ១៩ សរុបចំនួន៨៩នាក់៕