ស្នងការដ្ឋាននគរបាលខេត្តបាត់ដំបង នឹងបញ្ជូនខ្លួនអតីតអធិការនគរបាលស្រុកកំរៀង លោក គឹម ពន្លក ទៅកាន់សាលាដំបូងខេត្តនៅថ្ងៃនេះ ក្រោយសមត្ថកិច្ចរកឃើញថា បានប្រព្រឹត្តខុសនីតិវិធី ដោយបានដោះលែងមេខ្យល់នាំពលករខ្មែរឆ្លងដែនខុសច្បាប់ពីប្រទេសថៃចូលមកកម្ពុជា គេចវេះពីការធ្វើចត្តាឡីស័ក។
លោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង មានប្រសាសន៍នៅព្រឹកថ្ងៃអង្គារនេះថា បច្ចុប្បន្ន លោក គឹម ពន្លក កំពុងស្ថិតនៅក្នុងស្នងការដ្ឋាននគរបាលខេត្តបាត់ដំបង។
លោកបន្តថា បន្ទាប់ពីកសាងសំណុំរឿងរួចរាល់ លោក គឹម ពន្លក នឹងត្រូវបញ្ជូនទៅកាន់តុលាការ នៅរសៀលនេះ។ ប៉ុន្តែលោកនៅមិនទាន់ដឹងថា តើតុលាការនឹងចោទប្រកាន់លោក គឹម ពន្លក ពីបទអ្វីនៅឡើយទេ គឺអាស្រ័យលើការរកឃើញរបស់ព្រះរាជអាជ្ញា និងចៅក្រមស៊ើបសួររបស់សាលាដំបូងខេត្ត។
លោកថា៖ «កំហុស គឺមិនមែនបើកដៃឱ្យប្រជាពលករឬយកលុយពីពលករទេ។ ប៉ុន្តែគាត់ថា ដូចសម្តេចបានបញ្ជាក់ហើយ គឺគាត់បានដោះលែងមេខ្យល់»។
គួរជម្រាបជូនថា លោក គឹម ពន្លក អធិការនគរបាលស្រុកកំរៀង ត្រូវបានស្នងការដ្ឋាននគរបាលខេត្តបាត់ដំបង បានចេញលិខិតសម្រេចឱ្យផ្អាកពីការងារជាបណ្តោះអាសន្នកាលពីថ្ងៃទី១៥ ខែមករា ក្រោយសង្ស័យថា លោកបានជាប់ពាក់ព័ន្ធនឹងករណីដោះលែងមេខ្យល់ដែលនាំពលករខ្មែរឆ្លងដែនដោយខុសច្បាប់។
នៅថ្ងៃដដែលនោះ លោក គឹម ពន្លក ក៏ត្រូវបានលោកនាយករដ្ឋមន្ត្រី ហ៊ុន សែន ចេញអនុក្រឹត្យដកហូតឋានន្តរសក្តិ និងបណ្តេញចេញពីក្របខណ្ឌមន្ត្រីនគរបាលជាតិកម្ពុជា ចាប់ពីថ្ងៃទី១៥ ខែកុម្ភៈ តទៅ។
លោកវរសេនីយ៍ឯក គឹម ពន្លក គឺជាមនុស្សទីមួយហើយដែលត្រូវបានសម្រេចឱ្យផ្អាកពីការងារជាបណ្តោះអាសន្ន នៅប៉ុន្មានម៉ោងក្រោយពីការព្រមានរបស់នាយករដ្ឋមន្ត្រី។
លោកនាយករដ្ឋមន្ត្រី ហ៊ុន សែន នៅថ្ងៃទី១៥ ខែកុម្ភៈ បានដាក់បទបញ្ជាឱ្យមន្ត្រីអនុវត្តច្បាប់នៅតាមច្រកព្រំដែនកម្ពុជា-ថៃ រឹតបន្តឹងការអនុវត្តច្បាប់ ចំពោះមេខ្លោងដែលនាំផ្លូវអ្នកឆ្លងដែនខុសច្បាប់ពីប្រទេសថៃចូលមកកម្ពុជា ដោយមិនបានធ្វើចត្តាឡីស័ក។
តាមរយៈសារព្រមានរបស់លោកនាយករដ្ឋមន្ត្រី ហ៊ុន សែន ក្រៅពីបណ្តេញចេញពីជួរកងកម្លាំងនគរបាលជាតិហើយ លោក គឹម ពន្លក ក៏ត្រូវប្រឈមនឹងទោសទណ្ឌនៅក្នុងតុលាការផងដែរ ដើម្បីជាការព្រមានទៅដល់មន្ត្រីអនុវត្តច្បាប់ផ្សេងទៀត៕
