អតីតអធិការនគរបាលស្រុកកំរៀង លោក គឹម ពន្លក ត្រូវបានសាលាដំបូងខេត្តបាត់ដំបងចោទប្រកាន់ពីបទ «ការនាំយកចេញដោយមិនស្របច្បាប់សម្រាប់នាំឆ្លងដែន» និងបានបញ្ជូនទៅឃុំខ្លួនភ្លាមៗនៅឯពន្ធនាគារខេត្តបាត់ដំបង នៅល្ងាចថ្ងៃទី១៦ ខែកុម្ភៈនេះ។
អ្នកនាំពាក្យអយ្យការអមសាលាដំបូងខេត្តបាត់ដំបង លោក ផាន់ រតនា បានថ្លែងថា លោក គឹម ពន្លក ត្រូវបានចោទប្រកាន់តាមមាត្រា៨ និងមាត្រា១១ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ។
លោកមានប្រសាសន៍ថា៖ «យើងសម្រេចឃុំខ្លួនគាត់ហើយ។ គាត់ត្រូវបានចោទប្រកាន់ពីបទ ការនាំចេញដោយខុសច្បាប់នូវពលកម្មឆ្លងដែន»។
មាត្រា១១ នៃច្បាប់ស្ដីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ ចែងថា ជនណាដែលនាំយកជនដទៃចេញដោយមិនស្របច្បាប់ ក្នុងគោលដៅប្រគល់ឬនាំយកទៅក្រៅព្រះរាជាណាចក្រកម្ពុជា ត្រូវផ្ដន្ទាទោសដាក់ពន្ធនាគារពី៧ដល់១៥ឆ្នាំ។ សម្រាប់អំពើល្មើសប្រព្រឹត្តឡើងដោយមន្ត្រីសាធារណៈដែលបំពានដោយអំណាចរបស់ខ្លួន មន្រ្តីរូបនោះត្រូវប្រឈមនឹងការជាប់ពន្ធនាគារពី១៥ទៅ២០ឆ្នាំ។
លោក អំ សំអាត នាយករងអង្គការសិទ្ធិមនុស្សលីកាដូ បានចាត់ទុកថា ការសម្រេចរបស់តុលាការបែបនេះគឺជាករណីគំរូមួយ។ ប៉ុន្តែលោកស្នើឱ្យមានការអនុវត្តបន្តទៅទៀត។
លោកមានប្រសាសន៍ថា៖ «ខ្ញុំគិតថា ករណីទាំងអស់នេះគួរតែអនុវត្តបន្តទៅទៀត លើជនណាក៏ដោយដែលពាក់ព័ន្ធនឹងការជួញដូរមនុស្សនិងការជួញដូរកម្លាំងពលកម្ម។ ត្រូវអនុវត្តឱ្យបានស្មើភាពគ្នា ហើយអ្នកពាក់ព័ន្ធត្រូវតែទទួលទោសតាមច្បាប់»។
លោក គឹម ពន្លក អតីតអធិការនគរបាលស្រុកកំរៀង ខេត្តបាត់ដំបង ត្រូវបានបញ្ជូនទៅកាន់តុលាការសាលាដំបូងខេត្តបាត់ដំបង នារសៀលថ្ងៃទី១៦ ខែកុម្ភៈនេះ ក្រោយសមត្ថកិច្ចរកឃើញថា បានប្រព្រឹត្តខុសនីតិវិធី ដោយបានដោះលែងមេខ្យល់នាំពលករខ្មែរឆ្លងដែនខុសច្បាប់ពីប្រទេសថៃចូលមកកម្ពុជា គេចវេះពីការធ្វើចត្តាឡីស័ក។ នេះបើតាមការបញ្ជាក់ពីលោកឧត្តមសេនីយ៍ទោ សាត គឹមសាន ស្នងការនគរបាលខេត្តបាត់ដំបង។
លោក សាត គឹមសាន មានប្រសាសន៍ថា៖ «កំហុស គឺមិនមែនបើកដៃឱ្យប្រជាពលករឬយកលុយពីពលករទេ។ ប៉ុន្តែគាត់ថា ដូចសម្តេចបានបញ្ជាក់ហើយ គឺគាត់បានដោះលែងមេខ្យល់»។
គួរជម្រាបជូនថា លោកវរសេនីយ៍ឯក គឹម ពន្លក អតីតអធិការនគរបាលស្រុកកំរៀង ខេត្តបាត់ដំបង គឺជាមនុស្សទីមួយហើយដែលត្រូវបានបញ្ជូនទៅកាន់តុលាការ ក្រោយពីការព្រមានរបស់លោកនាយករដ្ឋមន្ត្រី ហ៊ុន សែន។ លោកនាយករដ្ឋមន្ត្រី ហ៊ុន សែន កាលពីថ្ងៃទី១៥ ខែកុម្ភៈ បានព្រមានបណ្តេញមន្ត្រីកងកម្លាំងនគរបាលណាដែលជាប់ពាក់ព័ន្ធនឹងការរត់ពន្ធមនុស្សឆ្លងដែនខុសច្បាប់ ដើម្បីគេចចេញពីការធ្វើចត្តាឡីស័ក។
ការព្រមានរបស់លោកនាយករដ្ឋមន្ត្រី ហ៊ុន សែន គឺនៅគ្រាដែលលោកបានដាក់បទបញ្ជាតឹងរ៉ឹងឱ្យមន្ត្រីអនុវត្តច្បាប់នៅតាមច្រកព្រំដែនទាំងអស់ រឹតបន្តឹងការឆ្លងដែនរបស់ពលករខ្មែរ ដោយមិនត្រូវបំពានវិធានការធ្វើចត្តាឡីស័ករកជំងឺកូវីដ១៩នោះឡើយ។
ទាក់ទងនឹងករណីអតីតអធិការនគរបាលស្រុកកំរៀងនេះដែរ លោកឧបនាយករដ្ឋមន្ត្រី ស ខេង រដ្ឋមន្ត្រីក្រសួងមហាផ្ទៃ នៅក្នុងពិធីមួយនៅថ្ងៃនេះ បានចាត់ទុកករណីនេះថា គឺជាកញ្ចក់សម្រាប់ថ្នាក់ដឹកនាំនគរបាលផ្សេងទៀត ដើម្បីបញ្ចៀសកំហុសឆ្គងក្នុងវិជ្ជាជីវៈ និងជាហេតុនាំឱ្យទទួលការពិន័យឬទណ្ឌកម្ម ការដកហូតសក្ដិ និងការបណ្ដេញចេញពីក្របខណ្ឌនគរបាលជាតិ ជាដើម៕