រដ្ឋាភិបាលបានសម្រេចបង្កើនប្រាក់ផាកពិន័យពី ១ ០០០ ០០០ រៀល ទៅ ៥ ០០០ ០០០ រៀល ចំពោះអ្នកដែលគេចវេះពីការធ្វើចត្តាឡីស័ក និងអ្នកដែលកំពុងធ្វើចត្តាឡីស័កហើយ តែមិនសហការជាមួយមន្ត្រីសុខាភិបាលក្នុងការយកសំណាកទៅធ្វើតេស្តរកកូវីដ១៩។
យោងតាមអនុក្រឹត្យថ្មីរបស់រដ្ឋាភិបាលកម្ពុជា ដែលប្រកាសដាក់ឱ្យប្រើប្រាស់ដោយលោកនាយករដ្ឋមន្ត្រី ហ៊ុន សែន នៅថ្ងៃទី១៨ ខែកុម្ភៈ ឆ្នាំ២០២១នេះ បានសម្រេចបង្កើនប្រាក់ផាកពិន័យចាប់ពី ១ ០០០ ០០០ រៀល ដល់ ៥ ០០០ ០០០ រៀល ចំពោះអ្នកគេចវេះពីការធ្វើចត្តាឡីស័ក អ្នកគេចចេញពីកន្លែងធ្វើចត្តាឡីស័ក និងអ្នកដែលកំពុងធ្វើចត្តាឡីស័កហើយ តែមិនសហការជាមួយមន្ត្រីសុខាភិបាល ដើម្បីយកសំណាកទៅធ្វើតេស្តរកមេរោគកូវីដ១៩។
អនុក្រឹត្យដដែលបន្តទៀតថា ចំណែកអ្នកដែលផ្តើមគំនិតដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយចេតនាដល់អ្នកដំណើរ ឬការីនៃយានដឹកជញ្ជូន ឱ្យគេចចេញពីការត្រួតពិនិត្យ ឬគេចវេះពីការអនុវត្តវិធានការធ្វើចត្តាឡីស័កនោះ ក៏នឹងត្រូវទទួលរងការពិន័យធ្ងន់ធ្ងរជាទឹកប្រាក់ចាប់ពី ១០ ០០០ ០០០ រៀល ដល់ ៥០ ០០០ ០០០ រៀល។
យោងតាមអនុក្រឹត្យថ្មីនេះ រដ្ឋាភិបាលកម្ពុជា ក៏នឹងផាកពិន័យជាប្រាក់ចាប់ពី ១០ ០០០ ០០០ រៀល ដល់ ៥០ ០០០ ០០០ រៀលដែរ ចំពោះគ្រឹះស្ថានសុខាភិបាលឯកជនទាំងអស់ដែលជួយលាក់បាំង ឬមិនបានជូនដំណឹងទៅក្រសួងសុខាភិបាល ក្នុងករណីពិនិត្យឃើញថា អ្នកជំងឺដែលកំពុងព្យាបាលនៅកន្លែងរបស់ខ្លួនមានតម្រុយជាអ្នកជំងឺគេចវេះពីការធ្វើចត្តាឡីស័កផងដែរ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គឹមអេង បានស្វាគមន៍ចំពោះការបង្កើនប្រាក់ពិន័យចំពោះអ្នកដែលផ្តើមគំនិតដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយចេតនាដល់អ្នកគេចវេះពីការធ្វើចត្តាឡីស័ក ពី ១០ ០០០ ០០០ រៀល ដល់ ៥០ ០០០ ០០០ រៀលនេះ។ ក៏ប៉ុន្តែលោកហាក់ពុំគាំទ្រឡើយចំពោះការបង្កើនការផាកពិន័យទៅលើអ្នកដែលគេចវេះពីការធ្វើចត្តាឡីស័ក ដែលជាពលករមកពីប្រទេសថៃ ដែលអាចមិនទាន់បានទទួលព័ត៌មានគ្រប់គ្រាន់នៅឡើយ។
លោកមានប្រសាសន៍ថា៖ «អ៊ីចឹងខ្ញុំថា ដើម្បីកុំឱ្យគាត់ធ្លាក់នៅក្នុងការពិន័យធ្ងន់ធ្ងរ ដែលធ្វើឱ្យប៉ះពាល់ដល់ជីវភាពរបស់គាត់ហ្នឹង ទាល់តែខាងរដ្ឋាភិបាលហ្នឹងធ្វើយ៉ាងណាបង្កើនការផ្សព្វផ្សាយឱ្យបានទូលំទូលាយទៅដល់ពួកគាត់ ហើយនិងរឹតបន្តឹងការចេញចូលតាមច្រកព្រំដែន ដើម្បីធានាថា ខ្លួនហ្នឹងបានផ្សព្វផ្សាយព័ត៌មានឱ្យដឹងឮ បាទ»។
អនុក្រឹត្យថ្មីនេះបានធ្វើឡើងតែបីថ្ងៃប៉ុណ្ណោះ ក្រោយពីលោកនាយករដ្ឋមន្ត្រី ហ៊ុន សែន បានដាក់បទបញ្ជាឱ្យរដ្ឋមន្ត្រីក្រសួងសុខាភិបាល និងក្រសួងយុត្តិធម៌ ពិភាក្សាគ្នាធ្វើវិសោធនកម្ម ឬកែសម្រួលមាត្រា៨ នៃអនុក្រឹត្យចាស់របស់រដ្ឋាភិបាល កាលពីខែកញ្ញា ឆ្នាំ២០១៥ ឱ្យបង្កើនប្រាក់ផាកពិន័យចំពោះអ្នកដែលគេចវេះពីការធ្វើចត្តាឡីស័ក។
អនុក្រឹត្យចាស់របស់រដ្ឋាភិបាលកម្ពុជា បានកំណត់ការផាកពិន័យជាប្រាក់ចាប់ពី ២០០ ០០០ រៀល ដល់ ១ ០០០ ០០០ រៀលប៉ុណ្ណោះ ចំពោះអ្នកគេចវេះពីការធ្វើចត្តាឡីស័ក ដែលលោកនាយករដ្ឋមន្ត្រី ហ៊ុន សែន យល់ថា ការផាកពិន័យនេះតិចតួចពេកសម្រាប់អ្នកមានចំណូលខ្ពស់។
បទបញ្ជារបស់លោកនាយករដ្ឋមន្ត្រី ហ៊ុន សែន បានធ្វើឡើងបន្ទាប់ពីមានករណីពលករខ្មែរប្រមាណជាង១០នាក់បានលួចឆ្លងដែនធ្វើដំណើរមកពីប្រទេសថៃចូលមកប្រទេសកម្ពុជា នៅខេត្តតាកែវ ដោយមិនបានធ្វើចត្តាឡីស័កនោះទេ។
បទបញ្ជានេះក៏បានកើតឡើង ក្រោយពីមានករណីពលករខ្មែរម្នាក់នៅក្នុងខេត្តបន្ទាយមានជ័យ បានជាន់មីនរបួសដែលអាចពិការជើង ក្រោយពីបានលួចឆ្លងដែនពីប្រទេសថៃមកកម្ពុជា តាមតំបន់ព្រៃភ្នំ ជាយក្រុងប៉ោយប៉ែត ខេត្តបន្ទាយមានជ័យ ដើម្បីគេចចេញពីការធ្វើចត្តាឡីស័កផងដែរ។
អនុក្រឹត្យថ្មីរបស់រដ្ឋាភិបាល មាត្រា៨ថ្មី បានចែងថា ក្នុងករណីជនល្មើសមិនព្រមបង់ប្រាក់ពិន័យអន្តរការណ៍រយៈពេល៣០ថ្ងៃ គិតចាប់ពីថ្ងៃទទួលបានសេចក្តីសម្រេចស្តីពីការពិន័យអន្តរការណ៍ មន្ត្រីក្រសួងសុខាភិបាលដែលពេលនេះមាននីតិសម្បទាជានគរបាលយុត្តិធម៌ ត្រូវកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ជាធរមាន។ ការទទួលពិន័យអន្តរការណ៍នេះ មិនធ្វើឱ្យជនដែលប្រព្រឹត្តបទល្មើសរួចផុតពីការទទួលខុសត្រូវខាងព្រហ្មទណ្ឌផ្សេងទៀតនោះឡើយ។ មាត្រា១៣ នៃអនុក្រឹត្យនេះ បានបញ្ជាក់ថា ប្រាក់ពិន័យត្រូវកើនឡើងទ្វេដង ក្នុងករណីដែលអំពើល្មើសត្រូវបានប្រព្រឹត្តឡើងម្តងទៀត។
ទាក់ទងនឹងការធ្វើចត្តាឡីស័កនេះដែរ លោកស្រីវេជ្ជបណ្ឌិត ឱ វណ្ណឌីន អ្នកនាំពាក្យ និងជារដ្ឋលេខាធិការក្រសួងសុខាភិបាល បានថ្លែងថា កម្ពុជានៅតែអនុវត្តនូវវិធានការធ្វើចត្តាឡីស័ករយៈពេល១៤ថ្ងៃ ចំពោះជនបរទេសនិងពលរដ្ឋខ្មែរទាំងអស់ដែលចូលមកកាន់ប្រទេសកម្ពុជា បើទោះបីជាពួកគេបានចាក់វ៉ាក់សាំងប្រឆាំងនឹងជំងឺកូវីដ-១៩ក៏ដោយ។
លោកស្រីមានប្រសាសន៍ថា៖ «ការងារធ្វើចត្តាឡីស័ក គឺជាកាតព្វកិច្ចរបស់ពលរដ្ឋគ្រប់រូបដែលត្រូវធ្វើរាល់អ្នកដំណើរដែលចូលមក។ ខ្ញុំអត់និយាយចេញ [អ្នកធ្វើដំណើរចេញពីកម្ពុជា] ទេណា! ខ្ញុំនិយាយចូល [អ្នកធ្វើដំណើរចូលមកកម្ពុជា]។ [ករណី]ចេញ អាស្រ័យតាមប្រទេសគេផ្សេងៗ។ ប៉ុន្តែសម្រាប់កម្ពុជា គឺជាកាតព្វកិច្ចដែលតម្រូវឱ្យរាល់អ្នកដំណើរដែលចូលមកហ្នឹង គឺគាត់ត្រូវធ្វើចត្តាឡីស័ក១៤ថ្ងៃ។ បើទោះបីជាចាក់វ៉ាក់សាំងហើយក៏ដោយ»។
គិតត្រឹមថ្ងៃទី១៨ ខែកុម្ភៈ ឆ្នាំ២០២១នេះ កម្ពុជាបានរកឃើញករណីអ្នកឆ្លងជំងឺកូវីដ១៩ថ្មីចំនួន៤ករណីបន្ថែមទៀត ជាអ្នកដំណើរមកពីក្រៅប្រទេស ដែលធ្វើឱ្យចំនួនអ្នកឆ្លងសរុបកើនដល់៤៨៣នាក់ ក្នុងនោះ ជាសះស្បើយចំនួន៤៧០នាក់ និងកំពុងសម្រាកព្យាបាលមានចំនួន១៣នាក់៕