ស្នងការដ្ឋាននគរបាលខេត្តរតនគិរី បញ្ជាក់ការស្តីបន្ទោសដោយចោទមេប៉ុស្តិ៍ច្រករបៀងព្រំដែនស្រុកអូយ៉ាដាវ ថាមិនគោរពបទបញ្ជា និងបង្កភាពអនាធិបតេយ្យនៅច្រករបៀង ពាក់ព័ន្ធនឹងការបង្ក្រាបបទល្មើសព្រៃឈើមួយកន្លែងពីសំណាក់អភិបាលខេត្ត ជារឿងយល់ច្រឡំតែប៉ុណ្ណោះ។
ស្នងការនគរបាលខេត្តរតនគិរី លោកឧត្តមសេនីយ៍ទោ យិន ចំណាន ប្រាប់ថា លោកបានផ្ញើរបាយការណ៍ទៅកាន់អភិបាលខេត្តរតនគិរី ជុំវិញរឿងនេះរួចហើយ ក្រោយការស៊ើបអង្កេត ហើយអះអាងថា មេប៉ុស្តិ៍ច្រករបៀងព្រំដែនស្រុកអូយ៉ាដាវ លោក ទួន មេសា ជាមនុស្សស្អាតស្អំ។
លោកបានពន្យល់ដូច្នេះថា៖ «តាមពិតទៅ គាត់លើកឡើងហ្នឹងតាមព័ត៌មាន។ អ៊ីចឹងទៅ គាត់ក៏ឱ្យស្នងការហ្នឹងបង្កើតគណៈកម្មការចុះទៅស្រាវជ្រាវករណីហ្នឹងហើយ។ តាមពិតទៅ វាមិនពាក់ព័ន្ធក្នុងភូមិសាស្ត្រព្រំដែនទេ វានៅក្នុងភូមិសាស្ត្រស្រុក សេសាន ឯណេះ។ វាមិនពាក់ព័ន្ធអីទេ»។
ការលើកឡើងរបស់លោកស្នងការនេះ គឺពាក់ព័ន្ធនឹងការបង្ក្រាបបទល្មើសព្រៃឈើមួយកន្លែង ហើយជាដើមហេតុដែលធ្វើឱ្យអភិបាលខេត្តរតនគិរី លោក ថង សាវុន ព្រមានមេប៉ុស្តិ៍ លោក ទួន មេសា រូបនោះ។ អភិបាលខេត្តរតនគិរី ក៏បានព្រមានមន្ត្រីជំនាញតាមព្រំដែន និងកងយោធាដទៃទៀតឱ្យដកខ្លួនចេញជាបន្ទាន់ កុំបង្កភាពអនាធិបតេយ្យនៅតាមព្រំដែនបន្តទៀត។
លោកមានប្រសាសន៍នៅក្នុងវេទិកាសាធារណៈមួយកាលពីចុងខែមករាដូច្នេះថា៖ «វាហត់ពេកហើយក្នុងការបង្ក្រាបនាប៉ុន្មានឆ្នាំមក។ ហើយរបៀង! និយាយប្រាប់ឱ្យហើយ ខ្ញុំនឹងចុះទៅកាយលុបរបៀងទាំងអស់ កាយផ្តាច់ហ្មង ជីកហ្អែងប្រឡាយផ្តាច់ហ្មង ចង់មិនចង់ដាក់មីនថែមទៀត! វាហួសហេតុពេក។ យើងបញ្ជាកម្លាំងទៅ វាថាមិនដែលមានអីផង ស្ងាត់! អាមេប៉ុស្តិ៍ អាហ្នឹង វាឈ្មោះ មេសា។ ល្មមៗបានហើយ លោក មេសា គុកមិនទាន់ភ្លេចលោកឯងទេ ហើយនិងកម្លាំងមួយចំនួនទៀត វីរការពារព្រំដែនដកខ្លួន ដកបានឱ្យហើយ ខ្ញុំប្រើវិធានការក្តៅហើយម្តងនេះ អត់មានយោគយល់អស់លោកទេ»។
អភិបាលខេត្តរតនគិរី លោក ថង សាវុន បានថ្លែងប្រាប់ វីអូឌី នៅថ្ងៃពុធថា ការផ្ញើសារព្រមានរបស់លោកពេលនោះ គឺទៅលើមន្ត្រីពាក់ព័ន្ធទាំងអស់នៅក្នុងខេត្តរតនគិរី។
លោកមានប្រសាសន៍ថា៖ «អាហ្នឹង! ខ្ញុំផ្ញើសារហ្នឹង ផ្ញើសារសម្រាប់ជាការព្រមានដល់មន្ត្រីពាក់ព័ន្ធទាំងអស់។ ហើយបងមើលតាមហ្នឹង បងផ្សាយតាមហ្នឹង»។
លោក ទួន មេសា ដែលកំពុងរងការចោទប្រកាន់នេះ មិនអាចទាក់ទងសុំការបកស្រាយបាននៅឡើយទេ។
យ៉ាងណាក្តី ការស៊ើបអង្កេតទៅលើមេប៉ុស្តិ៍នគរបាលច្រករបៀងព្រំដែនស្រុកអូយ៉ាដាវ ខេត្តរតនគិរីនេះ បានធ្វើឡើងចំពេលដែលប្រមុខរដ្ឋាភិបាលកម្ពុជា លោក ហ៊ុន សែន បានដាក់បទបញ្ជាឱ្យមន្ត្រីអនុវត្តច្បាប់នៅតាមច្រកព្រំដែនទាំងអស់ រឹតបន្តឹងការការឆ្លងដែនរបស់ប្រជាពលរដ្ឋនៅតាមព្រំដែនរវាងកម្ពុជា ថៃ ឡាវ និងវៀតណាម ដើម្បីការពារការចម្លងជំងឺកូវីដ១៩។
កាលពីថ្ងៃទី១៥ ខែកុម្ភៈ លោកនាយករដ្ឋមន្ត្រី ហ៊ុន សែន បានសម្រេចបណ្តេញអធិការនគរបាលស្រុកកំរៀង ខេត្តបាត់ដំបងម្នាក់ គឺលោក គឹម ពន្លក ចេញពីជួរកងកម្លាំងនគរបាលជាតិកម្ពុជា និងបន្ទាប់មកត្រូវបានបញ្ជូនទៅកាន់តុលាការ ក្រោមការចោទប្រកាន់ថា បានដោះលែងមេខ្យល់នាំពលករខ្មែរឆ្លងដែនខុសច្បាប់ពីប្រទេសថៃដោយមិនបានធ្វើចត្តាឡីស័ក៕
