មន្ត្រីជាន់ខ្ពស់ក្រសួងយុត្តិធម៌ បានលើកឡើងថា អ្នកចែកចាយ (Share) ព័ត៌មានមិនពិតនៅលើបណ្តាញសង្គម នឹងត្រូវប្រឈមមុខនឹងផ្លូវច្បាប់ ឬជាកម្មវត្ថុនៃការស៊ើបអង្កេតរបស់អាជ្ញាធរមានសមត្ថកិច្ច ដូចគ្នាទៅនឹងអ្នកបង្កើតនូវព័ត៌មានមិនពិតដែរ។
រដ្ឋលេខាធិការ និងជាអ្នកនាំពាក្យក្រសួងយុត្តិធម៌ លោក គឹម សន្តិភាព បានថ្លែងក្នុងសន្និសីទសារព័ត៌មានមួយនៅព្រឹកថ្ងៃសុក្រនេះថា អ្នកចែកចាយបន្តនូវព័ត៌មានមិនពិត (Fake News) គឺជាអ្នកបញ្ជូនសារនូវព័ត៌មានមិនពិតទាំងនោះទៅឱ្យអ្នកផ្សេងទៀតបានឃើញ ដែលករណីនេះ ពួកគេក៏ត្រូវប្រឈមមុខនឹងផ្លូវច្បាប់ដូចអ្នកដែលផ្សព្វផ្សាយព័ត៌មានមិនពិតដែរ។
លោកថា៖ «អ៊ីចឹងកន្លែងនេះ ខ្ញុំសូមបញ្ជាក់ថា សម្រាប់អ្នកចាប់ផ្តើមអំពីការបញ្ចេញនូវព័ត៌មានមិនពិតនេះ គឺជាការទទួលខុសត្រូវមួយរបស់អ្នក តាមមាត្រា៤៩៥។ ប៉ុន្តែសម្រាប់អ្នកដែលចែកចាយបន្ត សូមបញ្ជាក់ថា ចង់មិនចង់ គឺជាប់ជំពាក់ក្នុងកម្មវត្ថុនៃការស្រាវជ្រាវរបស់អាជ្ញាធរមានសមត្ថកិច្ច ពីព្រោះអី ការស៊ែរ [Share] មានន័យថាម៉េច? មានន័យថា យើងបញ្ជូនសារនេះបន្តទៅឱ្យអ្នកដទៃបានឃើញ។ គោលបំណងនៃការស៊ែរ បានន័យថា ជាគោលបំណងនៃការផ្សព្វផ្សាយ អ៊ីចឹងចង់មិនចង់ វាជាកម្មវត្ថុនៃការស្រាវជ្រាវមួយរបស់អាជ្ញាធរមានសមត្ថកិច្ច»។
ការលើកឡើងរបស់មន្ត្រីជាន់ខ្ពស់ក្រសួងយុត្តិធម៌រូបនេះ បានធ្វើឡើងបន្ទាប់ពីមានការចែកចាយបន្តគ្នានាពេលថ្មីៗនេះ នូវព័ត៌មានស្តីពីការស្លាប់របស់អ្នកគ្រូបង្រៀនម្នាក់នៅក្នុងខេត្តក្រចេះ ថាបណ្តាលមកពីការចាក់វ៉ាក់សាំងប្រឆាំងជំងឺកូវីដ១៩ របស់ចិនឈ្មោះ ស៊ីណូហ្វាម។
ប៉ុន្តែភ្លាមៗនេះ ក្រសួងសុខាភិបាលបានច្រានចោលព័ត៌មាននេះទាំងស្រុង ដោយបានចាត់ទុកថា ជាព័ត៌មានប្រឌិត ដែលមានចេតនាបំពុលសង្គម និងធ្វើឱ្យប្រជាពលរដ្ឋបាត់បង់ជំនឿលើការចាក់វ៉ាក់សាំងកូវីដ១៩។
ក្រសួងក៏បានបញ្ជាក់ដែរថា មកទល់នឹងថ្ងៃទី១៨ ខែកុម្ភៈ ឆ្នាំ២០២១នេះ មិនមានបុគ្គលណាម្នាក់ដែលស្ម័គ្រចិត្តចាក់វ៉ាក់សាំងកូវីដ១៩ របស់ចិន ហើយបានស្លាប់បាត់បង់ជីវិតនោះទេ។
បើតាមលោក គឹម សន្តិភាព អ្នកដែលបង្កើតនូវព័ត៌មានក្លែងក្លាយឬព័ត៌មានមិនពិតនេះ ច្បាស់ណាស់នឹងត្រូវប្រឈមការចោទប្រកាន់ពីបទ«ញុះញង់» តាមមាត្រា៤៩៤ និង៤៩៥ នៃក្រមព្រហ្មទណ្ឌកម្ពុជា ដែលត្រូវផ្តន្ទាទោសដាក់ពន្ធនាគារពី ៦ខែ ទៅ ២ឆ្នាំ និងពិន័យជាប្រាក់ពី ១ ០០០ ០០០ រៀល ទៅ ៤ ០០០ ០០០ រៀល ប្រសិនបើការញុះញង់នោះបង្កឱ្យមានភាពវឹកវរដល់សន្តិសុខសណ្តាប់ធ្នាប់សង្គមធ្ងន់ធ្ងរ។ លោកបន្តថា រីឯអ្នកដែលចែកចាយបន្តនូវព័ត៌មានមិនពិតទាំងអស់នោះ ក៏ជាមុខសញ្ញានៃការស្រាវជ្រាវរបស់សមត្ថកិច្ចផងដែរ។
លោក អំ សំអាត មន្ត្រីស៊ើបអង្កេតជាន់ខ្ពស់នៃអង្គការសិទ្ធិមនុស្សលីកាដូ បានកត់សម្គាល់ថា ករណីនេះហើយគឺជាក្តីព្រួយបារម្ភរបស់អ្នកធ្វើការងារខាងផ្នែកសិទ្ធិមនុស្សនៅកម្ពុជា ពីព្រោះកន្លងមក មានមនុស្សមួយចំនួនបានរងគ្រោះរួចទៅហើយ ទាក់ទងនឹងករណីបែបនេះ។
លោកបន្តថា ព័ត៌មានបច្ចុប្បន្ន ប្រជាពលរដ្ឋមួយចំនួនអាចនឹងពិបាកក្នុងការបែងចែកឬកំណត់ថា តើព័ត៌មានណាពិត និងថាតើព័ត៌មានណាមិនពិត។ លោកបន្ថែមថា ប្រសិនបើអាជ្ញាធរមិនបានស៊ើបអង្កេតឱ្យច្បាស់លាស់ ឬផ្សព្វផ្សាយឱ្យប្រជាពលរដ្ឋបានយល់ដឹងជាមុនទេនោះ នោះវានឹងនាំឱ្យមានជនរងគ្រោះជាច្រើនត្រូវបានចោទប្រកាន់។
លោក អំ សំអាត មានប្រសាសន៍ថា៖ «វាជាការពិត ព្រោះព័ត៌មានវាអាចមានព័ត៌មានមិនពិត និងព័ត៌មានពិត។ ប៉ុន្តែគ្រាន់តែថា បងប្អូនប្រជាពលរដ្ឋយើង គាត់អត់ទាន់ចេះមានការបែងចែក ឬក៏ពិនិត្យ ឬក៏វិភាគថា ព័ត៌មានមួយណាពិត ព័ត៌មានមួយណាក្លែងក្លាយ។ អ៊ីចឹងខ្លះហ្នឹងចេះប្រើ មិនថាមិនចេះទេ។ ចេះប្រើបណ្តាញសង្គម ក៏ប៉ុន្តែអត់មានចំណេះយល់ដឹងអំពីការប្រើប្រាស់បណ្តាញសង្គមទេ។ អ៊ីចឹងជួនកាលគាត់ឃើញ គាត់ចេះតែស៊ែ ចេះតែចែកចាយ ដោយមិនដឹងថា តើព័ត៌មានហ្នឹងពិតឬមិនពិត។ អានេះគឺជាចំណុចគ្រោះថ្នាក់ បើសិនជាការអនុវត្តច្បាប់ឱ្យតែឃើញចែកចាយឬស៊ែរ ហើយព័ត៌មានមិនពិត គាត់ត្រូវតែទទួលទោស។ អាហ្នឹងគឺជារឿងមួយដែលយើងបារម្ភណាស់»។
ស្របពេលមានការលើកឡើងពីព័ត៌មានមិនពិត នៅគ្រាដែលកម្ពុជាកំពុងដំណើរការចាក់វ៉ាក់សាំងប្រឆាំងនឹងជំងឺកូវីដ១៩របស់ចិនដែលមានឈ្មោះថា ស៊ីណូហ្វាម នេះ កម្ពុជាក៏បានប្រកាសពីការស្នើទិញវ៉ាក់សាំងបង្ការជំងឺកូវីដ-១៩ ពីប្រទេសឥណ្ឌា ចំនួន៥លានដូស ដោយស្នើសុំឱ្យភាគីឥណ្ឌាផ្គត់ផ្គង់វ៉ាក់សាំងនេះក្នុងដំណាក់កាលដំបូងចំនួន១លានដូស។
ការបញ្ជាក់អំពីផែនការទិញវ៉ាក់សាំងពីប្រទេសឥណ្ឌានេះ បានធ្វើឡើងនៅក្នុងកិច្ចសន្ទនាទ្វេភាគីតាមទូរសព្ទរវាងរដ្ឋមន្រ្តីក្រសួងការបរទេសកម្ពុជា លោក ប្រាក់ សុខុន ជាមួយរដ្ឋមន្រ្តីការបរទេសឥណ្ឌា លោក ស៊ូប្រាម៉ានយ៉ាំ ចៃហ្សានកា (Subrahmanyam Jaishankar) កាលពីល្ងាចថ្ងៃទី១៨ ខែកុម្ភៈ ម្សិលមិញនេះ។ នេះបើយោងតាមសេចក្តីប្រកាសរបស់ក្រសួងការបរទេសកម្ពុជា៕
