លោកនាយករដ្ឋមន្ត្រី ហ៊ុន សែន បានបញ្ជាក្រសួងមហាផ្ទៃ ឱ្យដកបម្រាមហាមឃាត់ពលរដ្ឋខ្មែរ ដឹកទំនិញពីប្រទេសកម្ពុជាទៅកាន់ប្រទេសថៃវិញជាបន្ទាន់ និងប្រាប់ទៅអាជ្ញាធរខេត្តជាប់ព្រំដែន ត្រូវជួយសម្របសម្រួលដល់ប្រជាពលរដ្ឋក្នុងការដឹកទំនិញទៅកាន់ប្រទេសជិតខាងផងដែរ។
បទបញ្ជានេះបានធ្វើឡើងបន្ទាប់ពីលោកនាយករដ្ឋមន្ត្រីទទួលបានព័ត៌មានថា អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ទើបបានដាក់បទបញ្ជាឱ្យអាជ្ញាធរខេត្តជាប់ព្រំដែនកម្ពុជា-ថៃ ពិសេសព្រំដែនខេត្តប៉ៃលិន ឱ្យហាមឃាត់ពលរដ្ឋខ្មែរដឹកទំនិញឬកសិផលទៅព្រំដែនថៃដូចមុនទៀតទេ។
បើតាមសារជាសំឡេងរបស់លោកនាយករដ្ឋមន្ត្រី ហ៊ុន សែន ដែលត្រូវបានផ្សព្វផ្សាយនៅថ្ងៃនេះ គឺលោកបានបញ្ជាឱ្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃ ដកបម្រាមរបស់ខ្លួនចេញវិញ ចាប់តាំងពីល្ងាចថ្ងៃទី២៣ ខែកុម្ភៈ ម្សិលមិញនេះ។ លោកថា អគ្គនាយកដ្ឋានបានចេញបទបញ្ជាឱ្យបិទការនាំទំនិញពីកម្ពុជាទៅថៃ តែផ្ទុយទៅវិញ ទំនិញមកពីប្រទេសថៃអាចចូលមកកម្ពុជាបានទៅវិញ។
លោកនាយករដ្ឋមន្ត្រី ហ៊ុន សែន បានណែនាំបន្ថែមថា មិនត្រឹមតែដកបទបញ្ជានោះវិញទេ តែអាជ្ញាធរខេត្តជាប់ព្រំដែនទាំងអស់ត្រូវជួយសម្រួលឱ្យប្រជាពលរដ្ឋខ្មែរដឹកទំនិញទៅកាន់ប្រទេសថៃ និងប្រទេសជាប់ព្រំដែនផ្សេងទៀត ដូចជា ប្រទេសវៀតណាម និងប្រទេសឡាវផងដែរ។
បើតាមលោក ហ៊ុន សែន បម្រាមនេះកំពុងដើរហួសពីបទបញ្ជារបស់លោកហើយ។
លោកបានថ្លែងថា៖ «កូវីដវាបានបំផ្លាញយើងហើយ! មិនអាចឱ្យមានការបំផ្លាញខាងសេដ្ឋកិច្ចបន្ថែមទៀតទេ។ ខ្ញុំសូមស្នើឱ្យសម្តេចក្រឡាហោមបញ្ជាក់ឱ្យខ្ញុំ តើអគ្គនាយកដ្ឋានអន្តោប្រវេសន៍បានចេញបញ្ជាបែបនេះទៅកាន់កន្លែងណាខ្លះ? សូមឱ្យដកថយនូវបញ្ជានោះវិញ ព្រោះថា ទំនិញវាអត់មានជំងឺកូវីដនៅក្នុងនោះទេ»។
ប្រធានសមាគមពង្រឹងសេដ្ឋកិច្ចក្រៅប្រព័ន្ធកម្ពុជាប្រចាំក្រុងប៉ោយប៉ែត ខេត្តបន្ទាយមានជ័យ លោក ឌិន ពុទ្ធី បានសាទរចំពោះបទបញ្ជារបស់លោកនាយករដ្ឋមន្ត្រី ហ៊ុន សែន។ ប៉ុន្តែបន្ថែមលើនេះ លោកបានអំពាវនាវឱ្យអាជ្ញាធរខេត្តជួយសម្របសម្រួលជាមួយភាគីថៃ ដើម្បីឱ្យភាគីកម្ពុជាដឹកទំនិញចូលទៅកាន់ប្រទេសថៃបានដោយស្មើភាពគ្នា។
លោកបន្តថា កន្លងមក ភាគីថៃបានហាមប្រជាពលរដ្ឋខ្មែរដឹកទំនិញចូលទៅកាន់ប្រទេសថៃ តែផ្ទុយទៅវិញ ភាគីថៃបានដឹកទំនិញចូលមកកាន់ប្រទេសកម្ពុជាដោយសេរី។
លោក ឌិន ពុទ្ធី និយាយថា៖ «ខាងខ្មែរយើងនៅប៉ោយប៉ែតហ្នឹង គឺភាគីថៃនាំទំនិញចូលដោយសេរី នាំចូលមកប៉ុន្មានក៏បានដែរ មកម៉ាសប្បាយណាស់។ តែដល់តែខ្មែរយើងចូលទៅថៃវិញ អត់បានទេ។ មានទំនិញតិចតួចហ្នឹង ក៏តៃកុងឡានថៃហ្នឹងជាអ្នកដឹកទៅទៀត ដូចជា ទំនិញតិចតួចដូចជាអេតចាយអីអញ្ចឹង»។
អភិបាលខេត្តបាត់ដំបង លោក ងួន រតនៈ បានអះអាងថា ខេត្តរបស់លោកគ្រោងអនុវត្តបទបញ្ជារបស់អគ្គនាយកដ្ឋានអន្តោប្រវេសន៍នៃក្រសួងមហាផ្ទៃ នៅថ្ងៃទី២៤ ខែកុម្ភៈនេះ ប៉ុន្តែបានផ្អាកទៅវិញក្រោយពីទទួលបានបទបញ្ជាពីលោកនាយករដ្ឋមន្ត្រី ហ៊ុន សែន កាលពីល្ងាចថ្ងៃទី២៣ កុម្ភៈ៕