ក្រសួងមហាផ្ទៃទទួលយកសំណើសុំចុះបញ្ជីគណបក្ស «កែទម្រង់កម្ពុជា» របស់អតីតតំណាងរាស្ត្រអតីតគណបក្សសង្គ្រោះជាតិមួយរូបជាបណ្តោះអាសន្នសិន ប៉ុន្តែមិនទាន់ចុះបញ្ជីជាផ្លូវការនៅឡើយ ដោយតម្រូវឱ្យអ្នកស្នើសុំត្រូវរកស្នាមមេដៃអ្នកគាំទ្រចំនួន៨០នាក់ភ្ជាប់មកជាមួយ។
កាលពីថ្ងៃម្សិលមិញ លោក អ៊ូ ច័ន្ទរ័ត្ន អតីតតំណាងរាស្ត្រអតីតបក្សប្រឆាំង បានយកពាក្យស្នើសុំចុះបញ្ជីឈ្មោះគណបក្ស «កែទម្រង់កម្ពុជា» ទៅដាក់នៅក្រសួងមហាផ្ទៃ។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា ក្រសួងបានទទួលយកសំណើសុំចុះបញ្ជីឈ្មោះគណបក្សនេះជាបណ្តោះអាសន្នសិន ប៉ុន្តែក្រសួងមិនទាន់ចុះបញ្ជីគណបក្សនេះជាផ្លូវការនៅឡើយទេ ដោយបង្គាប់ឱ្យតំណាងគណបក្សនេះប្រមូលស្នាមមេដៃអ្នកគាំទ្រចំនួន៨០នាក់ ដាក់ទៅក្រសួងបន្ថែមលើពាក្យស្នើនេះ ឱ្យបានមុនថ្ងៃទី១៥ ខែមីនា ខាងមុខ។ លោក ខៀវ សុភ័គ បានចាត់ទុកការធ្វេសប្រហែសរបស់លោក អ៊ូ ច័ន្ទរ័ត្ន នេះថា អាចជាចេតនានយោបាយណាមួយផង។
លោកមានប្រសាសន៍ដូច្នេះថា៖ «ពូលើកជាសំណួរដូចជាឆ្ងល់មែនទែន! ឬក៏គាត់មានគោលការណ៍គាត់យ៉ាងម៉េច? ឧទាហរណ៍ យើងដាក់ពាក្យប្រឡងឌីប្លូមអ៊ីចឹងណា! ពាក្យសុំ សំបុត្រកំណើតអីៗអ៊ីចឹងណា! មួយទៀត យើងកុំភ្លេចប្រវត្តិរូប យើងឃើញយើងភ្លេចប្រវត្តិរូបយើងហ្នឹងទេ?»
លោក អ៊ូ ច័ន្ទរ័ត្ន បានអះអាងថា ការបង្កើតគណបក្សថ្មីរបស់លោកនៅពេលនេះ គឺដោយសារតែលោកមិនអាចអត់ធ្មត់រង់ចាំការរស់ឡើងវិញនៃអតីតគណបក្សសង្គ្រោះជាតិបានតទៅទៀត។
ទាក់ទងការខ្វះខាតឯកសារស្នាមមេដៃអ្នកគាំទ្រចំនួន៨០នាក់ ភ្ជាប់ជាមួយពាក្យស្នើសុំនេះ លោក អ៊ូ ច័ន្ទរ័ត្ន បានពន្យល់ថា អាចជាកំហុសពីភាគីរបស់លោក។
លោកបញ្ជាក់ថា៖ «ដោយសារមានការយល់ច្រឡំថា មេដៃនោះអាចនឹងដាក់ក្នុងរយៈពេលពីរអាទិត្យ។ ហើយឥលូវនេះ យើងបានជម្រាបទៅក្រសួងមហាផ្ទៃដែរ ហើយលោកអនុញ្ញាតថា ធ្វើម៉េចដាក់ស្នាមមេដៃហ្នឹងក្នុងអំឡុងពេលពីរអាទិត្យហ្នឹង ហើយលោកនឹងចុះបញ្ជីជាផ្លូវការហើយ»។
ទាក់ទងនឹងការរិះគន់ចំពោះការបង្កើតគណបក្សនយោបាយថ្មី ថាគ្រាន់តែជាសួនលម្អប្រជាធិបតយ្យនៅកម្ពុជានោះ លោក អ៊ូ ច័ន្ទរ័ត្ន មានប្រសាសន៍បន្ថែមថា៖ «ខ្ញុំយល់ថា យើងក៏មានការព្រួយបារម្ភដែរ ប៉ុន្តែអ្វីដែលសំខាន់គឺនៅលើជំហរដឹកនាំរបស់យើង នៅលើគោលការណ៍របស់គណបក្ស នៅលើគោលនយោបាយដើម្បីបម្រើជាតិរបស់គណបក្សនោះ។ ហើយចំពោះការលាបពណ៌ ខ្ញុំជឿថា វាជារឿងធម្មតាដោយសារនិន្នាការខុសគ្នា ហើយរឿងជេរប្រមាថ [សើច] អាហ្នឹង ខ្ញុំមិនដឹងថាម៉េចទេ ប៉ុន្តែថា ជារឿងសីលធម៌របស់បុគ្គលទេ។ តែខ្ញុំគ្រាន់តែចង់ជម្រាបថា សំឡេងជេរប្រមាថ សំឡេងលាបពណ៌ទាំងនេះ មិនមែនជាសំឡេងតំណាងឱ្យអ្នកបោះឆ្នោត៩លាននាក់ទេ»។
លោក កន សាវាង្ស អ្នកសម្របសម្រួលផ្នែកអង្កេត និងតស៊ូមតិនៃអង្គការឃ្លាំមើលការបោះឆ្នោត ហៅកាត់ថា ខុមហ្វ្រែល បានចាត់ទុកថា ការស្នើសុំចុះឈ្មោះគណបក្សនយោបាយពីសំណាក់អតីតមន្ត្រីជាន់ខ្ពស់អតីតគណបក្សសង្គ្រោះជាតិ ជាសេរីភាពនយោបាយរបស់បុគ្គលគ្រប់ៗរូប ប៉ុន្តែអ្វីដែលសំខាន់បំផុត គឺការទាក់ទាញប្រជាប្រិយភាពពីអ្នកគាំទ្រ។
លោកមានប្រសាសន៍ដូច្នេះថា៖ «សំខាន់បំផុតគឺការទាញបេះដូងប្រជាពលរដ្ឋយ៉ាងម៉េច? ដោយសារគាត់កន្លងមកជាអតីតតំណាងរាស្ត្រ ឬក៏ជាសមាជិកនៃអតីតគណបក្សកន្លងមក ហើយគណបក្សធ្លាប់មានបញ្ហាយ៉ាងម៉េច ហើយគាត់ចាកចេញយ៉ាងម៉េច? អាហ្នឹងជាចំណុចមួយដែលគាត់ត្រូវធ្វើការទាក់ទាញបេះដូងឬអ្នកគាំទ្រសម្រាប់គណបក្សរបស់គាត់»។
«គណបក្សកែទម្រង់កម្ពុជា»នេះមានរូបសញ្ញាព្រះអាទិត្យរះ ដែលតំណាងឱ្យអតីតគណបក្សសង្គ្រោះជាតិ និងមានរូបក្បាលដំរីពណ៌ស ប្រមោយបួង ផ្កាឈូក៣ទង ជានិមិត្តរូបនៃអតីតគណបក្សសេរីនិយមព្រះពុទ្ធសាសនារបស់លោក សឺន សាន និងអមដោយបាវចនា «សង្គ្រោះ បម្រើ ការពារ» ដែលជាបាវចនាចាស់របស់អតីតគណបក្សសង្គ្រោះជាតិ។
រាប់ចាប់តាំងពីការរំលាយគណបក្សសង្គ្រោះជាតិ កាលពីខែវិច្ឆិកា ឆ្នាំ២០១៧មក មានគណបក្សនយោបាយចំនួន៤ហើយដែលត្រូវបានបង្កើតឡើងដោយអតីតមន្ត្រីជាន់ខ្ពស់នៃអតីតគណបក្សសង្គ្រោះជាតិ ក្នុងនោះមាន «គណបក្សឆន្ទៈខ្មែរ» របស់លោក គង់ ម៉ូនីកា កូនប្រុសរបស់លោក គង់ គាំ, «គណបក្សខ្មែរស្រឡាញ់ជាតិ» របស់លោក ជីវ កត្តា និងលោក កង គឹមហាក់, «គណបក្សខ្មែរអភិរក្សនិយម» របស់លោក រៀល ខេមរិន្ទ្រ និងចុងក្រោយនេះ គឺ«គណបក្សកែទម្រង់កម្ពុជា» របស់លោក អ៊ូ ច័ន្ទរ័ត្ន នេះ៕
