លោក សេង សុជាតិ អ្នករត់ម៉ូតូកង់បីម្នាក់ ដែលប្រចាំការរង់ចាំដឹកភ្ញៀវបរទេស ដែលភាគច្រើនជាជនជាតិចិនហៅជិះតាមកម្មវិធីទូរសព្ទដៃ នៅបរិវេណអគារពាណិជ្ជកម្មនិងស្នាក់នៅរួមកម្ពស់ជាង៣០ជាន់ ក្នុងខណ្ឌចំការមន រាជធានីភ្នំពេញ។
កំពុងអង្គុយកាត់ស្កុតរុំមុខតំណខ្សែភ្លើង ដើម្បីជួសជុលអំពូលស៊ីញ៉ូម៉ូតូកង់បី បុរសវ័យ៣៦ឆ្នាំរូបនេះលើកឡើងថា លោកនៅតែត្រូវបន្តទទួលដឹកភ្ញៀវចេញនិងចូលអគារភ្លោះនៅទីនោះដដែល បើទោះលោកដឹងថា អគារម្ខាងត្រូវបិទទ្វារ ចាប់ពីថ្ងៃទី២៣ ខែកុម្ភៈ ឆ្នាំ២០២១ បន្ទាប់ពីមានអ្នកស្នាក់នៅឆ្លងជំងឺកូវីដ១៩ ហើយអគារម្ខាងទៀតអាចនឹងត្រូវបិទបន្ថែម។
លោក សុជាតិ ប្រាប់មូលហេតុថា៖ «អត់មានអីហូប មិននៅប្រចាំការ! ប្រសិនមានអីហូបហ្នឹង ចេះតែនៅផ្ទះដូចគាត់ថាហើយ សុទ្ធតែចាំបាច់ហើយ»។
ការឆ្លងកូវីដ១៩ ជាបញ្ហាប្រឈមដ៏ធំមួយសម្រាប់អ្នករត់កង់បីដូចជាលោក សុជាតិ ជាពិសេសនៅពេលដែលមានករណីឆ្លងក្នុងសហគមន៍ជាថ្មី។ ក្រៅពីហានិភ័យនៃការឆ្លងកូវីដ១៩មានភាពស្រួចស្រាល់ជាងមុន លោក សុជាតិ ក៏ដូចជាអ្នករត់កង់បីដទៃទៀត ក៏កំពុងប្រឈមនឹងបញ្ហាជីវភាពដែរ ដោយសារតែការធ្លាក់ចុះចំនួនភ្ញៀវជិះកង់បីរបស់ពួកគេ។
នៅថ្ងៃទី២២ ខែកុម្ភៈ ឆ្នាំ២០២១ លោកនាយករដ្ឋមន្រ្តី ហ៊ុន សែន បានអំពាវនាវឱ្យពលរដ្ឋក្នុងរាជធានីភ្នំពេញ កុំចាកចេញពីផ្ទះបើគ្មានការចាំបាច់ បន្ទាប់ពីក្រសួងសុខាភិបាលបន្តរកឃើញករណីឆ្លងថ្មីក្នុងសហគមន៍រាប់សិបករណីក្នុង១ថ្ងៃ ហើយមានទីតាំងរាប់សិបកន្លែងត្រូវបានដាក់បម្រាមមិនឱ្យមនុស្សចេញចូល។
ដោយឡែក ក្លឹបកម្សាន្ត រោងភាពយន្ត និងមជ្ឈមណ្ឌលដែលមានការប្រមូលផ្តុំមនុស្សច្រើនមួយចំនួន រួមទាំងសាលារៀនទាំងរដ្ឋនិងឯកជន នៅរាជធានីភ្នំពេញ និងខេត្តកណ្តាល ត្រូវបានប្រកាសឱ្យបិទទ្វារជាបណ្តោះអាសន្ន ដើម្បីបង្ការនិងទប់ស្កាត់ការរីករាលដាលនៃជំងឺ។
លោក សេង សុជាតិ ប្រាប់បន្តថា ចាប់ពីមានការបិទអគារ មជ្ឈមណ្ឌល និងក្លឹបកម្សាន្តជាបន្តបន្ទាប់មក ចំណូលរបស់លោកបានធ្លាក់ចុះពី៦០ទៅ៧០ភាគរយ ធ្វើឱ្យប៉ះពាល់យ៉ាងខ្លាំងដល់ជីវភាពគ្រួសាររបស់លោកដែលមានកូនតូចក្នុងបន្ទុក និងរស់នៅផ្ទះជួល។
លោក សុជាតិ៖ «ស្ថានភាពគឺអត់មានអីដឹកហ្មង! ស្ងាត់ឈឹង! បិទអស់រលីងហើយហ្នឹងបងឯងមើល៍! អានេះបិទ អានេះឮសូរបិទថ្ងៃហ្នឹង ថាបិទតាំងពីម្សិលមិញ បើបិទអានេះមួយទៀត ចប់ហើយ»។
អ្នកបើកកង់បីមួយរូបទៀត វ័យ៥២ឆ្នាំ លោក សុខ ហាន ដែលប្រចាំការដឹកភ្ញៀវក្បែរអគារ The Bridge ក្បែរអគាររដ្ឋសភា ក្នុងសង្កាត់ទន្លេបាសាក់ បាននិយាយថា ពេញមួយព្រឹកហើយ លោកមិនទាន់មានភ្ញៀវហៅកង់បីជិះនៅឡើយ។
ដោយពាក់ម៉ាស់មុខប្រភេទ២ជាន់ បុរសមានស្រុកកំណើតនៅខេត្តព្រៃវែងរូបនេះ បន្ថែមថា លោកស្ទើរតែមិនជឿថា ជំងឺកូវីដ១៩ បានឆ្លងក្នុងសហគមន៍ជាថ្មី បន្ទាប់ពីលោកទើបតែអាចរកចំណូលបានសមល្មមសម្រាប់ផ្គត់ផ្គង់គ្រួសារនិងបង់រំលស់កម្ចីធនាគារ ក្រោយព្រឹត្តិការណ៍«២៨ វិច្ឆិកា»។
លោក ហាន និយាយថា៖ «កន្លែងសេដ្ឋកិច្ច កន្លែងតំបន់ខ្ញុំរក កន្លែងផ្សារហ្នឹង ឥលូវគេបិទអ៊ីចឹង ធ្វើម៉េចទេ! ចេះតែជំនុំបងប្អូនអ្នករកស៊ីទាំងអស់គ្នា យើងបិទសេដ្ឋកិច្ច យើងអ៊ីចឹងហើយ យើងទៅខាងណាវិញ យើងបានអីហូប យើងមានស្រែឯណា មានតែរកស៊ីតាមដងផ្លូវហ្នឹងហើយ»។
អ្នករត់កង់បីម្នាក់ទៀតប្រចាំការនៅបរិវេណផ្សារបឹងកេងកង លោក មឿង វិជ្ជៈ ឱ្យដឹងថា លោកចាំបាច់ត្រូវដឹកភ្ញៀវគ្រប់ប្រភេទ មិនថាជនជាតិខ្មែរឬបរទេស ហើយបើទោះជាពួកគេមិនពាក់ម៉ាស់ឬមិនព្រមពាក់ម៉ាស់ក្តី។
បុរសមានកូន៣នាក់ក្នុងបន្ទុករូបនេះ ប្រាប់បន្ថែមថា លោកក៏បារម្ភបញ្ហាប្រឈមនៃជំងឺកូវីដ១៩ផងដែរ ប៉ុន្តែលោកគ្មានជម្រើសនោះទេ ដោយសារត្រូវការលុយ ដើម្បីផ្គត់ផ្គង់ជីវភាពរស់នៅប្រចាំថ្ងៃផ្ទាល់ខ្លួននិងក្រុមគ្រួសារ។
លោក វិជ្ជៈ ប្រាប់ថា៖ «នៅតែដឹក [ភ្ញៀវ] អ៊ីចឹង គ្រាន់តែយើងការពារទាំងអស់គ្នា។ យើងមិនដឹកម៉េចកើត បើយើងរកស៊ី បើយើងគិតតែពីអាហ្នឹង [ខ្លាចឆ្លងកូវីដ] វាអាចកាន់តែបាត់ថវិការបស់យើង ទោះបីចង់មិនចង់ក៏ត្រូវតែដឹកដែរ»។
កាលពីថ្ងៃទី២៨ ខែកុម្ភៈ ឆ្នាំ២០២១នេះ រដ្ឋបាលខេត្តត្បូងឃ្មុំ បានឱ្យដឹងថា ក្នុងព្រឹត្តិការណ៍សហគមន៍២០កុម្ភៈនេះ ក៏មានបុរសជាអ្នកប្រកបរបររត់ Pass App ម្នាក់ រស់នៅភូមិវាលស្បូវ សង្កាត់ច្បារអំពៅ ខណ្ឌច្បារអំពៅ រាជធានីភ្នំពេញ ក៏មានផ្ទុកជំងឺកូវីដ១៩ផងដែរ ហើយបុរសរូបនេះបានធ្វើដំណើរទៅចូលរួមកម្មវិធីឡើងគេហដ្ឋាននៅខេត្តត្បូងឃ្មុំ។
បុគ្គលិកបច្ចេកទេសនៅក្រុមហ៊ុន Li & Fung លោក Jason Zhang ប្រាប់ VOD ថា មុនផ្ទុះព្រឹត្តការណ៍សហគមន៍២០កុម្ភៈ លោកតែងតែធ្វើដំណើរទៅកន្លែងធ្វើការឬទៅទីតាំងផ្សេងៗទៀតតាមរយៈម៉ូតូកង់បី ប៉ុន្តែក្រោយពីផ្ទុះហេតុការណ៍នេះ លោកបានសម្រេចចិត្តផ្អាកជិះម៉ូតូកង់បី និងផ្អាកធ្វើដំណើរទៅកាន់កន្លែងផ្សេងៗមួយរយៈ។ លោកបន្តថា បច្ចុប្បន្ន លោកធ្វើដំណើរតែពីអគារស្នាក់នៅទៅកន្លែងធ្វើការប៉ុណ្ណោះ ដោយស្នើសុំឱ្យមិត្តភក្តិរបស់គាត់ជួយជូនទៅមក។
លោក Jason Zhang ប្រាប់ជាភាសាអង់គ្លេសក្នុងខ្លឹមសារថា៖ «ក្រោយផ្ទុះការចម្លងក្នុងសហគមន៍ជាថ្មី យើងត្រូវតែយកចិត្តទុកដាក់ចំពោះសុវត្ថិភាពរបស់យើង ដើម្បីរក្សាសុខភាពល្អរបស់យើង។ នេះគឺជាភាពទទួលខុសត្រូវផ្ទាល់ខ្លួនរបស់យើង»។
អ្នកនាង ណាណា អូន ដែលទើបតែចុះពីលើម៉ូតូកង់បី ឈប់នៅពីមុខផ្សារបឹងកេងកង បានប្រាប់ថា នាងហៅកង់បីនេះជិះពីផ្ទះនៅតាមបណ្តោយផ្លូវ២៧១ ដើម្បីមកផ្សារទិញអីវ៉ាន់មួយចំនួន។ ស្រ្តីវ័យ២៨ឆ្នាំរូបនេះ ប្រាប់ថា ចាប់ពីផ្ទុះការឆ្លងក្នុងសហគមន៍ជាថ្មីមក គាត់ហ៊ានចេញក្រៅផ្ទះតែនៅពេលណាចាំបាច់ប៉ុណ្ណោះ។
ដោយមានពាក់ម៉ាស់មុខគ្របពីលើក្តោងច្រមុះចុះដល់ក្រោមចង្ការ ស្រ្តីរូបនេះបន្តថា គាត់ហៅកង់បីជិះតែពេលណាមិនអាចធ្វើដំណើរតាមម៉ូតូនិងបន្ទាន់ប៉ុណ្ណោះ ហើយការជ្រើសរើសកង់បីទៀតសោត គឺគាត់រកអ្នករត់ណាដែលធ្លាប់ដឹក និងត្រូវដាក់ដបអាល់កុលទុកបាញ់សម្លាប់មេរោគតាមខ្លួន។
អ្នកនាង ណាណា អូន ប្រាប់ថា៖ «យើងអត់ហ៊ានចេញមកក្រៅដែរ ប៉ុន្តែទាល់ វាទាល់ពេកយើងត្រូវតែជិះមក។ បើយើងជិះម៉ូតូ ដូចខ្ញុំហ្នឹង មកយកអីវ៉ាន់ វារាងច្រើន វាដឹកអត់អស់ អ៊ីចឹងទាល់តែរាងប្រថុយខ្លះដែរ»។
កំពុងយកថង់ផ្លែឈើ មានចេកនិងប៉ោម ដាក់ព្យួរនៅលើម៉ូតូរាងសំពីងសំពោងបន្តិច នៅមុខច្រកចេញចូលផ្សារបឹងកេងកេង អ្នកនាង ប៊ុន សុខា និយាយថា ចាប់ពីកើតមានជំងឺកូវីដ១៩មក គាត់បានប្តូរពីការធ្វើដំណើរតាមម៉ូតូកង់បី មកប្រើប្រាស់ម៉ូតូផ្ទាល់ខ្លួនវិញ។
ស្រ្តីវ័យ៣៩ឆ្នាំរូបនេះ បញ្ជាក់ថា ការប្តូរមកប្រើយានជំនិះផ្ទាល់ខ្លួន គឺមិនមែនគាត់បារម្ភខ្លាចឆ្លងជំងឺនោះទេ ប៉ុន្តែដោយសារគាត់ត្រូវកាត់បន្ថយចំណាយ ខណៈចំណូលធ្លាក់ចុះ ដោយសារបញ្ហាជំងឺកូវីដ១៩ ដែលធ្វើឱ្យមនុស្សម្នានៅតាមដងផ្លូវនិងទីផ្សារមានការធ្លាក់ចុះខ្លាំង។
អ្នកនាង ប៊ុន សុខា ប្រាប់ថា៖ «ពួកគាត់អត់មានបញ្ហាអីទេ យើងខ្លាចតែចោរឆក់ ឬចោរតាមផ្លូវទេ។ យើងកាន់ទូរសព្ទមិនស្រួលៗ វាឆក់យើងហើយ ព្រោះអីនេះគឺសម័យកូវីដ»។
នាយកប្រតិបត្តិក្រុមហ៊ុន PassApp Technologies លោក តុប និមល ប្រាប់ VOD ឱ្យដឹងនៅថ្ងៃទី២៦ ខែកុម្ភៈ ថាចំនួនអ្នកដំណើរកក់កង់បីជិះតាមកម្មវិធីក្រុមហ៊ុនរបស់លោក ក្នុងរាជធានីភ្នំពេញ បានធ្លាក់ចុះជាបន្តបន្ទាប់រហូតដល់ពី៤០ទៅ៤៥ភាគរយ ចាប់ពីផ្ទុះព្រឹត្តិការណ៍សហគមន៍២០កុម្ភៈ។
លោកថា កម្រិតនៃផលប៉ះពាល់គឺប្រហាក់ប្រហែលនឹងអំឡុងផ្ទុះព្រឹត្តិការណ៍សហគមន៍ឆ្នាំមុន ប៉ុន្តែការឆ្លងរីករាលដាលគឺមានអត្រាលឿនរហ័សនិងខ្ពស់ជាង ដែលលោកថា អាចនឹងពិបាកបិទបញ្ចប់ក្នុងរយៈពេលខ្លី។
លោក តុប និមល និយាយថា៖ «ប្រសិនបើវាបន្តរីករាលដាលរឹតតែយូរ ហើយកាន់តែធំ ហើយបើក្នុងករណីវាឆ្លងដល់បណ្តាខេត្តផ្សេងៗទៀត អាហ្នឹងវាពិបាកក្នុងការដែលទប់ស្កាត់ហើយ អ៊ីចឹងវាប៉ះពាល់យូរ ហើយប៉ះពាល់ធំ»។
លោកបន្ថែមថា ប្រសិនបើស្ថានការណ៍មិនឆាប់វិលត្រឡប់ទៅរកភាពល្អប្រសើរក្នុងរយៈពេលខ្លីទេនោះ អ្នករត់កង់បីមួយចំនួននឹងបង្ខំចិត្តត្រឡប់ទៅស្រុកកំណើតវិញ ដោយសារពួកគេមិនអាចរកប្រាក់សម្រាប់បង់ថ្លៃឈ្នួលផ្ទះបាន។
ចំណែកប្រធានសមាគមប្រជាធិបតេយ្យឯករាជ្យនៃសេដ្ឋកិច្ចក្រៅប្រព័ន្ធ លោក វន់ ពៅ លើកឡើងថា ការវិលត្រឡប់នៃព្រឹត្តិការណ៍សហគមន៍២០កុម្ភៈ ធ្វើឱ្យប៉ះពាល់ដល់ជីវភាពពលរដ្ឋដែលប្រកបរបរតូចតាចតាមដងផ្លូវ ពិសេសអ្នកនៅក្បែរទីតាំងកើតជំងឺដែលអាជ្ញាធរបានបិទទ្វារ។
លោកថា បញ្ហានេះគឺជាទំនួលខុសត្រូវរបស់អាជ្ញាធររដ្ឋាភិបាលដែលមិនបានរឹតបន្ដឹងជនបរទេសដែលចូលមកប្រទេសកម្ពុជា និងវិធានការធ្វើចត្តាឡីស័ករបស់ពួកគេទាំងនោះឱ្យបានម៉ឺងម៉ាត់ ដែលបណ្តាលឱ្យផលវិបាកធ្លាក់មកលើពលរដ្ឋក្រីក្រនិងសង្គមជាតិ។
លោក វន់ ពៅ មានប្រសាសន៍ថា៖ «រដ្ឋគួរតែត្រៀមកញ្ចប់ថវិកាណាមួយសម្រាប់នៅពេលដែលមានហានិភ័យកើតឡើង ជួយទៅដល់អ្នកក្រីក្រ អ្នកដែលក្រៅប្រព័ន្ធ កំពុងតែបាត់បង់មុខរបរ បាត់ប្រាក់ចំណូល។ គួរតែមានកញ្ចប់ថវិកាសម្រាប់អាហារហូបចុកប្រចាំថ្ងៃផង កុំទុកគាត់ចោលអី»។
ត្រឡប់មកអ្នករត់ម៉ូតូកង់បីនៅម្តុំអគារភ្លោះក្នុងខណ្ឌចំការមនវិញ លោក សេង សុជាតិ លើកឡើងថា បើស្ថានភាពរីករាលដាលនៃជំងឺមិនវិលត្រឡប់ទៅរកភាពល្អប្រសើរឆាប់រហ័សទេ លោកនឹងបោះបង់មុខរបរដឹកភ្ញៀវ ហើយនាំក្រុមគ្រួសារត្រឡប់ទៅស្រុកកំណើតវិញ។
លោកថា៖ «ខ្ញុំគិតថាប្រហែលជាទៅនៅស្រុកគ្រប់គ្នាហើយយ៉ាង ប្រសិនបើនៅបន្តអ៊ីចឹង២[ទៅ]៣ខែទៀត មិនទាន់ដំណើរការដូចដើម។ ព្រោះមានអីរកទៀត បើបិទគ្រប់ច្រកអស់ហើយ អគារ»៕
