រដ្ឋាភិបាលកម្ពុជា បានកំណត់យកថ្ងៃអាទិត្យ ទី៥ ខែមិថុនា ឆ្នាំ២០២២ ជាថ្ងៃបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៥។
យោងតាមសេចក្តីសម្រេចរបស់រដ្ឋាភិបាលកម្ពុជា ចុះថ្ងៃទី១ ខែមីនា ឆ្នាំ២០២១ ដែលវីអូឌី ទទួលបាននៅថ្ងៃនេះ បានលើកឡើងថា ការបោះឆ្នោតក្រុមប្រឹក្សាឃុំសង្កាត់អាណត្តិទី៥នេះ នឹងធ្វើឡើងដោយមិនមានវត្តមានរបស់អតីតគណបក្សប្រឆាំងនោះទេ។
គួររំលឹកជូនថា ការបោះឆ្នោតជ្រើសរើសក្រុមប្រឹក្សាឃុំសង្កាត់អាណត្តិទី៤ កាលពីថ្ងៃទី៤ ខែមិថុនា ឆ្នាំ២០១៧ មានគណបក្សនយោបាយចំនួន ១២ចូលរួម ក៏ប៉ុន្តែក្នុងនោះ មានតែគណបក្សប្រជាជនកម្ពុជា និងអតីតគណបក្សសង្គ្រោះជាតិប៉ុណ្ណោះ ដែលទទួលបានអាសនៈច្រើនជាងគេ និងប្រកៀកប្រកិតគ្នា ក្នុងនោះ គណបក្សប្រជាជនកម្ពុជា ទទួលបានចំនួន ៦ ៥០៣ អាសនៈ និងអតីតគណបក្សសង្គ្រោះជាតិ ទទួលបានចំនួន ៥ ០០៧ អាសនៈ ក្នុងចំណោមអាសនៈសរុបនៅទូទាំងប្រទេសចំនួន ១១ ៥៧២ អាសនៈ។
ក៏ប៉ុន្តែក្រោយមក អតីតគណបក្សសង្គ្រោះជាតិ ត្រូវបានរំលាយ គណៈកម្មាធិការជាតិរៀបចំការបោះឆ្នោត បានយកអាសនៈរបស់អតីតគណបក្សសង្គ្រោះជាតិទាំង ៥ ០០៧អាសនៈ ទៅបែងចែកឱ្យគណបក្សផ្សេងៗទៀតវិញ៕
