ប្រជាពលរដ្ឋ និងមន្ត្រីនគរបាលនៅថ្នាក់ក្រោមមួយចំនួនក្នុងស្រុកកោះធំ ខេត្តកណ្តាល បានប្តឹងតាមរយៈលិខិតអនាមិកមួយ ទៅកាន់ក្រសួងមហាផ្ទៃ ឱ្យដកអធិការស្រុកកោះធំចេញពីមុខតំណែង ដោយពួកគេចោទអធិការស្រុករូបនោះថា បានប្រព្រឹត្តអំពើពុករលួយ បក្ខពួកនិយម និងមិនបម្រើប្រជាពលរដ្ឋ ជាដើម។
យោងតាមលិខិតអនាមិកមួយច្បាប់ដែលមានតែស្នាមមេដៃចំនួន១៨នាក់ និងមិនបញ្ចេញឈ្មោះ ហើយត្រូវបានគេផ្សព្វផ្សាយនៅលើបណ្តាញសង្គមហ្វេសប៊ុកកាលពីពេលថ្មីៗនេះ បានលើកឡើងថា ពួកគេគឺជាមន្ត្រីនគរបាលជាតិ និងជាប្រជាពលរដ្ឋរស់នៅទូទាំងស្រុកកោះធំ ស្នើសុំដល់ថ្នាក់ដឹកនាំក្រសួងមហាផ្ទៃ អគ្គស្នងការនគរបាលជាតិ និងស្នងការនគរបាលខេត្តកណ្តាល ឱ្យចុះពិនិត្យមើលការងារដឹកនាំរបស់លោកវរសេនីយ៍ឯក ស៊ីម ឃាង អធិការនគរបាលស្រុកកោះធំ រួមនឹងបក្ខពួកជាច្រើននាក់ទៀត។
លិខិតអនាមិកដដែលនេះបានចោទប្រកាន់ថា ចាប់តាំងពីអធិការនគរបាលស្រុកកោះធំ លោក ស៊ីម ឃាង បានចូលកាន់មុខតំណែងនៅក្នុងឆ្នាំ២០១៧មក លោកបានធ្វើឱ្យមន្ត្រីនគរបាលនៅក្នុងអធិការដ្ឋាននគរបាលស្រុកកោះធំទាំងមូល មានការបែកបាក់សាមគ្គីភាពផ្ទៃក្នុង ដោយសារតែលោកអធិការប្រកាន់យកបក្ខពួកនិយម អួតអាងថាខ្លួនមានខ្សែធំៗនៅពីក្រោយចាំការពារ ហើយបានប្រព្រឹត្តអំពើពុករលួយខុសច្បាប់ ដើម្បីផលប្រយោជន៍ផ្ទាល់ខ្លួន ជាដើម។
លិខិតអនាមិកដដែលបានបន្តចោទប្រកាន់អធិការរូបនោះថា មិនបានយកចិត្តទុកដាក់ក្នុងការបំពេញការងារថែរក្សាសន្តិសុខសណ្តាប់ធ្នាប់ជូនដល់ប្រជាពលរដ្ឋក្នុងមូលដ្ឋាន ដែលជាហេតុធ្វើឱ្យកើតមានបទល្មើសជាច្រើន ដូចជា គ្រឿងញៀន ល្បែងស៊ីសងគ្រប់ប្រភេទ អំពើចោរកម្ម លួច ឆក់ ក្រុមក្មេងទំនើងដើរបង្កចលាចល និងការជំរិតទារលុយពីមន្ត្រីនគរបាលថ្នាក់ក្រោមដែលចង់ឡើងតួនាទី។
មិនតែប៉ុណ្ណោះ លិខិតអនាមិកនោះបានចោទ លោកអធិការស្រុក ស៊ីម ឃាន ថាបានដើរប្រមូលលុយកាក់ពីមុខសញ្ញាបើកល្បែងស៊ីសងខុសច្បាប់គ្រប់ប្រភេទ និងពីឈ្មួញអ្នករកស៊ីនៅក្នុងស្រុកនេះជាដើម។
វីអូឌី មិនអាចស្វែងរកប្រភពអនាមិកនៅក្នុងលិខិតនេះមកបញ្ជាក់បន្ថែមបាននោះទេ។
ក៏ប៉ុន្តែបើតាមការអះអាងពីប្រជាពលរដ្ឋស្រុកកោះធំម្នាក់ដោយសុំមិនបញ្ចេញឈ្មោះ ថាបញ្ហាគ្រឿងញៀននៅក្នុងស្រុកនេះកំពុងកើតឡើងយ៉ាងអនាធិបតេយ្យ ហើយកម្រឃើញមានការចុះបង្ក្រាបពីអាជ្ញាធរស្រុកពិតមែន។
ប្រជាពលរដ្ឋរូបនេះបានលើកឡើងថា៖ «ខ្ញុំមិនដែលដឹង ហើយក៏មិនសូវបានយកចិត្តទុកដាក់ដែរ ប៉ុន្តែអត់ឮល្បីថាអធិការចាប់អ្នកនេះចាប់អ្នកនោះ កម្រសូវឮ អត់ឮ ហើយគ្រឿងញៀនរាលដាលពេញ។ អត់ឮថាចាប់គ្រឿងញៀនអី កម្រណាស់»។
អធិការនគរបាលស្រុកកោះធំ លោក ស៊ីម ឃាង ដែលរងការចោទប្រកាន់នេះ សុំមិនធ្វើអត្ថាធិប្បាយអ្វីឡើយនៅពេល វីអូឌី ទាក់ទងសុំការបំភ្លឺនៅថ្ងៃទី៣ ខែមីនានេះ។
ចំណែកលោកឧត្តមសេនីយ៍ទោ ឈឿន សុចិត្រ ស្នងការនគរបាលខេត្តកណ្តាល ក៏មិនអាចទាក់ទងបានទេនៅថ្ងៃនេះ។
យ៉ាងណាក្តី អ្នកនាំពាក្យក្រសួងមហាផ្ទៃ លោក ខៀវ សុភ័គ បានអះអាងថា ក្រសួងមហាផ្ទៃនឹងស៊ើបអង្កេតរឿងនេះ ដោយក្រសួងមិនព្រងើយកន្តើយនោះឡើយ។
លោកបានមានប្រសាសន៍ដូច្នេះថា៖ «និយាយរួម ពូមិនទាន់បានឃើញលិខិតហ្នឹងទេ ប៉ុន្តែពូអាចនិយាយបានថា ប្រសិនបើក្រសួងទទួលបានពាក្យបណ្តឹងជាផ្លូវការ ក្រសួងនឹងមិនព្រងើយកន្តើយនោះឡើយ។ មិនព្រងើយកន្តើយ ក្រសួងនឹងពិនិត្យមើលរឿងហ្នឹង»។
ចំណែកអភិបាលខេត្តកណ្តាល លោក គង់ សោភ័ណ្ឌ បានអះអាងដែរថា លោកបានទទួលដំណឹងនេះរួចហើយ ហើយកំពុងចាត់ឱ្យក្រុមការងាររដ្ឋបាលចុះពិនិត្យមើលរឿងនេះ។ ប៉ុន្តលោកបានកត់សម្គាល់ថា កន្លងមក ការបំពេញភារកិច្ចរបស់អធិការស្រុករូបនោះមិនដែលឃើញមានបញ្ហាអ្វីនោះឡើយ។
លោកអភិបាលខេត្តបញ្ជាក់ថា៖ «បានឃើញគេបង្ហោះហ្វេសប៊ុកដែរ ហើយកំពុងពិនិត្យមើល ព្រោះការងារកន្លងមក គាត់អនុវត្តរហូតមកដែរទេ ហើយក្នុងគណៈបញ្ជាការឯកភាពអី ឃើញថា [គាត់] ដំណើរការ សហការជាមួយអភិបាលស្រុក ទាំងការងារកូវីដ ការងារសន្តិសុខអី ឃើញដំណើរការធម្មតាបាទ។ ប៉ុន្តែដល់ទៅលេចឮបញ្ហាហ្នឹងមក ខ្ញុំក៏មិនទាន់បានដឹងដែរ ហើយត្រូវការពិនិត្យស្រាវជ្រាវសិន»៕
