ក្រសួងអប់រំ យុវជន និងកីឡា បានជូនដំណឹងឱ្យបន្តផ្អាកដំណើរការគ្រឹះស្ថានសិក្សាសាធារណៈនិងឯកជន នៅរាជធានីភ្នំពេញ ខេត្តកណ្តាល ក្រុងព្រះសីហនុ និងស្រុកស្ទឹងហាវ នៃខេត្តព្រះសីហនុ រហូតដល់បញ្ចប់ព្រឹត្តិការណ៍«សហគមន៍២០កុម្ភៈ»។
ការបន្តផ្អាកដំណើរការសាលារៀនទាំងរដ្ឋនិងឯកជននៅក្នុងរាជធានី-ខេត្តទាំង៣ ដោយសារករណីឆ្លងកូវីដ១៩ក្នុងសហគមន៍នៃរាជធានី-ខេត្តទាំង៣ នៅតែត្រូវបានរកឃើញជារៀងរាល់ថ្ងៃ។
យោងតាមសេចក្តីជូនដំណឹងរបស់ក្រសួងអប់រំ យុវជន និងកីឡា នៅថ្ងៃទី០៤ ខែមីនា ឆ្នាំ២០២១នេះ បានសម្រេចបន្តផ្អាកដំណើរការគ្រឹះស្ថានសិក្សាសាធារណៈនិងឯកជនទាំងអស់នៅរាជធានីភ្នំពេញ ខេត្តកណ្តាល ក្រុងព្រះសីហនុ និងស្រុកស្ទឹងហាវ នៃខេត្តព្រះសីហនុ ចាប់ពីពេលនេះរហូតដល់ចប់ព្រឹត្តិការណ៍«សហគមន៍២០កុម្ភៈ» ដែលគេមិនអាចកំណត់បាននៅឡើយទេថា តើព្រឹត្តិការណ៍នេះនឹងបញ្ចប់នៅពេលណា។
កាលពីថ្ងៃទី២៣ ខែកុម្ភៈ លោកនាយករដ្ឋមន្ត្រី ហ៊ុន សែន បានប្រកាសឱ្យផ្អាកសាលារៀនទាំងអស់នៅរាជធានីភ្នំពេញ និងខេត្តកណ្តាល រយៈពេលពីរសប្តាហ៍ ដោយសារតែការរីករាលដាលនៃជំងឺកូវីដ-១៩ ទៅក្នុងសហគមន៍កាន់តែខ្លាំង។
នៅថ្ងៃទី០៤ ខែមីនានេះ លោកនាយករដ្ឋមន្ត្រី ហ៊ុន សែន បានឯកភាពជាថ្មីឱ្យក្រសួងអប់រំ យុវជន និងកីឡា បន្តបិទសាលារៀនរដ្ឋនិងឯកជននៅក្នុងរាជធានី-ខេត្តទាំង៣ខាងលើ រហូតដល់បញ្ចប់ព្រឹត្តិការណ៍សហគមន៍២០កុម្ភៈ។
អ្នកស្រី អេង គឹមនាង អាណាព្យាបាលសិស្សម្នាក់រស់នៅសង្កាត់ផ្សារចាស់ រាជធានីភ្នំពេញ បានថ្លែងគាំទ្រចំពោះចំណាត់ការរបស់រដ្ឋាភិបាលកម្ពុជា ស្របពេលដែលជំងឺកូវីដ១៩នៅតែបន្តរីករាលដាលខ្លាំងនៅក្នុងរាជធានីភ្នំពេញ។ ក៏ប៉ុន្តែ ទន្ទឹមគ្នានេះ អ្នកស្រីក៏បារម្ភអំពីការសិក្សារបស់កូនៗចំនួន៣នាក់របស់អ្នកស្រីផងដែរ។
អ្នកស្រីបានមានប្រសាសន៍ថា៖ «និយាយទៅ ព្រួយបារម្ភដែរហ្នឹង! ពេលបិទម្តងទៀតអញ្ចឹង។ អញ្ចឹងសិស្សអត់បានរៀនរហូត។ តែការបិទហ្នឹងក៏ល្អម្យ៉ាងដែរ បើជំងឺហ្នឹងនៅតែមាន»។
ការបិទសាលារៀនរដ្ឋនិងឯកជននៅក្នុងរាជធានី-ខេត្តដែលកំពុងរីករាលដាលជំងឺកូវីដ១៩ខ្លាំងនេះ គឺជាវិធានការមួយដើម្បីផ្តាច់ខ្សែចម្លងនៃជំងឺកូវីដ១៩នៅក្នុងសហគមន៍ដែលបានផ្ទុះឡើងសារជាថ្មីកាលពីថ្ងៃទី២០ ខែកុម្ភៈ។
គិតត្រឹមថ្ងៃទី០៤ ខែមីនានេះ ក្រសួងសុខាភិបាលបានរកឃើញអ្នកឆ្លងជំងឺកូវីដ១៩ថ្មីចំនួន៣១នាក់ទៀត ក្នុងនោះករណីឆ្លងក្នុងសហគមន៍មានចំនួន២៨នាក់ និងអ្នកដំណើរពីបរទេសមានចំនួន០៣នាក់ ដែលធ្វើឱ្យចំនួនអ្នកឆ្លងជំងឺកូវីដ១៩សរុបនៅកម្ពុជាកើនដល់៩០៩នាក់។
លោក រស់ សុវាចា អ្នកនាំពាក្យក្រសួងអប់រំ យុវជន និងកីឡា បានថ្លែងថា ទោះបីជាសាលារៀនបានផ្អាកដំណើរការក្តី ក៏ប៉ុន្តែការរៀននិងការបង្រៀននៅតែបន្តធ្វើតាមរយៈប្រព័ន្ធអេឡិចត្រូនិច។
លោកបានមានប្រសាសន៍ថា៖ «ដូចខ្ញុំជម្រាបអញ្ចឹងថា សូមយោងទាំងស្រុងលើលិខិតលេខ២១ បានចែងហើយថា នៅក្នុងខណៈការផ្អាកបណ្តោះអាសន្នទីតាំងភូមិសាស្ត្រទាំងបីនេះ គឺបង្វែរការសិក្សាទៅតាមអនឡាញ»។
យុវសិស្សម្នាក់ដែលកំពុងសិក្សានៅថ្នាក់ទី១២ នៅក្នុងវិទ្យាល័យមួយនៅរាជធានីភ្នំពេញ បារម្ភថា ការបន្តបិទសាលារៀនដែលគ្មានការកំណត់នេះ នឹងធ្វើឱ្យប៉ះពាល់ដល់ការសិក្សារបស់សិស្សានុសិស្ស ជាពិសេសសម្រាប់សិស្សដែលកំពុងរៀនត្រៀមដើម្បីប្រឡងសញ្ញាបត្រថ្នាក់ទី៩ និងថ្នាក់ទី១២ ខាងមុខ។
យុវសិស្សរូបនេះបានត្អូញត្អែរយ៉ាងដូច្នេះថា៖ «មានអារម្មណ៍ថា អត់សូវសប្បាយចិត្តទេ ដោយសារតែឆ្នាំហ្នឹងជាឆ្នាំយើងប្រឡង ហើយយើងរៀនអនឡាញ អញ្ចឹងវាអត់ដិតដល់ដូចនៅសាលារៀន ហើយណាមួយយើងអត់ជួបមុខគ្រូ។ អញ្ចឹងយើងយ៉ាប់! យ៉ាប់ពេលមានសំណួរតិចតួចអី យើងពិបាកសួរគាត់ណាស់ ដោយសារអនឡាញ ហើយមួយទៀត ពេលខ្លះអ៊ីនធឺណិតវា Slow [យឺត]ទៅ យើងយ៉ាប់រៀនដែរ។ ទាល់តែយើងរៀនផ្ទាល់ជាមួយគ្រូ បានយើងស្រួល។ ខ្ញុំចង់សំណូមពរឱ្យរដ្ឋាភិបាល ថាបើយ៉ាប់គ្រប់គ្រងពេក យើងបើករៀនត្រឹមថ្នាក់ទី៩ ទី១២អញ្ចឹងទៅ ព្រោះឆ្នាំហ្នឹងជាឆ្នាំគាត់ប្រឡង អញ្ចឹងគាត់ត្រូវរៀនជាមួយគ្រូ។ អញ្ចឹងបើពិបាកបើកពេក បើកត្រឹមថ្នាក់ទី១២ ថ្នាក់ទី៩ សិនបានហើយ ព្រោះចំនួនតិច អញ្ចឹងយើងស្រួលរៀន»។
យោងតាមរបាយការណ៍ដែលផ្តល់ដោយមន្ទីរអប់រំ យុវជន និងកីឡា នៅក្នុងរាជធានីភ្នំពេញ គិតត្រឹមថ្ងៃទី០៤ ខែមីនានេះ មានសាលារៀនរដ្ឋនិងឯកជនចំនួន៤៨២កន្លែងនៅទូទាំងរាជធានីភ្នំពេញ បានផ្អាក និងសិស្សានុសិស្សជាង៣០ម៉ឺននាក់បានរងផលប៉ះពាល់។ ចំណែកនៅឯខេត្តកណ្តាល មានសាលារៀនរដ្ឋនិងឯកជនចាប់ពីមត្តេយ្យសិក្សារហូតដល់មធ្យមសិក្សាចំនួន៧៣២កន្លែង បានផ្អាកដំណើរការ និងធ្វើឱ្យប៉ះពាល់ដល់សិស្សានុសិស្សចំនួនជាង២៥ម៉ឺននាក់។
ចំណែកនៅឯខេត្តព្រះសីហនុឯណោះវិញ មានសាលារៀនរដ្ឋនិងឯកជនចំនួន៥២កន្លែងស្ថិតនៅក្នុងក្រុងព្រះសីហនុ និងនៅស្រុកស្ទឹងហាវ ដែលត្រូវបានប្រកាសឱ្យផ្អាកដំណើរការ។
ក្រសួងអប់រំ យុវជន និងកីឡា បានបើកបវេសនកាលឆ្នាំសិក្សាថ្មី២០២០-២០២១ កាលពីថ្ងៃទី១១ ខែមករា ឆ្នាំ២០២១ ហើយគ្រោងនឹងបញ្ចប់នៅថ្ងៃទី៣១ ខែតុលា ឆ្នាំ២០២១។ ក្នុងនោះ វិស្សមកាលតូចនឹងធ្វើឡើងនៅថ្ងៃទី៦ ដល់ថ្ងៃទី១៩ ខែមេសា ខណៈមហាវិស្សមកាលឬវ៉ាកងធំ នឹងធ្វើឡើងនៅថ្ងៃទី១ ដល់ថ្ងៃទី៣០ ខែវិច្ឆិកា ឆ្នាំ២០២១។ នេះបើយោងតាមសេចក្តីជូនដំណឹងរបស់ក្រសួងអប់រំ៕
