សន្តិសុខម្នាក់ក្នុងចំណោមពីរនាក់ដែលរងការចោទប្រកាន់ថា បានជួយរំដោះស្ត្រីជនជាតិចិន៤នាក់ចេញពីកន្លែងធ្វើចត្តាឡីស័កក្នុងសណ្ឋាគារសុខា ត្រូវបាននាំខ្លួនទៅសាកសួរនៅឯអនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ១៩ នៅព្រឹកថ្ងៃទី៥ ខែមីនានេះ បន្ទាប់ពីបានបញ្ចប់ការធ្វើចត្តាឡីស័កអស់រយៈពេល១៤ថ្ងៃ។
តាមសមត្ថកិច្ច សន្តិសុខរូបនោះមានឈ្មោះថា រ៉ែន សុធារ៉ា ភេទប្រុស អាយុ៣៨ មុខរបរសន្តិសុខសណ្ឋាគារសុខាភ្នំពេញ ដែលមានអាសយដ្ឋានស្ថិតនៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ។
លោក សាន សុខសីហា អ្នកនាំពាក្យស្នងការនគរបាលរាជធានីភ្នំពេញ បានថ្លែងថា ជនសង្ស័យរូបនេះត្រូវបានកម្លាំងកងរាជអាវុធហត្ថខណ្ឌមានជ័យ បញ្ជូនខ្លួនទៅកាន់អនុគណៈកម្មការស្រាវជ្រាវ និងតាមដានបុគ្គលសង្សយ័ថាមានផ្ទុកជំងឺកូវីដ១៩ ដែលមានទីបញ្ជាការស្ថិតនៅអគ្គស្នងការដ្ឋាននគរបាលជាតិ ដើម្បីបន្តនីតិវិធី។
សូមបញ្ជាក់ថា កាលពីពាក់កណ្តាលខែកុម្ភៈកន្លងទៅ សន្តិសុខ២នាក់ស្ថិតនៅសណ្ឋាគារសុខា បានជួយសម្រួលឱ្យមានការចាកចេញពីមណ្ឌលចត្តាឡីស័ក នូវស្ត្រីជនជាតិចិន៤នាក់ ដែលក្រោយមកស្ត្រីជនជាតិចិននោះត្រូវបានរកឃើញមានកូវីដ១៩ និងដែលនាំឱ្យកើតមានព្រឹត្តិការណ៍សហគមន៍២០កុម្ភៈនៅពេលនេះ៕
