សមត្ថកិច្ចក្រសួងមហាផ្ទៃ បានបញ្ជូនសន្តិសុខសណ្ឋាគារសុខាដែលរងការចោទប្រកាន់ថាបានជួយរំដោះស្ត្រីជនជាតិចិន៤នាក់ចេញពីបន្ទប់ចត្តាឡីស័កនោះ ទៅកាន់អយ្យការអមសាលាដំបូងរាជធានីភ្នំពេញហើយនៅព្រឹកថ្ងៃចន្ទ ទី៨ ខែមីនានេះ។
អនុប្រធាននាយកដ្ឋានកណ្តាលសន្តិសុខនៃអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ស៊ាង ធារិទ្ធ មានប្រសាសន៍ថា សមត្ថកិច្ចបានបញ្ជូនសន្តិសុខម្នាក់នេះទៅកាន់តុលាការ ដោយសារតែគាត់ជាមេខ្លោងរៀបចំសម្របសម្រួលឱ្យស្ត្រីជនជាតិចិន៤នាក់គេចចេញពីបន្ទប់ធ្វើចត្តាឡីស័កនៅក្នុងសណ្ឋាគារសុខា រាជធានីភ្នំពេញ។
បើតាមលោក ស៊ាង ធារិទ្ធ សន្តិសុខម្នាក់នេះមានឈ្មោះ រ៉ែន សុធារ៉ា ភេទប្រុស អាយុ៣៨ឆ្នាំ មានតួនាទីជាអនុប្រធានសន្តិសុខប្រចាំនៅសណ្ឋាគារសុខាភ្នំពេញ ត្រូវបានចោទប្រកាន់តាមច្បាប់ស្តីពី «ការគ្រប់គ្រងគ្រោះមហន្តរាយ» និងអនុក្រឹត្យថ្មីស្តីពី «វិធានការសុខាភិបាលដើម្បីទប់ស្កាត់និងឆ្លើយតបការឆ្លងរាលដាលជាអន្តរជាតិនៃជំងឺកូវីដ១៩នៅតាមច្រកទ្វារចេញចូល»។
យ៉ាងណាក្តី តុលាការនៅមិនទាន់សម្រេចចោទប្រកាន់សន្តិសុខម្នាក់នេះជាផ្លូវការនៅឡើយទេ គិតត្រឹមព្រឹកថ្ងៃទី៨ ខែមីនានេះ។
យោងតាមមាត្រា ៤៤ នៃច្បាប់ ស្តីពី «ការគ្រប់គ្រងគ្រោះមហន្តរាយ» បានចែងថា «រាល់បុគ្គលដែលបានដឹងអំពីស្ថានភាពហានិភ័យដែលអាចបង្កឱ្យមានគ្រោះមហន្តរាយ ហើយមិនបានរាយការណ៍ព័ត៌មានជាបន្ទាន់ជូនអាជ្ញាធរមានសមត្ថកិច្ច ត្រូវផ្តន្ទាទោសដាក់ពន្ធនាគារពី ១(មួយ)ខែ ទៅ ៦(ប្រាំមួយ)ខែ និង/ឬពិន័យជាប្រាក់ពី ១០០ ០០០(មួយសែន)រៀល ទៅ ១ ០០០ ០០០ (មួយលាន)រៀល។
រីឯអនុក្រឹត្យថ្មីរបស់រដ្ឋាភិបាលកម្ពុជា ដែលប្រកាសដាក់ឱ្យប្រើប្រាស់ដោយលោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែកុម្ភៈ ឆ្នាំ២០២១នេះ ត្រង់មាត្រា៨ បានចែងថា «អ្នកដែលផ្តើមគំនិតដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយចេតនាដល់អ្នកគេចចេញពីកន្លែងធ្វើចត្តាឡីស័កនោះ នឹងត្រូវទទួលរងការពិន័យជាប្រាក់ចាប់ពី ១០ ០០០ ០០០ រៀល ដល់ ៥០ ០០០ ០០០ រៀល»។ នោះដោយមិនទាន់គិតបញ្ចូលពីទោសព្រហ្មទណ្ឌផ្សេងទៀតនោះឡើយ។
សន្តិសុខម្នាក់នេះត្រូវបានបញ្ជូនទៅកាន់អនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ១៩ ស្ថិតនៅក្នុងនាយកដ្ឋានកណ្តាលសន្តិសុខនៃអគ្គស្នងការនគរបាលជាតិ កាលពីថ្ងៃទី៥ ខែមីនា បន្ទាប់ពីបានបញ្ចប់ការធ្វើចត្តាឡីស័កអស់រយៈពេល១៤ថ្ងៃ បង្ហាញថា អវិជ្ជមានជំងឺកូវីដ១៩។
សូមបញ្ជាក់ថា តាមការប្រកាសរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី២០ ខែកុម្ភៈ កម្ពុជាបានផ្ទុះការឆ្លងជំងឺកូវីដ១៩ ទៅក្នុងសហគមន៍ជាថ្មី ដោយផ្ដើមចេញពីក្លឹបកម្សាន្តនៅភ្នំពេញមួយកន្លែងឈ្មោះ អិន៨ (N8) ហើយបានបន្តរាលដាលដល់កន្លែងផ្សេងៗទៀត។
លោកនាយករដ្ឋមន្ត្រី ហ៊ុន សែន បានថ្លែងថា មុនប៉ុន្មានថ្ងៃផ្ទុះករណីឆ្លងក្នុងសហគមន៍នេះ មានស្ត្រី៤នាក់បានលួចចេញពីកន្លែងធ្វើចត្តាឡីស័កក្នុងសណ្ឋាគារមួយទៅចូលក្លឹបដើរលេងកម្សាន្ត ដោយមានសន្ដិសុខនៃសណ្ឋាគារនោះជួយរំដោះ។ ស្ត្រី២នាក់ក្នុងចំណោមស្ត្រីទាំង៤នាក់នោះ មានផ្ទុកជំងឺកូវីដ១៩៕
