សាលាដំបូងរាជធានីភ្នំពេញ បានសម្រេចឃុំខ្លួនសន្តិសុខសណ្ឋាគារសុខា ដែលបានជួយរំដោះស្ត្រីជនជាតិចិន៤នាក់ចេញពីកន្លែងធ្វើចត្តាឡីស័ក ជាបណ្តោះអាសន្ននៅពន្ធនាគារ ក្រោមការចោទប្រកាន់តាមមាត្រា៤២ នៃច្បាប់ស្តីពី «ការគ្រប់គ្រងគ្រោះមហន្តរាយ» និងមានចេតនាមិនគោរពបញ្ជារបស់រដ្ឋបាលនៅនឹងកន្លែង។
លោក គុជ គឹមឡុង អ្នកនាំពាក្យអយ្យការអមតុលាការសាលាដំបូងរាជធានីភ្នំពេញ បានថ្លែងប្រាប់ វីអូឌី នៅល្ងាចថ្ងៃទី០៨ មីនានេះថា៖ «ករណីហ្នឹងយើងបានសម្រេចចោទប្រកាន់ ហើយចៅក្រមស៊ើបសួរបានសម្រេចឃុំខ្លួនហើយ បាទ! ចោទប្រកាន់តាមមាត្រា៤២ នៃច្បាប់ស្តីពីការគ្រប់គ្រងគ្រោះមហន្តរាយ»។
យោងតាមមាត្រា៤២ នៃច្បាប់ស្ដីពី «ការគ្រប់គ្រងគ្រោះមហន្តរាយ» បានចែងថា អំពើដោយចេតនាមិនគោរពបញ្ជារបស់រដ្ឋបាលនៅនឹងកន្លែង ឬគណៈកម្មាធិការគ្រប់គ្រងគ្រោះមហន្តរាយដែលប្រើប្រាស់សិទ្ធិអំណាចរបស់ខ្លួន ក្រោមបញ្ញត្តិនៃមាត្រា២៥ នៃច្បាប់នេះ ត្រូវផ្តន្ទាទោសដាក់ពន្ធនាគារពី១ខែទៅ១ឆ្នាំ និងពិន័យជាប្រាក់ពី១សែនរៀល ទៅ២លានរៀល។
សមត្ថកិច្ចក្រសួងមហាផ្ទៃ បានបញ្ជូនសន្តិសុខសណ្ឋាគារសុខារូបនោះទៅកាន់អយ្យការអមសាលាដំបូងរាជធានីភ្នំពេញ នៅព្រឹកថ្ងៃចន្ទនេះ ដោយចោទប្រកាន់តាមមាត្រា៤២ នៃច្បាប់ស្តីពី «ការគ្រប់គ្រងគ្រោះមហន្តរាយ» និងអនុក្រឹត្យថ្មីស្តីពី «វិធានការសុខាភិបាលដើម្បីទប់ស្កាត់និងឆ្លើយតបការឆ្លងរាលដាលជាអន្តរជាតិនៃជំងឺកូវីដ១៩ នៅតាមច្រកទ្វារចេញចូល»។
សន្តិសុខម្នាក់នេះមានឈ្មោះ រ៉ែន សុធារ៉ា ភេទប្រុស អាយុ៣៨ឆ្នាំ មានតួនាទីជាអនុប្រធានសន្តិសុខប្រចាំនៅសណ្ឋាគារសុខាភ្នំពេញ។
អនុប្រធាននាយកដ្ឋានកណ្តាលសន្តិសុខនៃអគ្គស្នងការដ្ឋាននគរបាលជាតិ លោកឧត្តមសេនីយ៍ឯក ស៊ាង ធារិទ្ធ មានប្រសាសន៍ថា សមត្ថកិច្ចបានបញ្ជូនសន្តិសុខម្នាក់នេះទៅកាន់តុលាការ ដោយសារតែគាត់ជាមេខ្លោងរៀបចំសម្របសម្រួលឱ្យស្ត្រីជនជាតិចិន៤នាក់គេចចេញពីបន្ទប់ធ្វើចត្តាឡីស័កនៅក្នុងសណ្ឋាគារសុខា រាជធានីភ្នំពេញ។
លោកថា៖ «យើងបញ្ជូនតែមួយទេ គឺឈ្មោះ រ៉ែន សុធារ៉ា ដែលជាអនុប្រធានសន្តិសុខនៃសណ្ឋាគារសុខាតែម្តង ដែលជាមេខ្លោងរៀបចំសម្របសម្រួលឱ្យមានការគេចចេញពីទីតាំងអូតែលសុខានេះ។ យើងបានរកឃើញពីកំហុសឆ្គងរបស់គាត់ទាក់ទងនឹងច្បាប់ស្តីពីការគ្រប់គ្រងគ្រោះមហន្តរាយ ដោយយើងបានចោទប្រកាន់គាត់ផ្អែកទៅតាមមាត្រា៤២ នៃច្បាប់ស្តីពីការគ្រប់គ្រងគ្រោះមហន្តរាយ»។
លោកបានបន្ថែមថា៖ «ហើយក្នុងនោះដែរ យើងបានបន្ថែមនូវការអនុវត្តវិធានរដ្ឋបាលចំពោះកំហុសឆ្គងនេះ តាមអនុក្រឹត្យលេខ២៧ អនក្រ ចុះថ្ងៃទី១៧ ខែកុម្ភៈ ឆ្នាំ២០២១នេះ។ ប៉ុន្តែខ្ញុំសូមបញ្ជាក់ថា សមត្ថកិច្ចបានត្រឹមតែកសាងសំណុំរឿងបញ្ជូនទៅទេ អ៊ីចឹងរាល់ការសម្រេចយ៉ាងម៉េចគឺស្ថិតនៅលើតុលាការ»។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា បានគាំទ្រចំពោះចំណាត់ការលើសន្តិសុខសណ្ឋាគារសុខារូបនេះ។
លោកមានប្រសាសន៍ដូច្នេះថា៖ «ខ្ញុំគិតថា ចំណាត់ការដែលគេដាក់បន្ទុកលើគាត់ហ្នឹង គឺជានីតិវិធីត្រឹមត្រូវ ហើយជាធម្មតាគេត្រូវស្វែងរកគោលការណ៍គតិយុត្តិ គ្រាន់ឱ្យសមនឹងករណីរបស់គាត់។ ពាក់ព័ន្ធនឹងរឿងអំពើពុករលួយ ដោយសារគាត់មិនមែនជាមន្ត្រីសាធារណៈ អ៊ីចឹងគាត់អត់ចូលក្នុងបទល្មើសស៊ីសំណូកសូកប៉ាន់ទេ»។
អនុក្រឹត្យថ្មីរបស់រដ្ឋាភិបាលកម្ពុជា ដែលប្រកាសដាក់ឱ្យប្រើប្រាស់ដោយលោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែកុម្ភៈ ឆ្នាំ២០២១នេះ ត្រង់មាត្រា៨ បានចែងថា «អ្នកដែលផ្តើមគំនិតដឹកនាំ ណែនាំ ញុះញង់ បញ្ចុះបញ្ចូល ឬជួយសម្រួលដោយចេតនាដល់អ្នកគេចចេញពីកន្លែងធ្វើចត្តាឡីស័កនោះ នឹងត្រូវទទួលរងការពិន័យជាប្រាក់ចាប់ពី ១០ ០០០ ០០០ រៀល ដល់ ៥០ ០០០ ០០០ រៀល»។ នោះដោយមិនទាន់គិតបញ្ចូលពីទោសព្រហ្មទណ្ឌផ្សេងទៀតនោះឡើយ។
សូមបញ្ជាក់ថា តាមការប្រកាសរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី២០ ខែកុម្ភៈ កម្ពុជាបានផ្ទុះការឆ្លងជំងឺកូវីដ១៩ ទៅក្នុងសហគមន៍ជាថ្មី ដោយផ្ដើមចេញពីក្លឹបកម្សាន្តនៅភ្នំពេញមួយកន្លែងឈ្មោះ អិន៨ (N8) ហើយបានបន្តរាលដាលដល់កន្លែងផ្សេងៗទៀត។
លោកនាយករដ្ឋមន្ត្រី ហ៊ុន សែន បានថ្លែងថា មុនប៉ុន្មានថ្ងៃនៃការផ្ទុះករណីឆ្លងក្នុងសហគមន៍នេះ មានស្ត្រីជនជាតិចិន៤នាក់បានលួចចេញពីកន្លែងធ្វើចត្តាឡីស័កក្នុងសណ្ឋាគារមួយ ទៅចូលក្លឹបដើរលេងកម្សាន្ត ដោយមានសន្ដិសុខនៃសណ្ឋាគារនោះជួយរំដោះ។ ស្ត្រី២នាក់ក្នុងចំណោមស្ត្រីទាំង៤នាក់នោះ មានផ្ទុកជំងឺកូវីដ១៩៕
